Սպանության կասկածելի թվացող դրվագների մասին քննչական մարմինը առայժմ լռում է

Օրեր առաջ արդեն մամուլին հայտնի էր դարձել, որ Արմավիրի մարզպետի խորհրդական Մանուկ Սիմոնյանի սպանության մեջ մեղադրվող մահացածի կնոջը՝ Ռուզաննա Մկրտչյանին դատահոգեբուժական և դատահոգեբանական համալիր փորձաքննության են ենթարկելու, որի նպատակով տեղափոխելու են «Նուբարաշենի» հոգեբուժական կենտրոն: Լուրը հաստատեց նաև ՀՀ Քննչական կոմիտեն, տեղեկացնելով նաև, որ ՀՀ քննչական կոմիտեի ՀԿԳ քննության գլխավոր վարչությունում քննվող քրեական գործով շարունակվում են ձեռնարկվել անհրաժեշտ քննչական և դատավարական այլ գործողություններ՝ Արմավիրի մարզպետի խորհրդական Մանուկ Սիմոնյանի սպանության բոլոր հանգամանքները պարզելու, բազմակողմանի, օբյեկտիվ և լրիվ հետազոտումն ապահովելու ուղղությամբ: Այսինքն, շարունակում է շրջանառության մեջ մնալ վարկածը, թե Արմավիրի մարզպետն այնուամենայնիվ սպանվել է իր կնոջ կողմից, ում էլ մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով: Ի դեպ, մահացածի եղբայրը ավելի վաղ լրատվամիջոցներից մեկին հայտնել էր, որ ինքը չի հավատում, որ Ռուզաննան է սպանությունը կատարել: Ավելին, ասել էր, որ ինքը իր վարկածն ապացուցող փաստեր ունի, ինչն անհրաժեշտության դեպքում կներկայացնի իրավապահ մարմիններին: Սակայն այս լուրը, ինչքան աննկատ մտավ շրջանառության մեջ, նույնքան էլ աննկատ դուրս եկավ շրջանառությունից, հավանաբար այն պատճառով, որ եղբոր հայտարարությունը կարող է փոխել դեպքի ողջ ընթացքն ու տրամաբանությունը: Այնուամենայնիվ հասարակությանը ցնցած այս աղմկահարույց դեպքի մանրամասներն այնքան բուռն էին, որ որևէ մեկը, անգամ դեպքի մասին առաջնային տեղեկություն տարածողները, չանդրադարձան հարցին, թե ինչպես է փոքրամարմին կինը կարողացել իր մեջ այնքան ուժ գտնել, որ մահացած ամուսնու գլխին կացնով այնպես հարվածել, սպանել, հետո էլ դին կարողանա տեղափոխել մեքենայի մեջ ու տանել, նշված վայրում նետել: Համաձայնեք, որ նույնիսկ աժդահա, ուժեղ, տղամարդը չի կարող վստահ լինել, որ մահացածի նման՝ բարձրահասակ ու մարմնեղ տղամարդու դին կկարողանա միայնակ կամ ասենք 20 տարեկան նվազ կազմվածքով մի երիտասարդի հետ տեղաշարժել, կամ առհասարակ հանել տանից: Հետաքրքիր է, թե այս մասով ինչ են պարզել քննիչները, կամ ստուգե՞լ են արդյոք, թե մահացածի կինը նման ծանրություն կարո՞ղ է արդյոք տեղից շարժել, թե՝ ոչ: Էլ չենք ասում դին տոպրակի մեջ դնելու, հետո մեքենայում տեղավորելու ու դեպքի բայրից այլ տեղ տեղափոխելու մասին: Ե՛վ սա, և՛ մահացածի եղբոր կողմից մամուլին հայտնած տեղեկությունները շրջանցելը բավականին կասկածելի են թվում և տպավորություն ստեղծում, որ, այնուամենայնիվ, փորձ է արվում գործը շեղել տուժածի կնոջ վրա՝ տպավորություն ստեղծելով, թե նա խելագարվել է: Ու եթե մինչև հիմա նա դեռ չի խելագարվել, ապա չի բացառվում, որ նման քայլերի պատճառով խելագարության չի հասնի, բայց որտե՞ղ է եղբոր խոստացած ձայնագրությունը, որի մասին լռում է քննչական մարմինը:

Հիշեցնենք, որ 1965 թ. ծնված Մանուկ Սիմոնյանի դիակը հայտնաբերվել էր 2017 թվականի հուլիսի 25-ին՝ ժամը 23.30-ի սահմաններում, Արմավիրի մարզի Մյասնիկյան-Դալարիկ ճանապարհի 3-րդ կմ-ից դեպի աջ ընկած՝ մոտ 300 մ հեռավորությամբ գտնվող «Դալարիկի ձոր» կոչվող տարածքում՝ փաթաթված և կապկպված սավանով, պոլիէթիլենային տոպրակներով և մուգ գույնի պարաններով։ Զննությամբ դիակի վրա հայտնաբերվել են կտրված և ջնջխված վերքեր, իսկ հագին եղել է վարտիք և շապիկ։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռ դատավճռով:

Արմինե Գրիգորյան, past.am