Գրաբարի գիտակ ուսանողներն արժանացան մրցանակների

Մարտի 29-ին ԵՊՀ Հայ բանասիրության ֆակուլտետում տեղի ունեցավ մարտի 22-ին կայացած «Լաւագոյն գրաբարագէտ» խորագրով հանրապետական օլիմպիադայի արդյունքների ամփոփումը։ Կազմակերպիչներ՝ ԵՊՀ Հայ բանասիրության ֆակուլտետի հայոց լեզվի պատմության և ընդհանուր լեզվաբանության ամբիոն, ֆակուլտետի ՈւԳԸ, «Դասական դպրոց» կրթական հիմնադրամ։

Միջոցառումը սկսվեց Տերունական աղոթքով, ապա Արարատյան Հայրապետական թեմի հոգևոր հովիվ և թեմի «Գրաբարյան օրեր» ծրագրի համակարգող Տ․ Պարթև քահանա Մուրադյանը ներկաներին փոխանցեց թեմի առաջնորդական փոխանորդ Գերաշնորհ Տ․ Նավասարդ արքեպիսկոպոս Կճոյանի օրհնությունն ու գնահատանքի խոսքը։ Ելույթներով հանդես եկան նաև «Դասական դպրոց» ԿՀ տնօրեն Մանե Ղևոնդյանը, «Իրական դպրոց» ԿՀ տնօրեն Վահագն Պողոսյանը, «Ինստիգեյթ» ընկերության տնօրեն Արման Պողոսյանը, ԵՊՀ Հայոց լեզվի պատմության և ընդհանուր լեզվաբանության ամբիոնի վարիչ, բ.գ. դ., պրոֆ. Աննա Աբաջյանը, ամբիոնի դոցենտ Նարինե Դիլբարյանը։

Ինչպես իր խոսքում նշեց «Դասական դպրոց» ԿՀ տնօրեն Մանե Ղևոնդյանը՝ «Լաւագոյն գրաբարագէտ» օլիմպիադայի նպատակներն են Հայոց դասական լեզվի շուրջ միավորել դպրոցականներին, ուսանողներին, դասախոսներին և այլ հետաքրքրված անձանց, խթանել ուսանողների հետաքրքրությունը դեպի Հայոց դասական լեզվի նորովի ուսումնասիրումն ու մեկնաբանումը, դասական լեզուների համատեքստում վերաիմաստավորել Հայոց դասական լեզվի դերը և ի վերջո ստեղծել մրցույթի մի ձևաչափ, որը շարունակական կլինի և ժամանակի ընթացքում կընդգրկի առավել մեծ լսարան:

Աշխարհաբար տեքստը գրաբարի փոխադրման մրցույթում 1-ին կարգի մրցանակի արժանացավ ԵՊՀ Հայ բանասիրության ֆակուլտետի ուսանող Անի Թադևոսյանը, 2-րդ հորիզոնականը զբաղեցրեց նույն ֆակուլտետի ուսանող Թամարա Կարապետյանը, իսկ 3-րդ տեղում Արցախի պետական համալսարանի ուսանող Գոհար Հայրապետյանն էր:

Գրաբարով շարադրությունների մրցույթում լավագույնը Գևորգյան ճեմարանի սան Արման Աբրահամյանի «Երկիր Նաիրի Հայաստանս» աշխատանքն էր: 2-րդ հորիզոնականը զբաղեցրեց Գևորգյան ճեմարանի սան Գևորգ սարկավագ Կարապետյանը, իսկ 3-րդում՝ ԵՊՀ Հայ բանասիրության ֆակուլտետի ուսանող Ժենյա Ղազարյանն էր:

«Ակընկալում ենք, որ այս եւ յետագայ մրցոյթների յաղթողների հետ կը համագործակցենք մեր նոր դասագրքերի, ծրագրային ապահովման եւ այղ գրաբարեան նիւթերի ստեղծման գործում, քանի որ մաւտակայ տարիներին Գրաբարով նոր բովանդակութիւն ստեղծման կարիքը շատ ենք ունենալու» - իր խոսքում նշեց Վահագն Պողոսյանը՝ շնորհավորելով հաղթողներին։

Մրցանակային անվանակարգեր զբաղեցրած ուսանողներն ստացան խրախուսական դրամական պարգևներ և մասնագիտական գրականություն՝ գիտելիքներն ամրապնդելու նպատակով։

Հիշեցնենք, որ օլիմպիադան ունեցավ ավելի քան 30 մասնակիցներ ամբողջ Հայաստանից՝ ԵՊՀ Հայ բանասիրության ֆակուլտետից, ԵՊՀ Իջևանի մասնաճյուղից, Գևորգյան ճեմարանից, Արցախի պետական համալսարանից, Հայաստանի պետական մանկավարժական համալսարանից, Ա. Շահինյանի անվան Ֆիզմաթ դպրոցից, «Իրական դպրոց» ԿՀ-ից, «Հերացի» դպրոցից, Յակոբ և Լուտովիկա Այնթապլեանների անվան համար 87 միջնակարգ դպրոցից։

Օլիմպիադայի հովանավորներ՝ «Ինստիգեյթ», «Բուտեխ» և «Փի-արտ» ընկերություններ, Արարատյան հայրապետական թեմ։