Հանքերը Սյունիքից անպակաս են. «Փաստ»

«Փաստ» օրաթերթը գրում է.

Դեկտեմբերի 25–ին Սյունիքի մարզի Սիսիանի քաղաքապետարանի շենքում տեղի կունենան «Պրեմիում Մայնինգ» ՍՊԸ–ի կողմից ներկայացված Սյունիքի մարզի Սոֆլու–Լեռնաշեն բազմամետաղների հանքային դաշտում երկրաբանական ուսումնասիրության նախնական գնահատման հայտի վերաբերյալ հանրային երկրորդ քննարկումները:

Ինչպես հայտնի է, օգտակար հանածոներով ամենահարուստ մարզը Հայաստանում Սյունիքն է, և ով չի ալարում սկսում է այստեղ հանածոներ փնտրել:

Սոֆլու–Լեռնաշենի բազմամետաղների հանքային դաշտը գտնվում է Սյունիքի մարզի Սիսիանի ենթաշրջանում՝ Բարգուշատի լեռնաշղթայի հյուսիսային լեռնա–բազուկների սահմաններում: Տարածքը տեղադրված է 1915–2932 մ բացարձակ բարձրությունների վրա: Հանքային դաշտի տարածքին ամենամոտ գտնվող բնակավայրերն են Թասիկ, Բնունիս, Նժդեհ, Դաստակերտ, Շենաթաղ, Արևիս և Ցղունի գյուղերը, որոնց հեռավորությունը հանքային դաշտի տարածքից կազմում 1–10 կմ: Ծրագրի կազմման նպատակն է Սոֆլու–Լեռնաշեն բազմամետաղային հանքային դաշտի շուրջ 7014 հա տարածքի վրա կատարել համալիր երկրաբանահետախուզական աշխատանքներ՝ ուղեկցելով դրանք մակերևույթային լեռնային փորվածքների անցմամբ և հորատանցքերի հորատման աշխատանքներով, նմուշարկման զուգորդությամբ:

Վերոնշյալ աշխատանքների իրականացումից հետո, դրական արդյունքներ ստանալու դեպքում կառանձնացվեն հեռանկարային տեղամասեր, հանքային մարմիններ, դրանցում իրականացված լեռնային փորվածներից ստացված տվյալների հիման վրա կիրականացվի մանրակրկիտ երկրաբանահետախուզական աշխատանքներ, որոնց արդյունքում կկատարվի արդյունաբերական կարգերի պաշարների հաշվարկ:

Նախնական հաշվարկների համաձայն, երկրաբանական ուսումնասիրության աշխատանքների ընթացքում փոշու և վնասակար գազերի (ազատի օքսիդ, ածխածնի երկօքսիդ, մուր) առավելագույն կոնցենտրացիաները չեն գերազանցելու նորմատիվային փաստաթղթերով ամրագրված սահմանային թույլատրելի խտությունները: Չեն գերազանցելու, սակայն սա նախնական հաշվարկների համաձայն միայն:

Միաժամանակ նախագծում ասված է, որ բնապահպանական միջոցառումների համար նախատեսվում է մասնահանել 576 հազար դրամ:

Նախատեսվում է վերցնել շուրջ 450 երկրաքիմիական նմուշներ, որոնց սկզբնական քաշը կընդունվի 0,4–0,5 կգ: Նմուշները կմշակվեն ընկերության նմուշապատրաստման լաբորատորիայում: Նմուշներում քիմիական տարրերի պարունակությունները կորոշվեն «Լեռնամետալուրգիա» ՓԲԸ–ի քիմիական լաբորատորիայում:

Նախագծով նախատեսվում է հորատել 17 հորատանցք, որի համար 17 անգամ կկատարվի հորատող հաստոցի տեղակայում և ապատեղակայում՝ օգտագործելով համայնքներում գործող ավտոճանապարհները:

Շարունակությունը՝ «Փաստ» օրաթերթի այսօրվա համարում