Դասագրքային ճշմարտություններով պետություն չեն կառուցում. «Փաստ»

«Փաստ» օրաթերթը գրում է.

Նոյեմբերի 16–ին ԱԺ–ում շարունակվում էր 2018 թ.–ի բյուջեի նախագծի քննարկումը: Հերթը ելույթներինն էր, որի ժամանակ ՀՀԿ–ականները բավականին պասիվ էին, իսկ «Ծառուկյան» դաշինքի պատգամավորները հստակ օրինակներով հիմնավորում էին, թե ինչու այն իրենց համար ընդունելի լինել չի կարող:

Պատգամավոր Նաիրա Զոհրաբյանն, օրինակ, անդրադառնալով այն կետերին, թե ինչու պետք է դեմ քվեարկել 2018 թ–ի բյուջեին, նշեց, որ պետական ծառայողների օպտիմալացումն ամենևին էլ չի խանգարել մեքենաներ և սարքավորումներ ձեռք բերելու և պահպանելու 2017 թ.–ի 17, 4 միլիարդ դրամի ծախսը գրեթե կրկնապատկելու և 2018 թվականին այն 32,4 միլիարդ դրամի հասցնելու համար: Բյուջեն ընդունելի չէ «Ծառուկյան դաշինքի» պատգամավորների համար, քանի որ կրճատվել է նաև գիտության և կրթության ֆինանսավորման ծախսերը:

ԱԺ փոխնախագահ Միքայել Մելքումյանն էլ բյուջեի նախագծին անդրադառնալով բավականին սուր քննադատական գնահատականներ հնչեցրեց կառավարության հասցեին նշելով, որ այն կազմված է դասագրքային ճշմարտությունների վրա, որը սակայն չի արտացոլում երկրի իրական պատկերը:

«Կա ճահճային կամ գերեզմանային կայունություն, բայց դա չի նշանակում, որ դա է ընդունելի ճանապարհը: Եվ հաշվի առնելով բոլոր հանգամանքները, գործոնները և դիտարկումները «Ծառուկյան» դաշինքը չի կարող կիսել այս բյուջեի իրականացման քաղաքական պատասխանատվությունը և մենք միահամուռ դեմ ենք քվեարկելու բյուջեի նախագծին»,– ասաց Մ. Մելքումյանը:

Նա իր ելույթում նշել էր նաև, որ ներկա կառավարությունը պատմական շանս ուներ կիսանախագահական կառավարման համակարգի պայմաններում իր վերջին արդյունավետ քայլը կատարելու, բայց ցավոք այն քայլերը, որոնք ներկայացվեցին, իրենց խմբակցության անդամների սպասումները չարդարացրեցին:

«18 թվականից հետո մենք կունենանք նոր քաղաքական իրավիճակ, երբ երկրի ղեկավարման ղեկը կստանձնի վարչապետը: Եվ այն ժամանակ մենք այլևս չեն քննադատի վարչապետին, այլ կունենանք երկրի ղեկավար–վարչապետ»,– ասաց Մ. Մելքումյանը:

ՀՅԴ խմբակցությունից Աղվան Վարդանյանի ելույթը, որը նման էր քաղաքավարական ճառի նշեց, որ կառավարության կողմից ներկայացված բյուջեն ընդունելի է իրենց քաղաքական թիմի համար, բայց կառավարությունից պահանջելու են բյուջեի սուղ միջոցներն առավել արդյունավետ և նպատակային ծախսել, ինչը ոչ միայն սոսկ պահանջ է, այլև վճռական պահանջ:

ՀՅԴ–ականի ելույթն, ընդհանուր առմամբ հիշեցնում էր խորհրդային տարիների զեկույց, որի ժամանակ նա խորհուրդ տվեց կառավարությանը, որ նպատակների իրականացման ճանապարհին պետք չէ նայել, թե կողքից ով ինչ է ասում, քանի որ ընդդիմախոսների գործը հենց դա է լինելու:

«Դրա փոխարեն պետք է կտրուկ բարեփախումներ իրականացնել, ինչը այս կառավարության հնգամյա ծրագրի նպատակներին հասնելու երաշխիք է»,– ասաց Ա. Վարդանյանը:

Նա նաև կոչ արեց ԱԺ դահլիճից ոչ թե հուսահատություն, այլ լավատեսություն փոխանցել հանրությանը: Բյուջեամերժ մթնոլորտը որոշ չափով մեղմելու համար ելույթ ունեցավ նաև ՀՀԿ խմբակցության ղեկավար Վահրամ Բաղդասարյանը, ով նշեց, որ պետք է ոչ թե խոչընդոտել, այլ օգնել պետական կառույցների արդյունավետ աշխատանքին, իսկ հատվածային մոտեցումները ընդունելի չեն նրանց համար:

Խոսելով մոնոպոլիաների մասին, նշեց, որ արհեստականորեն ձևավորված մոնոպոլացված կառույցները պետք է արմատախիլ արվեն, բայց առաջին հերթին պետք է յուրաքանչյուրն ինքն իրեն հարց տա, թե ինքն ինչքանով է նպաստել երկրում կոռուպցիոն ֆոնի ձևավորմանը:

«Այն հայտարարությունները, որոնք պոպուլիստական են, ոչ օբյեկտիվ են և անիրատեսական են չեն կարող ընդունելի լինել, քանի որ դրանով քաղաքական փոքրամասնությունը ցանկություն է հայտնում քաղաքական մեծամասնությանը ղեկավարելու, բայց այդպես չի կարող լինել: Դրա ժամանակը 2022 թվականն է, երբ երկրում նոր ԱԺ ընտրություններ տեղի կունենան»,– ասաց Վ. Բաղդասարյանը:

«Ելք» խմբակցությունն ավելի վաղ էր հայտարարել, որ դեմ է քվեարկելու բյուջեի նախագծին, քանի որ այնտեղ չկա ոչ մի կետ, որն իրենց համար կարող էր ընդունելի լինել:

Շարունակությունը՝ «Փաստ» օրաթերթի այսօրվա համարում