Ավելի քան 9 միլիոն դրամ՝ Ջերմուկում մոծակների դեմ պայքարելու նպատակով. «Փաստ»

«Փաստ» օրաթերթը գրում է.

Իրավական ակտերի նախագծերի հրապարակման միասնական կայքում երեկ ավելացվել է այս տարվա բյուջեում վերաբաշխում անելու և Գյուղատնտեսության նախարարությանը գումար հատկացնելու վերաբերյալ որոշման նախագիծը:

Մասնավորապես, այս որոշմամբ նախատեսվում է Գյուղնախարարությանը կառավարության պահուստային ֆոնդից 9 միլիոն 29 հազար 300 դրամ տրամադրել՝ Ջերմուկ քաղաքի տարածքում մոծակների և այլ խայթող միջատների դեմ պայքարի միջոցառումներ իրականացնելու նպատակով:

Ըստ որոշման նախագծի՝ Ջերմուկ քաղաքի սոցիալ–տնտեսական զարգացման գործում զբոսաշրջությունն ունի գերակա առաջնահերթություն: Զբոսաշրջության զարգացմանը նպաստող անվիճելի գործոններից են` մարդկանց հանգստի պատշաճ մակարդակով կազմակերպումը, անվտանգ և որակով սննդի ապահովումը, վարակիչ հիվանդություններից մարդկանց և կենդանիների պաշտպանությունը և այլն: Նախագծում ասված է, որ առողջարանային տուրիզմի կենտրոն Ջերմուկ քաղաքը յուրաքանչյուր տարի հյուրընկալում է մեծ թվով բուժվողների, հանգստացողների և զբոսաշրջիկների. «Բուժման ու սպասարկման ծառայությունից հիմնականում գոհ լինելով հանդերձ՝ նրանք դժգոհում են խայթող միջատների առատությունից, որի հետևանքով բնության գրկում բուժման և հանգստի համար կարևոր նշանակություն ունեցող հետիոտնի զբոսանքները դառնում են տհաճ, երբեմն անհնար»,– կարդում ենք մենք:

Ծրագրով նախատեսվում է Ջերմուկ քաղաքի 80 հա տարածքում իրականացնել սեզոնային միջոցառումներ 2 փուլով` ուղղված մոծակների, ինչպես նաև ճանճերի, մլակների, մժեղների, տզերի, մոսկիթների և այլ միջատների քանակական բազմազանության նվազեցմանը:

Այսպես, զբոսաշրջության գոտիներում կարևորվում է նաև հիվանդությունների բռնկման և տարածման կանխարգելումը, ինչին նպաստում է նաև միջավայրում միջատների, այդ թվում մոծակների դեմ պայքարի կազմակերպումը: Մոծակների և խայթող այլ միջատների դեմ պայքարի միջոցառումների իրականացման համար նախագծով պահանջվող գումարը կազմում է 9 միլիոն 29 հազար 280 դրամ, որից տրակտորիստի ծառայության վճարը՝ ներառյալ տեխնիկան, կազմում է 3 միլիոն 680 հազար դրամ. 1 հա–ի դիմաց 23 հազար դրամ, իսկ աշխատանքն ընդգրկելու է 160 հա: Բանվորի աշխատանքի վճարը կկազմի 960 հազար, դիզվառելիքի ձեռքբերումը 614 հազար 400, թունաքիմիկատի ձեռքբերումը 1 միլիոն 920 հազար, գործուղման ծախսերը 350 հազար դրամ, իսկ ԱԱՀ–ն էլ՝ 1 միլիոն 504 հազար 880 դրամ:

Միջատների դեմ պայքարի միջոցառումների իրականացման և յուրաքանչյուր փուլի ավարտից հետո արդյունավետության գնահատման համար կկատարվի անհրաժեշտ մշտադիտարկում` համաճարակաբանական վերլուծություն, տեղանքի ուսումնասիրություն, միջատների կենսագոյատևման տարածքների ճշգրտումներ: Ծրագրով նախատեսվում է միջատների կենսաբանական զարգացման փուլերում դրանց հասուն և թրթուրային ձևերի նկատմամբ ցողարկիչ–մեքենայով աէրոզոլ հեղացրման և ցողարկման մեթոդներով տարածքների մշակում մինչև միջատների կենսաբանական ակտիվության շրջանի ավարտը:

Հավելենք, որ այս նախագծի մշակման աշխատանքներում ներգրավվել են Գյուղատնտեսության, Առողջապահության և Բնապահպանության նախարարությունները, ինչպես նաև Գյուղատնտեսության նախարարության «Անասնաբուժասանիտարիայի և բուսասանիտարիայի ծառայությունների կենտրոն» ՊՈԱԿ–ն ու Ջերմուկի համայնքապետարանը։

Այստեղ հարկ ենք համարում հիշեցնել, որ ընդամենը 2 տարի առաջ՝ 2015 թ. նշված ծառայությունն իրականացնելու համար նախատեսվել էր ծախսել 15 միլիոն դրամից ավելի գումար, իսկ 2014 թ. կրկնակի քիչ՝ 4,5 միլիոն դրամ: Ստացվում է, որ կառավարությունը 2015 թ. հետո վերանայել է իր «քաղաքականությունը» և կամ փոփոխված կառավարությունը մոծակների դեմ պայքարում ավելորդ գումար, ինչպես նախկինում էր, այլևս չունի:

Շարունակությունը` «Փաստ» օրաթերթի այսօրվա համարում