Անուշ Սեդրակյան. «Շատերը դեռևս չեն ուզում ընդունել մեր միակուսակցական համակարգի փաստը». «Փաստ»

«Փաստ» օրաթերթը գրում է.

Քաղաքական վերլուծաբան Անուշ Սեդրակյանի դիտարկմամբ Հայաստանի և Եվրամիության համագործակցության համաձայնագրի ստորագրումից հետո թեև թվում է և՛ ընդդիմություն, և՛ իշխանություն թևերում ոչինչ էլ չի փոխվել, սակայն հեռանկարային առումով բավականին փոփոխություններ կան, որոնք անտեսել չի կարելի: Նրա կարծիքով, ինչքան էլ երկար տևի, այնուամենայնիվ, հայկական նավը կհասնի Եվրոպա, որի համար հստակ նախադրյալներ կան:
«Այսօր աշխարհաքաղաքական վերադասավորումներում գազային և նավթային տերությունների դոմինանտության հարցի կարևորությունը սկսել է թուլանալ: Բացի այդ, սկսել են թուլանալ և փլվել նաև դիկտատուրաները: Սա նշանակում է, որ այն այլևս ակտուալ չէ: Հայաստանը չի կարող այս ամենից դուրս մնալ: Եվ քանի որ դիկտատուրա «պահելը» թանկ հաճույք է, ուստի ստիպված է լինելու գնալ ժողովրդավարության ճանապարհով»,– ասաց Ա. Սեդրակյանը:
Խոսելով Եվրամիության հետ ստորագրված համաձայնագրի դրույթները չպահպանելու մասին, նա նշեց, որ այդ դեպքում Հայաստանը կդառնա պայմանագիր խախտող սուբյեկտ, ինչը կվատթարացնի եվրամիության հանրության հետ հարաբերությունները:
«Եվ եթե մինչև ստորագրումը կարելի էր ռեֆորմների և ժողովրդավարության իմիտացիա ստեղծել, ապա հիմա այն չի կարող մնալ իմիտացիայի մակարդակի: Դա հասկանում են բոլոր քաղաքական ուժերը և, նոր իրավիճակից ելնելով, փորձում են հավասարակշռել իրենց հնարավորությունները»,– ասաց Ա. Սեդրակյանը:
Վերլուծաբանի կարծիքով ստեղծված իրավիճակի պայմաններում ՀՀԿ–ն փորձում է ցույց տալ, թե եվրոպական արժեքների միակ և հնարավոր ժառանգորդներն իրենք են, ինչը բավականին վտանգում է եվրաինտեգրման իրականացմանը, քանի որ բոլորն էլ հասկանում են, որ նույն իշխող քաղաքական ուժը գտնվում է կոռուպցիոն գործընթացների կիզակետում, իսկ դրա դեմ պայքարը Եվրամիության առաջին պահանջն է:
Ինչ վերաբերում է ընդդիմադիր քաղաքական ուժերի վարքագծին, Ա.Սեդրակյանի կարծիքով «Ելքի»՝ ԵԱՏՄ–ից դուրս գալու նախաձեռնությունը թեև համահունչ է եվրաինտեգրման գաղափարին, սակայն այլևս ակտուալ չէ, իսկ «և՛, և՛»–ի քաղաքականությունը Հայաստանի համար կարող է ընդամենը միջանկյալ կարգավիճակի էֆեկտ ունենալ:
«Այսինքն, Հայաստանին տվել են երկու հնարավորություն, դրել են մի միջանկյալ իրավիճակի մեջ և հիմա արդեն Հայաստանն ինքը պետք է որոշի, թե իրականում ուր կտանի իր իրական քաղաքականության վեկտորը և որ պայմանագիրը կդառնա ձևական»,– ասաց Ա. Սեդրակյանը:
Խոսելով ընդդիմության պասիվության և փաստացի խաղից դուրս իրավիճակում հայտնվելու մասին, վերլուծաբանը նշեց, որ դա պայմանավորված է նրանով, որ մինչ այս նրանց քաղաքական գործունեությունը կառուցվում էր միայն մեկ՝ ռուսամետության ուղղությամբ:
«Եվ՛ ՀԱԿ–ն էր այդ կարգավիճակում, և՛ ԲՀԿ–ն, և՛ «Ազգային վերածնունդը», որոնք ցայսօր իրենց քաղաքականությունը կառուցել էին եվրոպական պայմանագրերի մեջ Հայաստանի չմասնակցության վրա: Ու հիմա արդեն կա մասնակցություն: Եվ բոլորը պետք է վերանայեն իրենց քաղաքականությունը»,– ասաց Ա. Սեդրակյանը:
«Մենք արդեն հանգել ենք միակուսակցական համակարգի, բայց շատերը դեռևս չեն ուզում ընդունել այդ փաստը: Ստացվում է, որ ֆորմալ առումով կան կուսակցություններ, տարբեր թիմեր, այսինքն՝ թղթի վրա կան տարբերություններ, բայց իրական քաղաքական դաշտում՝ դրանք չկան: Ստացվում է, որ հիմա ունենք նույն ամբիցիաներով, բայց տարբեր տնտեսական լծակներ ունեցող մարդկանց խմբեր, որոնք կոչվում են կուսակցություններ, բայց դրանք ծառայեցնում են ընդամենը իրենց ամբիցիաների բավարարմանը»,– ասաց Ա. Սեդրակյանը:

Շարունակությունը՝ «Փաստ» օրաթերթի այսօրվա համարում