«Մայրություն տիեզերքում». Արդեն 2031 թվականին առաջին երեխաները կարող են ծնվել Լուսնի կամ Մարսի վրա

Տիեզերքում երեխա ունենալու գաղափարը հնչում է որպես նոր գիտաֆանտաստիկ բլոկբաստերի սյուժե։ Սակայն գիտնականները պնդում են, որ մարդկությունը գտնվում է նոր դարաշրջանի շեմին, երբ տիեզերքում վերարտադրությունը կդառնա իրականություն։

Վերջերս անցկացված ուսումնասիրության մեջ փորձագետների միջազգային խումբը նշել է, որ Երկրից դուրս պտղաբերության հարցերը պետք է առաջնահերթություն լինեն։ «Տիեզերքում վերարտադրության խնդիրը այլևս տեսական չէ, այլ չափազանց գործնական է»,-ասում է NASA-ի դոկտոր Ֆաթի Կարուիան, որի խոսքերը փոխանցում է Daily Mail-ը։

Ինչու է սա կարևոր

Մարսի գաղութացման և Լուսին երկարաժամկետ առաքելությունների ծրագրերը պահանջում են զրոյական ձգողականության, տիեզերական ճառագայթման և սթրեսի ազդեցության լիարժեք ըմբռնում ապագա ծնողների առողջության և սաղմերի զարգացման վրա։ Արդեն հայտնի է, որ ճառագայթումը կարող է լուրջ զարգացման խանգարումներ առաջացնել նորածինների մոտ, և նրանց մարմինները կարող են չհարմարվել Երկրի ձգողականությանը։

«Տիեզերքում մարդկային ներկայության ընդլայնման հետ մեկտեղ վերարտադրողական առողջության հարցերը այլևս չեն կարող մնալ քաղաքական կույր կետ»,-ընդգծում է Կարուիան։

Իրականությունն ընդդեմ Հոլիվուդի

1979 թվականի «Լուսնային մրցավազք» ֆիլմի նման ֆիլմերը տիեզերքում սեքսը և հղիությունը հեշտ են դարձնում։ Իրականում ֆիզիկական և կենսաբանական մարտահրավերները հսկայական են. ցածր ձգողականությունը, տիեզերական ճառագայթումը և սթրեսը կարող են ազդել հորմոնների, պտղաբերության և պտղի առողջության վրա։

Այնուամենայնիվ, գիտնականները պնդում են, որ սերմնահեղուկը և ձվաբջիջները կարող են տեղափոխվել տիեզերք հետագա արտամարմնային բեղմնավորման համար։ Միջազգային տիեզերական կայանն արդեն ունի սարքավորումներ կենսաբանական փորձերի համար, որոնք նման են Երկրի արտամարմնային բեղմնավորման լաբորատորիաներում կատարված փորձերին։

Առաջին երեխան տիեզերքում. Ե՞րբ սպասել այս իրողությանը

Կանխատեսումները ենթադրում են, որ առաջին երեխան կարող է ծնվել տիեզերքում արդեն 2031 թվականին։ Իսկ երկարաժամկետ հեռանկարում՝ մինչև 2050 թվականը, եվրոպացի գիտնականները պատկերացնում են լիարժեք լուսնային գաղութներ, որտեղ ընտանիքները կարող են ապրել և երեխաներ մեծացնել։

«Լուսնի վրա առաջին բնակիչները կարող են հայտնվել արդեն 2030 թվականին՝ վեցից տասը գիտնականներ, ինժեներներ և մասնագետներ։ Մինչև 2040 թվականը կլինի մոտ 100, իսկ դարի կեսերին ընտանիքներ կարող են նույնիսկ ձևավորվել»,-ասում է պրոֆեսոր Բեռնարդ Ֆոյինգը՝ ESA-ի «Լուսնային գյուղ» ծրագրի դեսպանը։

Տիեզերական գաղութացումը բացում է ոչ միայն նոր հորիզոններ մարդկության համար, այլև ընտանիքի, մայրության և ծնող լինելու վերաբերյալ բոլորովին նոր հեռանկար։