Մենք կորցրել ենք վերահսկողությունը ոչ միայն այդ 40-45 կմ-ի, այլ տասնապատիկ ավելի մեծ տարածքների նկատմամբ. Քոչարյան
Անվտանգության ոլորտում ես Հայաստանի համար գնահատում եմ կատարյալ ձախողում, քանի որ ոչ մի հարց այս տարվա ընթացքում չի բարելավել: Այս մասին, այսօր՝ դեկտեմբերի 27-ին, տարեվերջյան իր ասուլիսի ժամանակ նշեց ՀՀ երկրորդ նախագահ Ռոբերտ Քոչարյանը:
«Տարածքների կորուստ. Իշխանությունները նույնպես ընդունում են, որ 40 քառակուսի կմ կիլոմետրից ավելի տարածք գտնվում է հակառակորդի վերահսկողության տակ, բայց իրականում մենք չենք վերահսկում շատ ավելի մեծ տարածքներ:
Այդ GPS-ով սահմանագծումը բերեց նրան, որ ադրբեջանական զորքերը դիրքավորվել են ենթադրյալ իրենց սահմանի բերանով, մենք ստիպված ենք եղել հետ քաշվել 500 մետրից մինչեւ 1-1,5 կմ որոշտեղերում մի քիչ ավելի շատ: Նույնը կատարվելօ է ոչ միայն ԲՎարդենիս-Արաքս հատվածում, այլեւ Նախիջեւանի հատվածում դեռ մինչեւ պատերազմը: Հիշում եք, որ շատ մեծ տարածքներում ադրբեջանական զորքերն առաջ են եկել: Ամբողջ այդ տարածքը իրենց դիրքերից մինչեւ մեր դիրքերը մեր կողմից չեն վերհսկվում: Ըստ էության, մենք կորցրել ենք վերահսկողությունը ոչ միայն այդ 40-45 կմ-ի նկատմամբ, այլ տասնապատիկ ավելի մեծ տարածքների նկատմամբ»,-ասաց նա:
Քոչարյանի խոսքով, մենք կորցրել ենք այս տարվա ընթացքում կարեւորագույն ճանապարհների օգտագործման հնարավորությունը. «Մենք ունեցել ենք այս տարվա ընթացքում մոտ 36 զոհ, 30 վիրավոր եւ ավելի քան 30 նոր ռազմագերիներ:
Տարվա ընթացքում ոչինչ չի արվել բանակի մարտունակությունը բարձրացնելու համար: 2-3 դիրքերի համար մարտական գործողությունների ժամանակ ունենալ 30-ից ավելի գերի խոսում է բանակում լրջագույն պրոբլեմների մասին:
Սա կարելի է ինչ-որ բաներով բացատրել եւ հիմնական բացատրությունը կարող է լինել հետեւյալը, որ մեր զինվորները եղել են երկրի առաջին դեմքի արտահայտության տպավորության տակ. «մեկ սարի համար մենք հո չե՞նք պատերազմելու»: Մեր երկիրը սարերից է բաղկացած, դա նույնն է, որ արաբներն ասեն՝ անապատի համար հո չե՞նք պայքարելու: Սա նաեւ ինչ-որ տեղ հրավեր է, «էստի համեցեք» է ադրբեջանցիների համար: Դու ասում ես, որ չբնակեցված սարերի համար մենք պատրաստ չենք պատերազմել: Եթե առաջին դեմքն այդպես է մտածում, ինչի ենք մտածում, որ բանակի մայորը կամ պայմանագրային զինծառայողը այլ կերպ պետք է մտածի: Դա բանակի մարտունակությունը գցելու լավագույն միջոցներից մեկն է»,-ասաց երկրորդ նախագահը:
Նա հայտարարեց, որ ոչինչ չի արվել նաեւ անցած տարվա ընթացքում բանակի սպառազինության վերականգնման ուղղությամբ. «Մինչեւ այսօր չի հրապարակվել զոհվածների թիվը, սա խայտառակություն է: Մենք պետք է ունենային հուշամատյան, սա վերաբերմունք կլիներ զոհվածների, նրանց ընտանիքների նկատմամբ: Դա պետության պարտավորությունն էր: Աննորմալ է մեկ տարի անց այս հարցը այսպես անորոշ թողնելը:
Փաստ է նաեւ եւ բոլոր հարցումները ցույց են տալիս, որ բնակչության 70-80 տոկոսը լուրջ մտահոգված են անվտանգության հարցերով: Չի կարող երկիրը նորմալ զարգանալ, երբ բնակչության 80 տոկոսը մտածում է, որ ապրում է անվտանգ երկրում:
Այս բոլոր հարցերով մենք ավելի վատթարացված ձեւով մտնում ենք հաջորդ տարի: Բանակի բյուջեն այնպիսին չէ, որ հույս փայփայենք, որ այս հարցերը հաջորդ տարի իրենց լուծումն ստանալու են: Անհնար է այս ռազմական բյուջեով լուծել այսպիսի հարցեր»,-ընդգծեց Ռոբերտ Քոչարյանը:
Ucom Receives the International ISO 37001 Standard to Prevent, Detect and Address Bribery
Ameriabank Raises $200 Million from IFC, Marking the Largest Transaction by IFC ever with a Financia...
