Վարչապետի պատասխանը չի ոգևորել Նարեկ համայնքի բնակիչներին. «Փաստ»

«Փաստ» օրաթերթը գրում է.

Արարատի մարզի Նարեկ համայնքի ղեկավար Գարուշ Հակոբյանը երկու անգամ նամակ է գրել վարչապետ Կարեն Կարապետյանին: Նամակների պատասխանն այդպես էլ չի գոհացրել նրան: Համայնքի Արեն Ստեփանյանի անվան դպրոցն անմխիթար վիճակում է գտնվում: Աշակերտներին բարեկեցիկ կրթություն ապահովելու հույսով նա գարնանը դիմել էր վարչապետին: Կառավարության ղեկավարից արձագանք չէր եղել: Աշնանը նույն հարցով կրկին նրան գրել է: Այս անգամ պատասխանել են, որ Նարեկի դպրոցը 2018–2020 թվականների դպրոցաշինության ծրագրերում կընդգրկվի: Պատասխանը, սակայն, չի ոգևորել համայնքի բնակիչներին:

«Բոլոր տեղերում էլ տեղյակ են, միշտ էլ նույն պատասխանն ենք ստացել»,– «Փաստ» օրաթերթի թղթակցի հետ զրույցում ասաց Հակոբյանը:

Դպրոցի շենքի արտաքին տեսքից դժվար է կռահել, թե 150 աշակերտներն ինչպիսի պայմաններում են սովորում: Խնդիրը պատերից ներս է բացահայտվում:

«Մեր գյուղին նայող չկա, տարիների ընթացքում խնդիրները կուտակվում են ու չեն լուծվում: Անտեսված ապրում ենք»,– ասաց բնակիչներից մեկը:

Պատմում են, որ 2009 թվականին մասնակի փոխվել են դպրոցի պատուհանները, իսկ 2011թ., դարձյալ մասնակի, տանիքն է բարեկարգվել: Վերանորոգման աշխատանքներն իրականացվել են պետական բյուջեի միջոցներով:

Դպրոցի առաջին հարկից արդեն հասկացվում է, որ այնտեղ առանց վախի նորմալ դաս անցկացնել գրեթե անհնար է: Երկհարկանի շենքի հիմնասյուներն առաջին հարկից մինչև վերջ լայն ճաքեր ունեն, ինչը թուլացնում է շենքի սեյսմակայունությունը: Լայն ճաքեր են առաջացել նաև դասասենյակների պատերին, ինչի պատճառով դրանք պինդ հպման դեպքում շարժվում են:

Դպրոցի սանհանգույցները գրեթե չեն գործում: Տարիներ առաջ վերանորոգվել են, բայց անհաջող, և այժմ չեն կարողանում պատշաճ օգտագործել:

«Սանհանգույցները մաքրելու համար ջուր ենք հավաքում: «Յոլա» ենք գնում»,– ներկայացրեց դպրոցի տնօրեն Անուշ Դավթյանը:

Դասասենյակների քանդված հատակները սեփական բյուջեով նորոգել են: 1984 թվականից շահագործման հանձնված դպրոցն այսօր վերանորոգման կարիք ունի:

«Այս տարիների ընթացքում մուտքի երկու դուռ է փոխվել: Մասնակի՝ պատուհան և տանիք: Ուրիշ աշխատանք չի արվել»,– ասաց Դավթյանը:

Կրթօջախն էլեկտրական սալիկներով է տաքացվում: Վստահեցնում են՝ կարողանում են դասասենյակներում նորմալ ջերմաստիճան ապահովել:

Մարզադահլիճում հնարավոր չէ դաս անցկացնել, ոչ մի պայման չկա: Ֆիզկուլտուրայի դասերը շատ թե քիչ բնականոն հունով անցնում են միայն բարենպաստ եղանակային պայմանների դեպքում:

Համայնքապետարանի բյուջեով շենքին նոր շունչ տալ չեն կարող՝ պնդեց Գարուշ Հակոբյանը: Բյուջեն սուղ է, շռայլություններ իրենց թույլ տալ չեն կարող:

«19 միլիոն դոտացիա են տալիս, 50%–ը մանկապարտեզին են հատկացնում: Հարկերը ևս շատ քիչ են՝ 4,5 միլիոն հողի հարկն է, 3 միլիոնը՝ գույքահարկը»,– հայտնեց Հակոբյանը:

Նարեկի մանկապարտեզն էլ ոչնչով չի տարբերվում դպրոցից: Կարեն Կարապետյանին ուղղված նամակում նաև այս խնդիրն է բարձրացվել: 90 փոքրիկ անբարեկարգ պայմաններում են նախադպրոցական կրթություն ստանում:

«Նույն վիճակն է, ինչ որ դպրոցում: Ֆինանսավորում չունեմ, գումարը քիչ է, չի բավարարում»,– նշեց համայնքի ղեկավարը:

Մանկապարտեզի բակն ու այնտեղ հասցնող ճանապարհը սարսափելի վիճակում է: Ճանապարհի փոսալցման աշխատանքներ կատարվել են, բայց խնդիրը դրանով չի լուծվել: Չնայած խոստումներին՝ Նարեկի բնակիչները հույս չունեն, որ իրենց երեխաների համար ժամանակակից պայմաններ կստեղծվեն:

 Շարունակությունը՝ «Փաստ» օրաթերթի այսօրվա համարում