«Ոչ մի SMS չեմ ստացել»․ ինչո՞ւ է ազատման դիմում գրել Կարեն Գիլոյանն և ուր է տեղափոխվում նա
ԿԳՄՍ նախարարի՝ սպորտի գծով տեղակալ Կարեն Գիլոյանն ազատման դիմում է գրել։
«Գրել եմ դիմումս, այո»,- քիչ առաջ MediaHub-ի հետ զրույցում հաստատեց արդեն նախկին փոխնախարար Կարեն Գիլոյանը։
-Իսկ ինչո՞ւ ազատվեցիք, ո՞րն էր պատճառը։
-Որովհետև պիտի WADA-ում (Համաշխարհային հակադոպինգային ասոցացիա) լայն ներգրավվածություն ունենամ, բյուրոյի անդամ եմ լինելու, որի անդամ հետխորհրդային որևէ երկրից երբևէ չի եղել։ Անձամբ WADA-ի նախագահի կողմից առաջարկ ունեմ ներգրավվածություն ունենալ, և կարծում եմ՝ այդպես ավելի շատ օգուտ կտամ, լավ կլինի։ Ինքը, գիտեք, ինչքան ազդեցիկ կառույց է, կարող եմ ասել՝ Միջազգային օլիմպիական կոմիտեից հետո երկրորդ ամենաազդեցիկ կառույցն է։ Մինչև հունվարի 1-ը այդ տեղում եղել է Թուրքիայի սպորտի նախարարը, հիմա ես եմ արդեն, ընտրվել եմ հոկտեմբերին, հաստատվել եմ նոյեմբերին, հունվարի 1-ից անցել եմ պարտականություններիս կատարմանը։
-Մեզ էլ թվաց՝ Դուք էլ եք WhatsApp-ով SMS ստացել, դրա համար եք ազատման դիմում գրել։
-Չէ, չէ, ոչ մի SMS չեմ ստացել։ Փառք Աստծո, չորս տարի միայն լավ արդյունքներ են եղել, խնդիր չեմ ունեցել, ուղղակի սա շատ կարևոր կառույց է, ընդ որում՝ ես ընտրվել եմ եվրոպական երկրների կողմից, 42 երկրի ներկայացուցիչն եմ WADA-ում։
-Իսկ ի՞նչ է տալու դա Ձեզ, մեզ, երկրին ու սպորտին, որ Դուք թողնում եք այստեղ սպորտի գծով փոխնախարարի պոստն ու գնում այնտեղ։
-Շատ բան է տալու, այսօր հակադոպինգը, մաքուր սպորտը շատ է գնահատվում, ինչպես գիտեք՝ այսօր շատ են խստացրել ստուգումները, Հայաստանի հակադոպինգային գործակալությունն էլ, գիտեք, մենք ներսում որոշակի օրենքների փոփոխությունների գնացինք, որպեսզի համաշխարհային հակադոպինգային օրենքներին համապատասխանենք, հակառակ պարագայում, ուղղակի, WADA-ն փակում է երկիրը ու թույլ չի տալիս մասնակցություն։ Հիմա մենք հակադոպինգն ուժեղացրել ենք, պետք է ավելի առաջ գնանք, ու այս պահին արդեն տարածաշրջանում առաջատարի դիրք ենք գրավում։
-Սա Ձե՞ր ցանկությունն էր՝ գնալ այդ ճանապարհով, թե՞ նախարարի, կառավարության հետ համատեղ քննարկման արդյունքում է այս որոշումը կայացվել։
-Եթե շատ ազնիվ լինեմ, դա հենց WADA-ի նախագահ Վիտոլտ Բանկայի առաջարկն է եղել, ես երկու անգամ մասնակցել եմ համաժողովներին, այնտեղ տեսել են իմ աշխատանքը հակադոպինգի, մաքուր սպորտին կարևորություն տալու հարցում, և հենց ինքն է առաջարկել միանալ իրենց թիմին։
-Իսկ նախարարությունում ծանր չտարա՞ն Ձեր որոշումը։
-Դե, խոսեցի, պայմանավորվեցինք, որ ավելի օգտակար կարող եմ լինել այդտեղ, որովհետև, էլի եմ ասում, հետխորհրդային որևէ երկիր երբևէ ներկայացուցիչ չի եղել այդ տեղում։
-Ես պաշտոնյաներին գովել չեմ սիրում, բայց Դուք միշտ սպորտի հետ եք ասոցացվել, և երևի թե Դուք այս կառավարության այն եզակի պաշտոնյաներից էիք, որ Ձեր տեղում էիք՝ որպես մասնագետ, հետևաբար, հիմա ո՞վ է փոխարինելու Ձեզ, չէ՞ որ կարող է այս անգամ որևէ ոչ կոմպետենտ մեկին նշանակեն Ձեր տեղում։
-Շատ շնորհակալ եմ կարծիքի համար, և իսկապես՝ Դուք տեսել եք, որ ես լավ եմ աշխատել, 445 մեդալը ֆանտաստիկայի ժանրից էր, բայց մենք ունեցանք․․․
-Բայց դա Դուք չեք բերել, մեր մարզիկներն են բերել։
-Հա, բայց մեր ընդունած օրենքների շնորհիվ են բերել, չէ՞, մեր ցուցաբերած վերաբերմունքի շնորհիվ են բերել, մեր իրականացրած զանազան ծրագրերի շնորհիվ են բերել, շատ ուսումնամարզական հավաքներ, շատ մրցումներ, պարգևավճարներ, մեծ քանակությամբ գումար և այլն, և այլն․․․ Թե չէ՝ դրած էր, գնացին բերի՞ն մարզիկները։ Իհարկե, փառք ու պատիվ մարզիկներին և մարզիչներին, բայց կառավարության ծրագրերի շնորհիվ եղավ էդ ամեն ինչը։ Հիմա, չգիտեմ՝ իմ փոխարեն ով է լինելու, բայց ով էլ, որ լինի, կաշխատենք՝ ավելի սերտ, որևէ խնդիր չենք առաջացնի, ընդհակառակը՝ կօգնենք։ Ես էլի ներգրավվածություն ունենալու եմ զանազան մրցումներում, հատկապես այն մրցումներում, որոնց անցկացման իրավունքը բերելու մեջ մեծ լումա ունեմ։
-Իսկ որտե՞ղ է գտնվում WADA-ի գրասենյակը, և Հայաստանից տեղափոխվելո՞ւ եք, թե՞ այստեղից եք աշխատելու այդ ասոցացիայում։
-Գրասենյակը գտնվում է Լոզանում, բայց ես Հայաստանում եմ լինելու, այստեղ գրասենյակ է լինելու, ուղղակի հաճախակի գնալ-գալու եմ։
Վահե Մակարյան
