Լևոն Շիրինյան. «20 տարի աշխատած դատավորը ատեստացիա չի հանձնել. պատկերացրեք՝ որքան ճակատագրեր է խեղել». «Փաստ»

«Փաստ» օրաթերթը գրում է.

««Ելք» խմբակցությունը ՀՀ գլխավոր դատախազին ուղղված գրություն է պատրաստել, որով միջնորդում է Անդրիաս Ղուկասյանին ազատ արձակել կալանքից: «Ելք»–ի պատգամավորները պատրաստ են նաև հանդես գալ որպես Անդրիաս Ղուկասյանի երաշխավոր: Առավոտյան գրությունը կուղարկվի ՀՀ գլխավոր դատախազ Արթուր Դավթյանին»,–այս մասին երեկ իր ֆեյսբուքյան էջում գրառում էր կատարել ԱԺ պատգամավոր Նիկոլ Փաշինյանը:

Սրա հետ կապված «Փաստը» զրուցել է քաղաքագետ Լևոն Շիրինյանի հետ՝ պարզելու վերջինիս կարծիքը «Ելք»–ի կողմից նման քայլեր ձեռնարկելու հետ կապված: Մասնավորապես, Նիկոլ Փաշինյանի գրառմանը հետևել էին ամենայն հավանակնությամբ «Սասնա ծռերի» աջակիցների մեկնաբանություններն առ այն, որ «Սասնա ծռերի» արարքի մեջ հանցակազմ գտնելուց հետո նման գործողություններն անհասկանալի են և նույնիսկ ծիծաղելի: Օգտատերերից մեկն էլ այն կարծիքն էր հայտնել, թե մեկ տարին շուտով կլրանա, փաստեր չկան դատելու համար, և գործը պիտի կարճվի: Իսկ այս դեպքում Նիկոլ Փաշինյանը իբրև թե ճիշտ հաշվարկ է արել և արդյունքում Անդրիասի ազատության դափնին «Ելք»–ին կհասնի:

Մեզ հետ զրույցում Լևոն Շիրինյանը նշեց, որ անկախ ամեն ինչից քայլը դրական է և ողջունելի: Ինչ վերաբերում է նրան, թե հանցակազմ կա, թե չկա, ըստ քաղաքագետի՝ դա արդեն դատարանը պետք է որոշի: Չնայած ինքը հակված է նրան, որ «Սասնա ծռերի» քայլի մեջ հանցակազմ չկա:

«Ես երկուսի մեջ էլ հանցակազմ չեմ տեսնում: Եթե քրեական գործ կա առանձին դեպքի կապակցությամբ, դա կարող են իրավապահ մարմինները քննել, պարզել: Բայց ես կառաջարկեի եվրոպական վերահսկողություն իրականացնել: Տեսեք՝ նրանք իրենց ապստամբներ են հայտարարել, իսկ ապստամբությունը միջազգային օրենսդրության մեջ է: «Ելք»–ի առաջարկը չափազանց ողջունելի է: Ես առհասարակ մի առաջարկ ունեմ՝ բեռնաթափե՛ք բանտերը: Մանավանդ գիտեք, թե այս դատարանների հեղինակությունը որքան «բարձր» է հասարակության մեջ: Ես վստահություն չունեմ իրենց հանդեպ, արդյոք ճի՞շտ կդատեն: Իսկ պատճառներից մեկն էլ այն է, որ այս օրերին դատավորների և դատախազների ատեստացիաներ են իրականացվել, և տասնյակ տարիներ աշխատած մարդիկ 2 են ստացել, ատեստացիա չեն անցել: Իսկ նրանք 100–ավոր մարդկանց ճակատագրեր են խեղել, եթե քննությունը չեն կարողացել հանձնել: Եթե աշխատելուց հետո չեն կարողանում ատեստացիա հանձնել, ուրեմն նրանց նկատմամբ ես վստահություն չունեմ: Դրա համար է նաև պետք, որ մեր դատարանների հանդեպ եվրոպական վերահսկողություն լինի»,– ասաց նա:

Քաղաքագետն իր խոսքում նաև նշեց, թե կողմ է, որ Հայաստանում կոնսենսուս առաջանա և բեռնաթափվի ամեն ինչ: Այն դիտարկմանն էլ, թե հնարավո՞ր է, որ առանց այդ միջնորդության էլ շուտով ազատ արձակվեր Անդրիաս Ղուկասյանը և այստեղ «Ելքի» կողմից կարող է հաշվարկ լինել՝ Շիրինյանը պատասխանեց՝ թող ուրիշ կուսակցություններ էլ նույնը անեն ու դափնիներն իրենց վերցնեն:

«Այդ մարդիկ եթե արել են, ճիշտ են անում: Նույնիսկ եթե դափնիի համար էլ է արվում, ճիշտ են անում: Ես, օրինակ, Անդրիաս Ղուկասյանի պարագայում չեն հասկանում, թե ինչու է նա նստած: Ժողովուրդը բողոքելու իրավունք չունի՞: Բողոքի զանգվածային ցույցերը երաշխավորված են ՀՀ Սահմանադրությամբ: Իսկ ապստամբության իրավունքը ժողովրդի սուվերեն իրավունքն է միջազգային օրենսդրությամբ: Այնպես որ թող ֆոկուսներ չանեն»,– նշեց նա՝ հավելելով,– «Նայեք, 20 տարվա դատավորը ատեստացիա չի անցնում, գիտելիք չունի, բայց տարիներ շարունակ դատավարություն է իրականացրել, դե կարող է սա էլ այդ դեպքերից մեկն է: Իսկ սա խոսում է Հայաստանի դատական համակարգի գիտելիքների չափազանց ցածր մակարդակի մասին»:

Շարունակությունը` «Փաստ» օրաթերթի այսօրվա համարում