Վիճակագրությունը աջ ղեկով մեքենաների օգտին է. «Փաստ»

«Փաստ» օրաթերթը գրում է.

2018 թ. ապրիլի 1–ից կարգելվի աջակողմյան ղեկային տեղաբաշխմամբ տրանսպորտային միջոցների ներմուծումը Հայաստան, իսկ հետագայում նաև շահագործումը: Մինչ այս արդեն շատ էր խոսվել, որ սա կառավարության վատագույն որոշումներից մեկը կլինի, սակայն ինչպես ժամանակը ցույց տվեց, այն ի վերջո առաջ մղվեց։

«Հայաստանի Հանրապետությունում աջակողմյան ղեկային տեղաբաշխմամբ տրանսպորտային միջոցների շահագործման կանոնակարգման մասին» անունը կրող նախագիծը օրեր առաջ հայտնվեց Իրավական ակտերի նախագծերի հրապարակման միասնական կայքում։ Շնորհիվ հրատապ իրազեկման՝ երեկվա դրությամբ նախագծին դեմ է քվեարկել 319, իսկ կողմ՝ 23 մարդ։ Ընդհանուր առմամբ որոշմանը դեմ է քվեարկել 97 տոկոսը։

Որոշումն ուժի մեջ կմտնի 2018 թ. ապրիլի 15–ից:

Նախագծից նաև հետևում է, որ ապրիլից հետո հնարավոր չի լինի վերավաճառել ավտոմեքենան, քանի որ նախագծում սրա հետ կապված սահմանափակումներ ևս կան. «Մինչև 2018 թ. ապրիլի 1–ը ներկրված տրանսպորտային միջոցները կարող են շահագործվել Հայաստանի Հանրապետությունում, սակայն 2018 թ. ապրիլի մեկից հետո ՀՀ ոստիկանության կողմից աջակողմյան ղեկային տեղաբաշխմամբ տրանսպորտային միջոցների վերահաշվառում չի իրականացվելու»:

Տրանսպորտի նախարարի մամուլի քարտուղար Անահիտ Առաքելյանը, սակայն, «Փաստի» հետ զրույցում հակառակն ասաց. «Դա արդեն Ոստիկանության գործն է լինելու։ Համապատասխան թույլտվությունից հետո վերահաշվառումը նորմալ գործընթացով կիրականացվի։ Իրականում մենք չենք արգելում աջ ղեկով ավտոմեքենա ունեցողներին շահագործել իրենց մեքենաները»։

Ճշգրտմանը, թե դա նշանակում է, որ ապրիլից հետո էլ մարդիկ իրենց մեքենան կարող են վաճառել և խնդիր չի առաջանա, նախարարի մամուլի քարտուղարն ասաց, որ համապատասխան թույլտվությունից հետո, այո՛, կարող են։

Այս օրերին արդեն իսկ պատրաստ են աջ ղեկային համակարգով տրանսպորտային միջոցների մասնակցությամբ Ճանապարհատրանսպորտային պատահարների՝ Ոստիկանության կողմից արված վիճակագրության նախնական տվյաները։

Ոստիկանության ԶԼՄ–ների հետ կապի, վերլուծության և լրատվության բաժնի պետ Էդգար Ջանոյանը «Փաստին» տեղեկացրեց, որ 2017 թ. 11 ամսվա կտրվածքով աջ ղեկով ավտոմեքենաների մասնակցությամբ գրանցվել է 309 ճանապարհատրանսպորտային պատահար, որի հետևանքով գրանցվել է 16 զոհ և 490 վիրավոր։ Ջանոյանի խոսքով, սակայն, սրանք աջ ղեկով ավտոմեքենաների մասնակցությամբ վթարներ են, բայց այս թվերի մեջ մտնում են և այն դեպքերը, երբ իրենք են մեղավոր եղել և հակառակը։ Ինչ վերաբերում է ընդհանուր դեպքերին, ապա այս տարվա նախնական տվյալներով գրանցվել է 3241 պատահար, 255 զոհ և 4774 վիրավոր։

Ստացվում է, որ ընդհանուր առմամբ ճանապարհային պատահարների միայն 10%–ի մասնակիցն է եղել աջակողմյան ղեկ ունեցող ավտոմեքենա։ Եվ դեռ հարց է, մեղավորն ով է եղել՝ աջակողմյան, թե ձախակողմյան ղեկ ունեցող ավտոմեքենայի վարորդը։ Բացի այդ էլ դեռ հստակեցված չէ, թե աջակողմյան ղեկ ունեցող ավտոմեքենայի մասնակցությամբ ինչպիսի վթար է տեղի ունեցել։

Նախագծում ասվում է, թե Հայաստանում աջակողմյան ղեկային տեղաբաշխմամբ տրանսպորտային միջոցների շահագործումը երթևեկության համար վտանգ է ներկայացնում, քանի որ աջակողմյան երթևեկության դեպքում տրանսպորտային միջոցի վարորդը ունի սահմանափակ տեսանելիություն. մասնավորապես, կանգառի կամ կայանման վայրից տրանսպորտային միջոցի շարժումն սկսելու, երթևեկության գոտի վերադասավորվելու, երթևեկության ուղղությունը փոփոխելու, վազանց կատարելու և այլ դեպքերում:

Սակայն նույն ձախակողմյան ղեկով ավտոմեքենան, իրավիճակից կախված, կարող է վերադասավորվելու, վազանց կատարելու և այլ դեպքերում նույնպես վթարի պատճառ հանդիսանալ։

Նշենք նաև, որ Հայաստանում աջ ղեկով ավտոմեքենաների թիվը կազմում է մոտավորապես 31–35 հազար, ինչից հետևում է, որ հաջորդ տարիներին նույնքան քաղաքացի որոշակի խնդիրների առաջ կարող է կանգնել իր ավտոմեքենայի շահագործման հարցում, հատկապես, որ նախագծում ասված է, որ հետագայում դրանց շահագործումն առհասարակ կարգելվի։

Շարունակությունը՝ «Փաստ» օրաթերթի այսօրվա համարում