ՏԻՄ ընտրություններ՝ որոշ գործազուրկների համար աշխատատեղ ունենալու ճանապարհ. «Փաստ»

«Փաստ» օրաթերթը գրում է.

Ինչպես արդեն տեղեկացրել էինք, շատ շուտով՝ նոյեմբերի 5–ին, ՏԻՄ ընտրություններ տեղի կունենան հայաստանյան մի շարք մարզերի մի շարք համայնքներում, որոնց մեծ մասն էլ ընտրություններից հետո կդառնա խոշորացված:

Ինչևէ, այսօրվա դրությամբ արդեն ավարտվել են առաջադրումների ժամկետները թե՛ հերթական և թե՛ արտահերթ ընտրությունների համար: Ընդ որում հերթական ընտրությունների համար ավարտվել են նաև թեկնածուների՝ գրանցման համար սահմանված ժամկետները:

Հիշեցնենք, որ արտահերթ ընտրություններ տեղի կունենան երեք համայնքներում՝ Արտաշատում, Գորիսում և Շիրակամուտում: Արտաշատում արտահերթ ընտրություններ են պայմանավորված նախկին քաղաքապետ Արգամ Աբրահամյանի՝ այս տարի պատգամավոր ընտրվելու հանգամանքով:

Գորիսում արտահերթ ընտրություններ կլինեն, քանի որ նախկին քաղաքագլուխ Վաչագան Ադունցը հրաժարականի դիմում էր ներկայացրել: Ըստ մամուլի հրապարակումների՝ դա պարտադրված քայլ էր և պատճառն էլ Սյունիքի մարզպետ Վահե Հակոբյանի՝ նախկին մարզպետ Սուրիկ Խաչատրյանի կադրերից ազատվելու միտումն էր: Շիրակամուտի արտահերթ ընտրությունների պատճառն էլ նախկին գյուղապետի մահն էր:

Արտաշատում այս պահի դրությամբ կա երկու թեկնածու՝ ՀՀԿ–ական Կարեն Բենիամինյանը, ով նաև համայնքի ղեկավարի ժամանակավոր պաշտոնակատարն է և առաջադրվել է իշխող կուսակցության կողմից: Մյուս թեկնածուն անկուսակցական Արտակ Սարգսյանն է, ով հանդես է եկել ինքնառաջադրմամբ: Վերջինս «Գազպրոմ Արմենիա» ՓԲԸ–ի Արտաշատի ԳԳՄ–ի հսկիչն է:

Գորիսում, ի տարբերություն Արտաշատի, պայքարն ավելի բուռն կընթանա. այստեղ քաղաքապետի աթոռի հավակնություններ ունեն միանգամից չորս թեկնածու՝ ՀՀԿ–ականներ Առուշ Առուշանյանն ու Արշակ Մկրտչյանը, և անկուսակցականներ՝ Էրիկ Աղաջանյանն ու Սամվել Հարությունյանը: Առուշանյանը ընդամենը վերջերս է նշանակվել համայնքապետի պաշտոնակատարի պաշտոնում, նա բավական երիտասարդ է և ի տարբերություն մյուս հանրապետականի, իշխանությունները նրան են սատարում կայանալիք ընտրություններում: Մյուս ՀՀԿ–ականը «ՄթնաձորՇին» ՍՊԸ–ի տնօրենն է: Գորիսի համայնքապետի ընտրություններում մյուս երկու ինքնառաջադրված թեկնածուներից Աղաջանյանը ինչ–որ ձեռնարկություն ունի, քանի որ ԿԸՀ ներկայացված փաստաթղթերում նրա անվան դիմաց նշված է ԱՁ: Գորիսի քաղաքապետի չորրորդ թեկնածուն էլ Գորիսի Պետական Համալսարանին կից Սյունիքի նյութական և հոգեվոր ժառանգության ծրագրի գիտաշխատողն է:

Լոռու մարզի Շիրակամուտ համայնքում նույնպես չորս թեկնածու կա, և չորսն էլ ինքնառաջադրմամբ են հադես եկել: Այստեղ ՀՀԿ–ն կարծես թե մի կողմ է քաշվել կամ էլ պարզապես մոռացել է, որ սատարել է պետք իր հավատարիմներին: Իսկ նրա հավատարիմներից այստեղ մեկ թեկնածու կա՝ Արկադի Երանոսյանը: Մյուս երեքը անկուսակցականներ են՝ Արտեմ Գալստյան, Աշոտ Երանոսյան ու Արթուր Նալբանդյան: Այս չորս թեկնածուներից և ոչ մեկը աշխատանք չունի, և ըստ էության, առաջադրվելը աշխատանքի հարցը լուծելու լավագույն տարբերակը կլինի:

Հավելենք, որ նոյեմբերին կայանալիք ՏԻՄ ընտրությունները լուսաբանելու համար հավատարմագրվել է ընդամենը չորս լրատվամիջոց՝ «Գեղամա», «Շանթ» ու «Կենտրոն» հեռուստաընկերություններն ու Հայաստանի հանրային ռադիոն: Ընդհանուր առմամբ, հավատարմագրվել է 45 լրագրող՝ Հանրայինից` 2, «Շանթ»–ից` 4, «Կենտրոն» 22 և «Գեղամա»–ից էլ՝ 14 ներկայացուցիչ:

Միաժամանակ հավելենք, որ այս ընտրություններում թեկնածուների կողմից վճարվող գրավի չափը համայնքի ղեկավարի դեպքում տատանվում է 50–500 հազար դրամի, իսկ ավագանու անդամի դեպքում՝ 10–70 հազար դրամի սահմաններում: Նշենք, որ 500–ից պակաս բնակչություն ունեցող համայնքներում գրավ չի սահմանվել:

Շարունակությունը՝ «Փաստ» օրաթերթի այսօրվա համարում