Ռուբեն Եգանյան. «Այս տարի աշխատանքային միգրացիայի ծավալներն աճել են». «Փաստ»

«Փաստ» օրաթերթը գրում է.

Դեկտեմբերի 18–ը միգրանտների միջազգային օրն է: ՄԱԿ–ի գլխավոր ասամբլեայի կողմից օրվա ընտրությունը պայմանավորված է այն հանգամանքով, որ 1990 թ. այդ օրն ընդունել է «Բոլոր միգրանտ աշխատողների և նրանց ընտանիքների անդամների իրավունքների պաշտպանության» ՄԱԿ–ի կոնվենցիան:

Հայաստանը շարունակում է այն երկրների շարքին դասվել, որը դեռ չի հաղթահարել արտագաղթը: Աշխատանքային միգրացիան նույնպես դեռ մեծ տեմպերով շարունակվում է:

Հայաստանի բնակչության թիվը 2017 թ. 9 ամիսներին նախորդ տարվա ցուցանիշի համեմատ նվազել է 14000–ով և կազմել 2979600։ Իսկ 2015 թ. նույն ժամանակահատվածի համեմատ բնակչության թիվը նվազել է 24000–ով։ Սա Ազգային վիճակագրական ծառայության հրապարակած թվերն են:

Այդ տվյալներով՝ 9 ամիսներին 13500 մարդ մեկնել ու չի վերադարձել:

Ժողովրդագիր Ռուբեն Եգանյանը «Փաստ» օրաթերթի թղթակցի հետ զրույցում ասաց, որ դրական տեղաշարժ սպասելի չէր, քանի որ երևույթը ծնող պատճառները չեն վերացել:

«Դուք մեր երկրում ինչ–որ դրական փոփոխություն նկատում ե՞ք: Չի եղել, հետևաբար, փոփոխություն չէր կարող լինել»,– նկատեց նա:

Ռուբեն Եգանյանի խոսքով՝ արտագաղթի տեմպերը նախորդ տարիների համեմատությամբ գրեթե չի փոխվել: Ավելին՝ այս տարի դրսում աշխատելու համար ավելի շատ մարդ է մեկնել:

«Հիմքեր կան կարծելու, որ աշխատանքային միգրացիան այս տարի ծավալների աճ է ունեցել: Աշխատանքի համար մեկնողներն ավելի շատ են եղել, քան նախորդ տարի: Իհարկե, ներքին գործոնն իր ծանրակշիռ ազդեցությունն ունեցել է այս հարցում, բայց արտաքին գործոնն էլ պակաս դերակատարություն չի ունեցել: Աճը, մասնավորապես պայմանավորված է նրանով, որ միգրանտների վիճակը Ռուսաստանում մի քիչ հստակեցվել է՝ պայմանավորված ԵԱՏՄ–ի անդամակցության հետ: Այսօր կարելի է ունենալ աշխատանքային պայմանագիր և աշխատել»,– նշեց նա:

Ծնվածների թիվը նույնպես նվազել է: Եթե 2013–ի ինը ամիսներին ծնվածների թիվը եղել է 30497, 2016–ի ինը ամիսներին՝ 29868, ապա 2017–ին ծնվածների թիվը կազմել է 27665։ Եգանյանի դիտարկմամբ էլ ծնունդները պակասել են, մահացածների թիվն էլ ավելացել:

«Դրանց վրա ազդող պրոցեսների փոփոխություն չկա: Ծնունդների ավելացման հարցում էլ փոփոխություն սպասելի չի, քանի որ դրան նպաստող որևէ ծրագիր չկա»,– ասաց նա:

Սերժ Սարգսյանը հայտարարել էր, որ 2040 թվականին Հայաստանի բնակչության թիվը պետք է 4 միլիոնի հասնի: «Արմենիա» հեռուստատեսության տված հարցազրույցում նա մեկ անգամ ևս այս մասին նշել էր և այդ ուղղությամբ մշակվող ռազմավարությունն իրատեսական համարել: Ռուբեն Եգանյանը նույնն ասել չի կարող:

«Ինքը պետք է ասի, թե ինչի հաշվին պետք է մեր բնակչության թիվը 20 տարում մոտ 1,5 միլիոն մարդով ավելանա: Ես դժվարանում եմ այդ մասին ասել: Այս պահին մենք բնակչության հավելաճ ունենք՝ մոտ 12000–13000 մարդ, ունենք արտագաղթ՝ 30000–40000 մարդ գնում է, տարեկան մեր բացասական աճը կազմում է 20000–30000 մարդ: Հիմա, դա ո՞նց պետք է փոխվի»,– հարցրեց մեր զրուցակիցը:

Որպեսզի բնակչության թիվն ավելանա, ըստ Ռուբեն Եգանյանի, պետք է հեղափոխություն լինի:

«Երկրում հեղափոխական փոփոխություններ են պետք՝ և՛ տնտեսական առումով, և՛ քաղաքական առումով, և՛ սոցիալական ու բարոյահոգեբանական առումով: Երկիրը պետք է լծվի այդ գործին, որպեսզի բարձրանա ծնելիության ցուցանիշը: Երկրում պետք է գրավիչ պայմաններ ստեղծել, որ միգրանտների արտահոսքը ոչ միայն չդադարի, այլև՝ ներհոսք լինի: Դրա համար ահռելի ջանքեր են պետք: Ընդ որում, երաշխիք չէ, որ այդ ջանքերը կարող է բերել դրան: Ես առայժմ նման ջանքերի ցանկություն ու երաշխիքներ չեմ տեսնում»,– ընդգծեց նա:

Տեղեկացնենք նաև, որ ԱՎԾ զեկույցի համաձայն՝ միգրացիոն գործընթացներում այդ տարիներին ներգրավված և վերադարձած քաղաքացիներից 76%–ը տղամարդիկ են, կանայք՝ 24%: Իսկ չվերադարձած քաղաքացիների 88,1%–են տղամարդիկ, կանայք՝ 11,9% է: Ըստ զեկույցի, մեկնել և չեն վերադարձել գյուղաբնակների 50,3%–ը, իսկ քաղաքաբնակ չվերադարձածների ցուցանիշը 49,7% է:

Շարունակությունը՝ «Փաստ» օրաթերթի այսօրվա համարում