Մոտենում են ժամանակները, պարոնա՛յք. «Փաստ»

«Փաստ» օրաթերթը գրում է.

Մեր երկրի իշխանությունը, ընդդիմությունը և ընդհանրապես տնտեսության ու քաղաքականության հետ կապ ունեցող ցանկացած ոք մի գիշերվա մեջ արթնացավ ու տեսավ, որ երկրում թանկացումներ են: Թռել են առաջին անհրաժեշտության մթերքների գները, թանկացել են հեղուկ գազը, բենզինը, դիզելային վառելիքը:

Ու բոլորը խառնվեցին իրար: Երկրի նախագահն այնտեղ հավաքեց իր ենթականերին, խարհրդակցություն արեց ու հանձնարարականներ տվեց:

Ընդդիմությունն այնտեղ, քնից լավ երազով արթնացածի պես, ցնծաց, ձեռքերը շփեց ու գնաց գործ անելու: Դիմեց հասարակությանը, ժողովրդին, թե՝ դուրս եկեք փողոց, թե՝ ելեք ու պայքարեք ու ելքը գտեք՝ ինչպես կանգնեցնենք գնաճը:

Խորհրդարանի պատգամավորներն էլ, հատկապես՝ իշխանական ուժի պատգամավորները, թե՝ պետք է լսումներ կազմակերպենք գնաճի վերաբերյալ: Հավաքենք գործից տեղյակ կամ անտեղյակ մարդկանց ու խոսակցություն ծավալենք:

Ու այսպես՝ բոլորը շահեցին, իշխանական համարյա բոլոր օղակները: Գործ է բացվել, թևքերը քշտել, մտել են մեջն ու աշխատում են: Դե, աշխատում են ի տես ժողովրդի: ժողովուրդը թող նայի ու իմանա, թե իր բարեկամն ո՞վ է իրականում, ո՞վ է իր մասին մտածողն ու գործ անողը:

Մի խոսքով՝ այսպիսի վիճակ է այսօր մեր երկրում: Խիստ ոգևորված, աշխատանքային մթնոլորտ:

Եվ այս իրարանցման մեջ պարզապես մի շատ պարզ հարց է ծագում: Այս մեր քաղաքական գործիչներն ու քաղաքականությամբ զբաղվող այրերը չգիտեի՞ն, ինչ է, որ թանկացումներ են լինելու երկրում: Որ խորհրդարանը սիրով ու միակամ, հատկապես իշխանական մեծամասնությունը, իր կնիքը դնում էր Հարկային նոր օրենսգրքի վրա, չգիտե՞ր, որ այդ օրենսգրքով ավելացվում են որոշ համակարգային նշանակության ապրանքատեսակների հարկային դրույքաչափերը: Ինչպիսին են բենզինը, դիզելային վառելիքը, սեղմված գազը: Ի՞նչ է, նրանք չգիտեի՞ն, որ սրանք ապրանքատեսակներ են, որոնք մուլտիպլիկատիվ էֆեկտ են ունենալու ընդհանրապես մեր ողջ տնտեսության վրա: Նաև գյուղատնտեսության վրա, նաև արդյունաբերության վրա, տրանսպորտի վրա: Եվ այլն, և այլն: Ու բնականաբար գնաճը ափիդ մեջ է այլևս, էլ ի՞նչ կասկածես:

Կամ մեր պատգամավորները չգիտեի՞ն, ինչ է, որ այս հունվարից կիրառության մեջ է մտնելու ԵՏՄ մաքսային օրենսգիրքը, որը կրկին լուրջ թանկացումների դուռ է բացելու:

Եթե այս ամենը գիտեին ու իրենք իրենց ձեռքով վավերացրել են, ապա էլ ինչի՞ համար է այս աղմուկ-աղաղակը, ինչի՞ համար են այս թռչող հանձնարարականները, այս զայրալից մեկնաբանությունները:

Մնում է տակը մի քանի այլ ապրանքների գնաճ, որոնք էլ կապված են տեղական և միջազգային գործոնների հետ՝ միս, կարագ: Սրանց մասին էլ մեր պաշտոնյաները հրաշալիորեն տեղյակ են: Եվ եթե ցանկանում են շտկել վիճակը, կամ մեղմել այն, ապա կարող են հանգիստ, իրենց ամենօրյա աշխատանքային ընթացակարգով, իրենց ընձեռված գործիքներն օգտագործելով, համապատասխան պատասխանատու կառույցների միջոցով կարգավորել հարցը: Այն է՝ թույլ չտալ, որ օբյեկտիվ անհրաժեշտության հետ միասին նաև սուբյեկտիվ գործոնը դեր խաղա: Կամ որ նույնն է՝ թույլ չտան, որ կրակի վրա սեփական ձեռքերը տաքացնողներ լինեն մեր տնտեսվարողների մեջ:

Սա՛ է: Մտիր ցանկացած շարքային քաղաքացու տուն ու ընթացիկ թանկացումների պատճառների վերաբերյալ հարցդ տուր նրան: Պատասխանը կլինի միանշանակ ու ճշգրիտ:

Իսկ թե մեր քաղաքական վերնախավում ինչո՞ւ այս պարզ ճշմարտությունն ըմբռնել չեն կարողանում, կամ էլ չեն ուզում ըմբռնել, արդեն այլ հարց է:

Երևի ժամանակները մոտենում են, երբ ամեն մեկը պետք է կուրծք ծեծի ազգի փրկիչը լինելու դափնին իր գլխին տեղավորելու համար:

Մոտենում են ժամանակները, պարոնայք:

Շարունակությունը՝ «Փաստ» օրաթերթի այսօրվա համարում