Խաչիկ Ստամբոլցյանը ԼԳԲՏ ֆիլմերը հանելու մանրամասների մասին. «Փաստ»

«Փաստ» օրաթերթը գրում է.

Ամեն տարի «Ոսկե ծիրան» փառատոնի շրջանակներում Հայ Առաքելական եկեղեցում օրհնվում է հայկական ծիրանը, հետո այն բաժանվում մասնակիցներին: Այս տարի, սակայն, շատերի կարծիքով ոչ միայն կինոփառատոնը հեղինակազրկվեց, այլև այդ գեղեցիկ արարողությունը դարձավ անիմաստ:

Պարզվում է, որ առաջին տարին չէ, որ ԼԳԲՏ համայնքի ներկայացուցիչները պայքարում են, որ կինոփառատոնի ժամանակ իրենց «խնդիրների» մասին պատմող ֆիլմեր ցուցադրվեն: Սակայն ամեն տարի, բախվելով ներքին դիմադրության հզոր ալիքին, հրաժարվել են նման ֆիլմեր ցուցադրել: Բայց այս տարի մեկ գեղարվեստական և մեկ վավերագրական ֆիլմ էր ներառվել փառատոնի ծրագրում: Այս լուրը բավական էր, որ հասարակությունը կորցնի հավասարակշռությունը: Ընդվզման ալիքն այնքան մեծ էր, որ այն արագ հասավ բոլորին, անգամ մինչև Մայր Աթոռ Սուրբ Էջմիածին:

«Մխիթարիչ» բարեգործական ընկերության հիմնադիր և հասարակական գործիչ Խաչիկ Ստամբոլցյանը «Փաստի» հետ զրույցում նշեց, որ առաջին անգամը չէ, որ «Ոսկե ծիրան» փառատոնի ղեկավար Հարություն Խաչատրյանը փորձում է նման ֆիլմեր ցուցադրել՝ պատճառաբանելով, որ եթե նման ֆիլմեր չցուցադրի, ապա իրեն ոչ մեկն էլ փող չի տա, որ փառատոն կազմակերպի:

«Փաստորեն ինքը խոստովանեց, որ ծրագրավորված ձևով դրսից փող է բերում այս ազգը այլասերելու համար: Աշխարհը ոչնչացնելը մասոնական ծրագիր է, Հարություն Խաչատրյանն էլ մասոն է: Ես այդ մասին իրեն էլ եմ ասել, «Ոսկե ծիրանի» սիմվոլն էլ մասոնական սիմվոլ է, պարզապես աչքի փոխարեն ծիրան է նկարած»,– ասաց Խ. Ստամբոլցյանը:

Նա կոչ արեց հասարակությանը, որ ոչ թե իրենց մտքում պայքարեն ԼԳԲՏ երևույթի դեմ, այլ դուրս գան փողոց, որպեսզի աշխարհը տեսնի, թե ինչպես է մտածում հասարակությունը: Այդ դեպքում ավելի հեշտ կլինի մեծամասնությանը փոքրամասնությունից պաշտպանելու օրենքը Ազգային ժողով անցկացնել: Նա նշեց, որ փառատոնի բացման արարողության ժամանակ թեև պաստառներով ցույց է կազմակերպվել, փառատոնի կազմակերպչի հասցեին էլ վանկարկել են «Հուդա», «դավաճան», բացի այդ ինքը դիմել է նաև Մայր Աթոռ, բայց այդ ամենը քիչ է, պետք է այնպես պայքարել, որ մյուս տարիներին էլ նման բան չկրկնվի:

«Մեր Առաքելական եկեղեցու, Մայր աթոռի, Արարատյան թեմի ճիգ ու ջանքերի շնորհիվ այդ ֆիլմերը փառատոնից հանվեցին և փաստորեն այս տարի չեն ցուցադրվելու: Հարությունն էլ երեկ հայտարարեց, որ իրենց վրա ճնշում է եղել, որի պատճառով են ֆիլմերը հանվել: Բայց միևնույն ժամանակ ասել է, որ հաջորդ տարի են ցուցադրելու: Իսկ «Փինք Արմենիա» հասարակական կազմակերպությունն էլ հայտարարել է, որ Հայաստանում գրաքննություն կա»,– ասաց Խ. Ստամբոլցյանը:

Նա նաև նշեց, որ Հայաստանը, այնուամենայնիվ, այնպիսի պարտավորություն չի ստանձնել, որ այդ համայնքը ինչ ուզի անի կամ որոշի, որ կարող է ժողովրդի գլխին էլ ման գալ: Նրանք էլ պետք է ընդունեն, որ ժողովուրդը չի ընդունում ու վերջ: Սստամբոլցյանի կարծիքով՝ բայցի դա պետք է ցույց տան, որ դեմ են այլասերվածության տարածմանը, ընտանիքների քայքայմանը: Ըստ նրա՝ այս հարցը ոչ միայն հոգևոր, այլ մարտի դաշտում մղվող պատերազմ է, և եթե այս պատերազմում հայը տանուլ տա, ապա ընդհանրապես և ընդմիշտ ամեն ինչ կկորցնի:

«Հարությունը վերջերս «Շողակաթ» հեռուստաալիքով ելույթ էր ունենում և ասում էր, որ Ավետարանը պետք է ամեն օր ու անընդհատ կարդալ: Նրա լեզվի տակ ոչ փուշ կա, ոչ ոսկոր, բայց ինքը չի գիտակցո՞ւմ, որ Ավետարանի մեջ գրված է, որ միասեռականները երկնքի արքայությունը չեն վայելելու, որ միասեռականներին պետք է քարկոծել: Աստվածաշնչում գրված է, որ Սոդոմ և Գոմոր քաղաքները այլասերության համար Աստված կործանեց: Ինչ վերաբերում է այդ այլանդակ ֆիլմերի երաժշտության հեղինակ Անդրանիկ սարկավագին, ապա նա էլ Հարությունի հետ ոչ միայն գնաց և մասնակցեց ծիրանն օրհնելու արարողությանը, այլև իր երգչախմբով «ծաղկեցրեց իրենց արարողությունը»,– ասաց Խ. Ստամբոլցյանը:

Պատասխանելով հարցին, թե ինչպես է պատահել, որ եկեղեցու սպասավորը համաձայնել է նման ֆիլմի երաժշտություն գրել, Ստամբոլցյանն ասաց, որ մի առիթով սարկավագն ասել, է, որ ինչպես Քրիստոսն է գնացել անառակների մոտ, որպեսզի անառակությունը կանխի, այդպես էլ ինքն է վարվում:

«Բայց ինչպե՞ս կարելի է նման բան ասել, այն դեպքում, երբ ինքը, երաժշտություն է գրել ու ծաղկեցրել այդ ֆիլմերը: Հարց է ծագում, թե ինքը ինչպե՞ս է կանխել այդ անառակությունը և և ինչպե՞ս է իրեն Քրիստոսի հետ համեմատում: Իմ կարծիքով եկեղեցին ընդհանրապես պետք է դադարեցնի ծիրանը օրհնելու արարողություն կատարելը, քանի որ չի կարելի այն օրհնել ու տալ սատանաներին ու մասոններին»,– ասաց Խ. Ստամբոլցյանը:

Շարունակությունը` «Փաստ» օրաթերթի այսօրվա համարում