Միքայել Մելքումյանի ժպիտը կապ չուներ վիճակագրության մեթոդիկայի հետ. «Փաստ»

«Փաստ» օրաթերթը գրում է.

Չորեքշաբթի օրը՝ պատգամավորներ–կառավարություն հարց ու պատասխանի ժամանակ, ԱԺ «Ելք» դաշինքի պատգամավոր Մանե Թանդիլյանը ՀՀ և ՌԴ վարչապետների կողմից հնչեցված արտահանման և ներմուծման տվյալների բավականին մեծ տարբերության մասին հարց ուղղեց, որին ի պատասխան փոխվարչապետ Վաչե Գաբրիելյանն ասաց, որ տարբեր երկրների կողմից ներկայացված վիճակագրական տվյալները կարող են չհամընկնել, ինչը նորմալ երևույթ է, որը կարող է պայմանավորված լինել մեթոդաբանությունների տարբերությամբ:

Հիշեցնենք, որ ՀՀ և ՌԴ վարչապետների և կառավարությունների անդամների հանդիպման ժամանակ ՀՀ վարչապետ Կարեն Կարապետյանն ասել էր, որ 2017–ի առաջին 8 ամիսներին Հայաստանի և Ռուսաստանի միջև ապրանքաշրջանառությունն աճել է 23,5%–ով: Արձագանքելով ՀՀ վարչապետի հնչեցրած թվին` ՌԴ վարչապետ Դմիտրի Մեդվեդևն ասել էր, որ իր ունեցած թվերն ավելի լավն են՝ 30%, և խորհուրդ տվեց Կ. Կարապետյանին այսուհետ իր ներկայացրած ցուցանիշներն օգտագործել:

ԱԺ–ում նշված հարցի պարզաբանման ժամանակ ԱԺ փոխնախագահ, մասնագիտությամբ տնտեսագետ Միքայել Մելքումյանը բավականին բազմանշանակ ժպտաց, որը «Փաստի» աչքից չվրիպեց, քանի որ բարձրակարգ տնտեսագետի «ժպիտը» կարող էր իր մեջ բազում ենթատեքստեր պարունակել:

«Փաստը» նրանից փորձեց պարզել, թե Վ. Գաբրիելյանի կողմից հնչեցված մեթոդաբանության տարբերությա՞ն, թե, ընդհանրապես, Հայաստանի վիճվարչության կողմից հրապարակվող թվանկարչությամբ էր պայմանավորված իր այդ բազմանշանակ ժպիտը, ինչին Մ. Մելքումյանը պատասխանեց.

«Իմ ժպիտը որևէ կապ չուներ այդ հարցի հետ, բայց կոնկրետ այդ հարցի վերաբերյալ ասեմ, որ կարող է այնպես լինել, որ Ռուսաստանի Դաշնությունը մի մեթոդիկայով է հաշվարկներ անում, մենք՝ ուրիշ: Մի օրինակ բերեմ. անցյալ տարվա հոկտեմբեր ամսից սկսած մեր գյուղատնտեսության ոլորտում լուրջ անկումներ գրանցվեցին կարտոֆիլի, հացահատիկի և այլ գյուղմթերքների մասով: Դա պայմանավորված էր նրանով, որ մեթոդիկան փոխվեց: Այսինքն, մինչև այդ այնպես էին հաշվարկում, որ ուռճացված թվեր էին ներկայացվում, հետո մեթոդիկան փոխեցին, ուրիշ թվեր ստացվեց: Իհարկե, չի կարելի ասել, որ ամեն ինչ իր տեղն ընկավ և ներկայացվող թվերն արտահայտում են իրական պատկերը, բայց այն որոշ չափով փոխվել է: Նույնը կարելի է ասել համախառն ներքին արդյունքի մասին և այլն, այսինքն` տնտեսագիտական առումով պետք է նայել, թե այդ հաշվարկների համար ինչ ցուցանիշներից են օգտվում՝ հարկերը մտնո՞ւմ են այդ հաշվարկների մեջ, թե՝ ոչ: Տնտեսագիտության մեջ շատ ցուցանիշներ կան, որոնց փոփոխության հետևանքով կարող ենք տարբեր պատկեր ստանալ, բայց այդ շեղումն էլ պետք է չափ ունենա»,– ասաց Մ. Մելքումյանը:

ԱԺ պատգամավոր Մանե Թանդիլյանը «Փաստի» հետ զրույցում ասաց, որ երկու երկրների ղեկավարները երբ խոսում են նույն երևույթի մասին, ապա արդյունքները չեն կարող իրար համարժեք չլինել:

«Այսինքն, մի կողմից արտահանում, մյուս կողմից ներմուծում և հակառակը: Ինձ համար տարօրինակ էր սխալի այդ չափը, քանի որ հարց է ծագում, թե ում կողմից ներկայացված թվերն են արժանահավատ: Այս դեպքում մեր թվերն ավելի ցածր էին, քան ռուսական կողմի ներկայացրած թվերը, չնայած ես չեմ կարող վստահությամբ խոսել նաև դրանց թվերի մասին: Պետք է ընդամենը փաստել, որ կա տարբերություն և պետք է պարզաբանվի, թե որն է այդ սխալի պատճառը: Կարևոր է պարզել նաև մեր վիճակագրական թվերի արժանահավատության աստիճանը, քանի որ առջևում պետական բյուջեի քննարկումներն են, և եթե այդ ժամանակ տոկոսներ են ներկայացվում, ապա պետք է հասկանալ, թե դրանք որքանով են արժանահավատ: Կարևոր է նաև հասկանալ, թե նման հաշվարկներ կատարելու ժամանակ ինչ թվերից են օգտվում, ովքեր են ներկայացնում այդ թվերը, և արդյոք այն թվերը, որոնք տրամադրվում են վիճակագրական ծառայությանը, արտացոլո՞ւմ են իրական պատկերը: Այսինքն, հարցականի տակ դնելով պետական կառույցներից շատ–շատերի աշխատանքը, կարելի է ասել, որ վիճակագրական ծառայությունը նույնպես բացառություն չի կարող լինել»,– ասաց ԱԺ պատգամավորը:

Շարունակությունը՝ «Փաստ» օրաթերթի այսօրվա համարում