Ոչ միայն բանիվ՝ Ալլահշուքյուր Փաշազադեի բիզնեսները Կարլովի Վարիում. «Փաստ»

«Փաստ» օրաթերթը գրում է.

Ադրբեջանական լրատվամիջոցներում տեղեկություններ են տարածվել Կովկասի մահմեդականների վարչության ղեկավար Հաջի Ալլահշուքյուր Փաշազադեի բիզնեսների մասին: Մասնավորապես, «Ենի Մուսավաթ» թերթը գրել է. «Մեր շեյխը բիզնես ունի առողջարանային դրախտ համարվող Կարլովի Վարում»:

Մինչ օրս պարբերաբար տեղեկություններ են հրապարակվել այն մասին, որ Կովկասի մահմեդականների հոգևոր առաջնորդը բիզնեսներ ունի տարբեր ոլորտներում: Նույնիսկ նրան վերագրել են բանջարեղենի արտահանման մենաշնորհը: Սակայն բոլոր այդ դեպքերում որևէ փաստ կամ ապացույց չի ներկայացվել: Իսկ ինքը՝ Փաշազադեն կամ չի մեկնաբանել այդ տեղեկությունները, կամ էլ պահանջել է ապացույցներ ներկայացնել: Իր հայտարարություններից մեկում նա ասել էր. «Երբեմն իմ անունը կապում են ապակու, ամրանի, խնձորի, սոխի ու կարտոֆիլի բիզնեսի հետ: Այդ ամենը սուտ է: Եթե ասում են, ապա պետք է ապացույցներ ներկայացնեն»:

Այս առումով Չեխիայի ամենահայտնի առողջարանային քաղաքներից մեկում ունեցած բիզնեսի մասին տեղեկությունը տարբերվում է նախորդներից: Ներկայացվել են ոչ միայն լուսանկարներ, այլև համապատասխան կառույցների ռեեստրային տվյալները: Մեջբերում այդ տեղեկատվությունից. «Մարկետա Շպիշակովա անունով կինը Ալլահշուքյուր Փաշազադեի գործընկերն է: Նա 36 տարեկան է: Մասնագիտությամբ բժիշկ է: Որ մի կոպեկ չներդնելով՝ նա դարձել է Չեխիայի Կարլովի Վարիում գտնվող «Aynur KV» ընկերության համասեփականատերը: Այդ ընկերությունն ստեղծել են Ալլահշուքյուր Փաշազադեն և Միլի մեջլիսի պատգամավոր Ջավանշիր Փաշազադեն (հոգևոր առաջնորդի եղբայրն է.– խմբ.): Այդ կնոջ ծնողները երեք այլ ընկերությունների սեփականատերեր են:

«Aynur KV» ընկերությունը զբաղվում է ավտոմեքենաների լիզինգով և վարձույթով, ինչպես նաև անշարժ գույքի առքուվաճառքով: Այն գրանցված է որպես ՍՊԸ՝ Skroupova 2077/19, 36001, Karlovy Vary հասցեով: Նրա տարեկան եկամուտը 1 մլն կրոն է (մոտ 45000 դոլար): Երկրորդ լուսանկարում Փաշազադեի վիլլան է Կարլովի Վարիում, որը գրանցված է այդ ֆիրմայի անունով»:

Նշենք, որ մինչ այս մահմեդականների հոգևոր առաջնորդի ու նրա պատգամավոր եղբոր անունները ներքաշված էին մեկ այլ բիզնես–սկանդալի մեջ: Ոմն Մուգդատ Հաշիմով պայմանագիր էր կնքել Փաշազադե եղբայրների հետ համատեղ գործունեության վերաբերյալ: Հաշիմովն ապահովում էր Փաշազադեներին պատկանող «Medi–Sina» կլինիկայի գործունեությունը, սակայն ինչ–որ մի պահի կողմերի միջև կոնֆլիկտ էր առաջացել:

Դրանից հետո գործին միջամտել էր Փաշազադեներին մտերիմ Ռամազան Զեյնալովը, ով հայտնի է որպես Հաջի Մազան: Ու հենց նրա հայտարարության հիման վրա էլ Հաշիմովին ձերբակալել էին: Բաքվի ծանր հանցագործությունների գծով դատարանը նրան դատապարտել էր 9 տարվա ազատազրկման: Հաշիմովին մեղադրել էին «Medi–Sina» կլինիկայի համար սարքավորումներ ձեռք բերելու համար նախատեսված 113000 դոլար յուրացնելու մեջ:

Մի խոսքով, մահմեդականների հոգևոր առաջնորդը ձեռքերը ծալած նստած չէ: Սակայն ուշագրավն այն է, որ ադրբեջանական մամուլում պարբերաբար քննարկվում է Փաշազադեի ոչ կրոնական գործունեությունն այն դեպքում, երբ գրեթե ողջ մեդիա դաշտը վերահսկվում է իշխանությունների կողմից: Հնարավոր պատճառներից մեկը ոչ միայն նրան վերահսկելի պահելն է, այլ այն, որ Փաշազադեն «զտարյուն» ադրբեջանցի չէ: Նա ազգությամբ թալիշ է, ինչը հարկ եղած դեպքում ապտակի պես շրխկացնում են դեմքին:

Շարունակությունը՝ «Փաստ» օրաթերթի այսօրվա համարում