Իջևանում թալանել են «Արդշինբանկ»-ի մասնաճյուղը․ օպերատիվ խումբը բանկը հայտնաբերել է տակնուվրա եղած

Սեպտեմբերի 8-ին գողության դեպք է տեղի ունեցել Տավուշի մարզում։ Ժամը 21:00-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Իջևանի բաժնում օպերատիվ տեղեկություններ են ստացվել, որ Իջևան քաղաքի ժողովրդին հայտնի «Շատրվանների հրապարակում» գործող «Արդշինբանկ»-ի ապակյա դռները քաշել-բացելու միջոցով մուտք են գործել ներս և բանկը տակնուվրա են արել։

Ինչպես հայտնում է ֆոտոլրագրող Գագիկ Շամշյանը, նշված վայր է ժամանել ոստիկանության Իջևանի բաժնի հերթապահ խումբը՝ ավագ համայնքային ոստիկանի գլխավորությամբ։

Տեղում պարզվել է, որ ստացված տեղեկությունը հավաստի է, ինչից հետո դեպքի մասին ոստիկանության Իջևանի բաժնից տեղեկությունը փոխանցել են ՀՀ Քննչական կոմիտեի Տավուշի մարզային քննչական վարչություն, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ։

Դեպքի փաստով քննչական վարչությունում ՀՀ Քր․Օր․-ի 44-254 հոդվածի 3-րդ մասին 4-րդ կետով նախաձեռնվել է քրեական վարույթ, որի ընթացքում պարզվում են նաև դեպքի հանգամանքները և արդյոք գողը կամ գողերը այնտեղից գումար հափշտակել են, թե ոչ, ինչպես նաև ձեռնարկվում են անհրաժեշտ օպերատիվ-հետախուզական և քննչական համատեղ գործողություններ՝ կատարողի ինքնությունը պարզելու, նրան հայտնաբերելու ուղղությամբ։

Հետևեք մեզ՝ այստեղ