Ընտանեկան բռնության կանխարգելման մասին օրինագծում կետեր կան, որոնք մեր հասարակության մենթալիտետին հարիր չեն. կարծիքներ. «Փաստ»

«Փաստ» օրաթերթը գրում է.

Ընտանեկան բռնության կանխարգելման մասին օրինագիծը հասարակության տարբեր շերտերում դեռ շարունակում է քննարկվել: Հարցի շուրջ տարակարծություններ կան: Մի մասի կարծիքով՝ օրենքը կարող է զսպող հանգամանք լինել բռնությունների հանդեպ, մյուս մասն էլ վստահ է՝ հայերն ավանդական մշակույթի կրողներ են, եթե օրենքն ընդունվի, շատ հայկական ընտանիքներ կքանդվեն:

Ազգագրագետ Սվետլանա Պողոսյանը «Փաստ» օրաթերթի թղթակցի հետ զրույցում նշեց, որ ընտանեկան բռնության կանխարգելման դեմ օրենքի անհրաժեշտություն չի տեսնում: Նրան զարմացնում է, որ առանձնացնում են բռնության տեսակը և հատուկ նախագիծ են մշակում հենց ընտանեկան բռնություն անունով: Ըստ ազգագրագետի՝ օրենսգրքում դրա վերաբերյալ կետեր կան, անհրաժեշտության դեպքում այն կիրառվում է:

«Տպավորություն եմ ստանում, որ միտումնավոր են ընտանեկան բռնությունն առանձնացնում: Ոչ թե մեր հասարակությունը դրա կարիքն ունի, այլ կարծես, այդ օրենքը պարտադրված լինի: Պատճենելով եվրոպական նախագծերը՝ մենք շատ լուրջ սխալ թույլ կտանք: Ես չեմ իդեալականացնում հայկական ընտանիքները, ուղղակի պարզ ճանապարհ կա այդ բռնությանը վերջ դնելու՝ մարդիկ ամուսնալուծվում են: Ընտանիքի անդամների մեջ լրացուցիչ կոնֆլիկտներ ստեղծելով ճանապարհ չեն հարթում խնդիրների լուծման ուղղությամբ»,– նկատեց մեր զրուցակիցը:

Ազգագրագետի կարծիքով՝ օրենքի ներդրմամբ ամուսին–կին, ծնող–երեխա խաթարված հարաբերությունները դեպի լավը չեն գնա: Նա մտավախում է՝ հանկարծ «աչքը շինելու փոխարեն, ունքն էլ չքանդվի»:

«Ավելի շատ բաժանված ընտանիքներ կլինեն: Մենք ընտանեկան ավանդույթները պահելու խնդիր ունենք: Օրենքը ընտանիքի հզորացման ուղի չէ: Այնտեղ չկան ընտանիքն ամրացնելու կետեր և կան բաներ, որոնք մեր հասարակության մենթալիտետին հարիր չեն: Եթե օրենք ենք ընդունում, պետք է հաշվի առնենք հասարակության պատրաստվածությունը»,– մատնանշեց նա:

Սվետլանա Պողոսյանը մեկ այլ մտահոգություն ունի:

«Ոստիկաններին էլ այդքան մեծ լիազորություններ չպետք է տալ: Ոստիկանները հաճախ բռնությունն են որպես հարցի լուծման եղանակ համարում: Մենք լրացուցիչ հնարավորություն ենք նրանց տալիս մտնել այդ ամրոցը՝ ընտանիք»,– նշեց նա:

Երգիչ–երգահան Արտավազդ Բայաթյանի կարծիքով՝ կնոջն ու երեխային բռնությունից պաշտպանելու համար օրենք ունենալը լավ գաղափար է, սակայն, հարց է՝ այն ինչպես է գործելու:

«Անընդհատ օրենք են բերում դեմ տալիս, որի մասին ոչ ոք չգիտի: Հասարակությունը տեղյակ չէ բռնությունից պաշտպանվելու վերաբերյալ կետերից: Մեզ անընդհատ վախեցնում են, որ եվրոպայում այսպես է, այնպես է: Հասարակությունը պետք է պատրաստվի դրան»,– տեսակետ հայտնեց Բայաթյանը:

Երևանի տիկնիկային թատրոնի գեղարվեստական ղեկավար Ռուբեն Բաբայանն այսօր բռնությունից բացի հայկական ընտանիքի ամրությունը խարխլող մեկ ուրիշ փաստ է մեջբերում: Նրա խոսքով՝ արտագնա աշխատանքն այսօր ընտանիքներ է քայքայում:

«Երեխաները զրկված են լինում հորը տեսնելուց, նրա կողմից դաստիարակություն ստանալուց: Կինը երկար ժամանակ ապրում է առանց ամուսնու, սա շատ վատ է: Այստեղ շատ ավելի մեծ վտանգներ կան, քան օրենքում»,– շեշտեց Բաբայանը:

Շարունակությունը՝ «Փաստ» օրաթերթի այսօրվա համարում