«Ոչ հոսանք ենք ծախսում, ոչ գումար ենք վճարում, անվճար օդից տաքանում ենք». Արևային ջրատաքացուցիչներ ունեցող համայնքի ղեկավար. «Փաստ»

«Փաստ» օրաթերթը գրում է.

Հայաստանի չգազաֆիկացված համայնքներին ջերմային էներգիայով ապահովելու վերաբերյալ վարչապետի հանձնարարականի շրջանակում Էներգետիկ ենթակառուցվածքների և բնական պաշարների նախարարությունը մշակել և կառավարությանն է ներկայացրել առաջարկությունների մի փաթեթ՝ այլընտրանքային եղանակով խնդրի լուծման վերաբերյալ։

Այն վերաբերում է արևային ֆոտովոլտային պանելների և ջրատաքացուցիչների, պելետային կաթսաների կամ վառարանների կիրառմանը չգազաֆիկացված համայնքներում։ Ըստ նախարարության պաշտոնական հաղորդագրության՝ իրականացված ուսումնասիրությունների և կատարված հաշվարկների հիման վրա յուրաքանչյուր համայնքի վերաբերյալ ներկայացվել է կոնկրետ առաջարկություն և նախապատվությունը տրվել է առաջին հերթին ջրատաքացուցիչների կիրառմանը, ինչը չգազաֆիկացված համայնքների մեծ մասի տաք ջրի խնդրի լուծման լավագույն և փոխշահավետ տարբերակն է

Նախորդ շաբաթ սրա վերաբերյալ քննարման ժամանակ փոխնախարար Հայկ Հարությունյանը նշել էր, որ ջրատաքացուցիչների կիրառումը միակ տարբերակը չէ և առանձին համայնքների համար հնարավոր է նաև գազաֆիկացման իրականացումը: Հարությունյանը նաև նշել էր, որ գազաֆիկացում կատարելը բավականին ծախսատար է և տնտեսապես չհիմնավորված, իսկ Լեռնամերձ գյուղի օրինակով ցույց է տրվում, որ հնարավոր է մի քանի անգամ ավելի քիչ գումար ծախսելով՝ արևային ջրատաքացուցիչներ տեղադրել:

Ըստ նախարարության լրատվական բաժնի պետ Ռիմա Եգանյանի փոխանցման՝ մարզերից ստացված տվյալների համաձայն այսօր ներկայացված է չգազաֆիկացված 280 համայնք: Եվ այդ չգազաֆիկացված 280 համայնքներից Արմավիրի մարզի Լեռնամերձ համայնքի բնակիչները արդեն մի քանի ամիս է կարողանում են նորմալ կերպով օգտվել բաղնիքից և գիշեր–ցերեկ ապահովված են տաք ջրով:

«Փաստի» հարցին, թե որպես այլընտրանք արևային ջրատաքացուցիչների տեղադրումը որքանո՞վ է արդյունավետ և արդյոք գյուղացիները գո՞հ են, Լեռնամերձի գյուղապետ Վարդան Միրզոյանը հակիրճ պատասխան տվեց, այն է՝ ընտիր ա:

«Հիմա շատ լավ ա, ընտիր ա հիմա: Ապրիլին տեղադրել են, մայիսին՝ գործարկել»,– ասաց նա:

Հարցին, թե արդեն տարբերությունը զգո՞ւմ եք, պատասխանեց՝ «ոնց չենք զգում, բաղնիք–մաղնիք չունեինք, ոչ կուխնու ջուր, ոչ բաղնիքի: Հիմա գիշեր–ցերեկ բացում ենք, լցվումա առուները, չգիտենք՝ ինչ անենք, եռումա, բլբլդում»:

Միրզոյանի խոսքով մինչ այս ջուրը տաքացվել է կամ էլեկտրականության հաշվին, կամ գեյզերով, կամ էլ՝ ցախով: Եվ ըստ նրա՝ այս խնդրի մասին տարիներ շարունակ բարձրաձայնել են, սակայն ոչ ոք լուծում չէր տալիս:

«Վարչապետին խնդրեցինք, վարչապետը միջնորդեց, էդ լավությունն արեց: Էս տասը տարիա քանի վարչապետա փոխվել, ոչ մեկը չարեց, խաբեցին: Էս վարչապետն արեց, մալադեց»,– ասաց նա:

Գյուղապետը նաև նշեց, որ վերջին 30 տարիների ընթացքում այս հարցը գյուղի ամենաարդիական խնդիրներից մեկն էր և նոր է միայն լուծում տրվել: Ասում է, որ թեկուզ գազի փոխարեն սա է, բայց ամեն դեպքում գիշեր–ցերեկ տաք ջուր ունեն: Իսկ դրանից էլ ավելի լավ ի՞նչ կարող է լինել:

«Ոչ հոսանք ենք ծախսում, ոչ գումար ենք վճարում, անվճար օդից տաքանում ենք»,– նշեց մեր զրուցակիցը՝ հավելելով, որ ձմռանն էլ ջրատաքացուցիչների առկա էլեկտրական տեներն էն աշխատեցնելու և գազի փոխարեն հոսանքի վճար կտան, այդ ամիսներին յոլա կգնան: Բացի այդ, նախորդ տարիներին գյուղի յուրաքանչյուր ընտանիք ստիպված էր լինում գեյզերի համար ամսական 7–13 հազար դրամ գումար վճարել, իսկ այժմ միայն խոհանոցի գազօջախի համար են գազ գնում և անձամբ համայնքապետը ամսական 13 հազար դրամի օգուտ է ունենում:

  Շարունակությունը` «Փաստ» օրաթերթի այսօրվա համարում