Երևան–Կապան չվերթը հատուկ նպատակների՞ կծառայի. «Փաստ»

«Փաստ» օրաթերթը գրում է.

Կապան–Երևան չվերթների համար ինքնաթիռ է գնվել, որը Հայաստանում կլինի 2018 թ. մարտին: Այս մասին օրեր առաջ հայտարարել է Սյունիքի մարզպետ Վահե Հակոբյանը՝ նշելով, որ հետադարձով տոմսերի գները նախնական հաշվարկներով կկազմեն 30–40 հազար դրամ:

Կապանի վերանորոգվող օդանավակայանի համար գնված ինքնաթիռը 19 տեղանոց է և արժե 5,5 միլիոն եվրո, որից 1,5 միլիոնն իր վրա է վերցրել Պղնձամոլիբդենային կոմբինատը, իսկ գումարի մյուս մասը լիզինգի տեսքով է լինելու:

Սյունիքի մարզպետի մամուլի քարտուղար Վազգեն Սաղաթելյանը պատասխանելով «Փաստի» հարցին, թե ինչպե՞ս և ովքե՞ր են որոշել ավիատոմսի գինը հարցին, նշեց, որ դա նախնական հաշվարկների, վառելիքի ծախսի հիման վրա է արվել և գրեթե ինքնարժեքն է:

Մարզպետի մամուլի քարտուղարը նշեց, որ այստեղ խոսքը չի գնում նրա մասին, որ մարդն առավոտյան արթնանալու է, նստի ինքնաթիռ ու գնա Երևան զբոսանքի: Այդ դեպքում 30–40 հազար դրամը բնականաբար թանկ է: Օդանավակայանը պետք է ծառայի ավելի մեծ նպատակների համար: Ըստ Սաղաթելյանի՝ մեքենայի ճանապարհը չի փակվում, և եթե ինչ–որ մեկը գտնում է, որ թանկ է, կարող է չօգտվել:

Ի դեպ նշենք, որ Երևան–Կապան ավտոբուսային երթուղու արժեքն է 3 հազար դրամ, իսկ ավտոմեքենայինը՝ 6 հազար: Սակայն ավտոմեքենայով կամ ավտոբուսով երթևեկության տևողությունը տատանվում է 5–7 ժամի սահմաններում:

Մեր այն դիտարկմանը, թե ավիատոմսերի գնի հրապարակումից հետո մի շարք ֆեյսբուքահայեր իրենց դժգոհությունն են արտահայտել դրանց թանկ լինելու պատճառով, Սաղաթելյանը մատնանշեց, թե Ֆեյսբուքում գրողները մասնագետներ չեն: Ճշգրտմանը, թե դրանք գուցե օդանավակայանի հաճախորդներն են՝ արձագանքեց, թե չի ցանկանում մեկնաբանել Ֆեյսբուքում մեկնաբանողների բողոքը:

«Ֆեյսբուքն իրականում գերագնահատված է և գրեթե առնչություն չունի իրականության հետ: Այնտեղ հիմնականում բողոքական մասսա է: Եթե մենք առաջնորդվենք Ֆեյսբուքում տիրող տրամադրություններով, կթվա, թե այսօր հանրապետությունում բոլորն ամեն ինչից դժգոհ են:

Մենք ավելի դրական ենք նայում ամեն ինչին և շատ լավ գիտակցում ու բացատրում ենք, որ մարզում այս օդանավակայանի առկայությունը շատ այլ նպատակներ է հետապնդում: Մարզպետը բազմիցս նշել է, որ սա նաև բիզնես օղակներ ներգրավելու գործիք է: Երբ մարդկանց առաջարկում ես նեդրումներ անել մարզում, և նրանք մի քանի անգամ այդ 5 ժամը գնում–գալիս են, էլ չեն վերադառնում: Միգուցե հետաքրքրված են, բայց ճանապարհից խուսափելու պատճառով չեն գալիս:

Երկրորդը՝ խոսքը գնում է առողջապահության ոլորտի մասին, երբ հիվանդին պետք է հասցնել Երևան կամ բժշկին մարզ, ինչը կյանքի հարց է լուծում, որովհետև եղել են դեպքեր, երբ ժամերի հարց է եղել մարդու կյանք փրկելը: Այս դեպքերում կգործեն սուբսիդավորված ավիատոմսեր»,– ասաց նա:

Մեր հարցին, թե հետագայում, որոշակի գործընթացներից հետո գնի նվազեցում կարո՞ղ ենք ակնկալել, պատասխանեց, թե ամեն ինչ կախված է հոսքերից. եթե հոսքերը մեծ լինեն, ինքնարժեքը կնվազի, և հնարավոր է, որ ավիատոմսի գինն էլ նվազի:

«Ուսանողությանն ու առողջապահությանը վերաբերող ոլորտներում տոմսը սուբսիդավորվելու է: Այսինքն՝ գինը դա է, բայց մի շարք հարցերում Սյունիքի զարգացման հիմնադրամը աջակցելու է, եթե դա լինի նպատակահարմար ու արդարացված, և այդ գումարի մի մասը ինքն է վճարելու»,– ընդգծեց նա:

Մեր այն հարցին էլ, թե ինքնաթիռի՝ ավելի մեծ լինելու դեպքում, հնարավո՞ր է ավելի մատչելի տոմսեր լինեին, պատասխանեց, որ Կապանի օդանավակայանում հնարավոր է սպասարկել միայն տուրբո շարժիչներով ինքնաթիռներ: ԽՍՀՄ տարիներին ավելի մեծ ինքնաթիռներն այնտեղ վայրէջք կատարելու համար բավական մեծ շրջան էին անում՝ մտնելով Ադրբեջանի սահման: Այսօր այդ հնարավորությունը չկա և ըստ Սաղաթելյանի՝ օպտիմալը փոքր շրջան կատարող ինքնաթիռներն են, որոնք քիչ նստատեղեր ունեն: Բացի այդ, օդանավակայանի համար նախատեսվում է ևս մեկ ինքնաթիռ գնել՝ 25 տեղանոց:

«Տուրբո շարժիչով կան ավելի շատ նստատեղերով ինքնաթիռներ, որոնց սպասարկումը, սակայն, ավելի թանկ է: Հաշվի առնելով ավելի մեծ ինքնաթիռի ավելի թանկ սպասարկումը, նպատակահարմար չի գտնվել ավելի մեծը ձեռք բերել»:

Շարունակությունը՝ «Փաստ» օրաթերթի այսօրվա համարում