Երեխաների 49%–ը բռնության ենթարկվելու դեպքում չգիտի՝ ուր դիմել. «Փաստ»

«Փաստ» օրաթերթը գրում է.

Նոյեմբերի 20–ին աշխարհում նշվում է Երեխաների համաշխարհային օրը, որը նաև «Երեխայի իրավունքների մասին» կոնվենցիայի ընդունման օրն է:

Երեխաների իրավունքների պաշտպանության ոլորտում անելիքները շատ են՝ փաստում են երեխաների իրավունքների պաշտպանությամբ զբաղվող հասարակական կառույցների ղեկավարները:

«Մանկական զարգացման հիմնադրամ» ՀԿ նախագահ Լուսինե Սիմոնյանը «Փաստ» օրաթերթի թղթակցի հետ զրույցում ասաց, որ երեխաների իրավունքների պաշտպանության ոլորտում մի շարք խնդիրներ դեռ լուծված չեն:

«Եթե խոսում ենք երեխաների 42% աղքատության, 11% հարկադիր աշխատանքի և աշխատանքի պատճառով երեխաների կրթությունից դուրս մնալու մասին, եթե մենք խոսում ենք զարգացման խնդիրներ ունեցող երեխաների կրթությունից դուրս մնալու մասին, ուրեմն՝ անելիքներ դեռ կան»,– ասաց նա:

Սիմոնյանի խոսքով՝ երեխան պետք է բոլոր իրավունքներից հավասարապես օգտվի՝ և՛ կրթական, և՛ առողջապահական:

«Պետք է ունենանք շատ հստակ միջգերատեսչական համագործակցություն, պետական խիստ ռազմավարություն, որը ներգրավում է թե՛ միջազգային կառույցների, թե՛ տեղական կազմակերպությունների, թե՛ պետական մարմինների՝ երեխաներին ուղղված ծրագրերը»,– նկատեց մեր զրուցակիցը:

Այսօր Հայաստանում մինչև 7 տարեկան երեխաները իրավունք ունեն օգտվել բուժման պետպատվերի ծրագրից: Երեխաների իրավունքների պաշտպանությամբ զբաղվողները հարց են հնչեցնում՝ արդյոք այդ ծրագիրն ամբողջությամբ է կիրառվում: Լուսինե Սիմոնյանն այստեղ անհրաժեշտ է համարում նաև ծնողների իրազեկվածության մակարդակի բարձրացումը:

«Շատ դեպքերում մենք ունենք կարծրատիպային մտածողություն: Ունենք նաև որակյալ ծառայությունների խնդիր: Ծնողները շատ դեպքերում չեն էլ պատկերացնում, որ առանց որևէ գումար տալու կարող է իրենց երեխան շատ ավելի լավ ծառայություն ստանալ»,– նշեց նա:

Սիմոնյանը նշեց, որ հաշմանդամության կարգի ձեռք բերման հետ կապված լուրջ խնդիրներ կան:

«Մարզում կան հաշմանդամություն ունեցող երեխաներ, որոնց ծնողների համար նույնիսկ խնդիր է Երևան հասնելը և նրանց համար կարգ ձևակերպելը: Այդ երեխաներն անգամ այդ թոշակը չեն կարողանում ստանալ, որովհետև կարգ չունեն»,– ընդգծեց նա:

Անդրադառնալով ներառական կրթական համակարգում իրականացվող բարեփոխումներին, նա մի շարք խնդիրներ առանձնացրեց:

«Սկսած մասնագիտական ներուժից մինչև մեթոդաբանական մոտեցումներ խնդիրներ կան: Որոշ բաներ իրականացվում են, բայց դրանք մեր դիտարկմամբ դեռևս սաղմնային փուլում են»:

Նրանց դիտարկմամբ՝ երեխայի համար ամենակարևոր հաստատությունը մանկապարտեզն է: Նրա խոսքով՝ մանկապարտեզները փորձում են օրենքով սահմանված չափորոշիչներով գործել, բայց կրկին չլուծված հարցեր են մնում:

«Մասնագետների խնդիր կա, կան աշխատակիցներ, ովքեր կարծրատիպային մտածողություն ունեն»,– նկատեց Սիմոնյանը:

Ի դեպ, Հայաստանում բազմաթիվ համայնքներ կան, որտեղ մանկապարտեզ չկա, երեխաները զրկված են նախադպրոցական կրթությունից:

Տեղեկացնենք, որ «World Vision» և «Save the Children» կազմակերպությունների անցկացրած հարցումներով՝ հարցված երեխաների 49%–ի կարծիքով՝ երբ իրենք բռնության են ենթարկվում, չգիտեն ուր դիմել: 11%–ն էլ դպրոց չի հաճախում, որովհետև աշխատում են և օգնում ծնողներին: Երեխաների 86%–ն էլ գտնում է, որ իրենց իրավունքների ոլորտում կառավարությունն անելիքներ ունի: Իսկ հարցված երեխաների 84%–ը դրական է տրամադրված ապագայի նկատմամբ:

Հավելենք նաև, որ ՄԱԿ–ի Մանկական հիմնադրամի (ՅՈՒՆԻՍԵՖ) Երեխաների պաշտպանության համաշխարհային օրվա զեկույցում նշվում է, որ աշխարհում կտրուկ ավելացել են 180 միլիոն երեխաների՝ աղքատության մեջ ապրելու, բռնության հետևանքով զոհվելու դեպքերը:

Շարունակությունը՝ «Փաստ» օրաթերթի այսօրվա համարում