Լևոն Շիրինյան. «Երկրները, որոնք չունեն զարգացած կուսակցական համակարգ, կատեգորիկ չպետք է անցնեն կառավարման խորհրդարանական համակարգի». «Փաստ»

«Փաստ» օրաթերթը գրում է.

– Պարոն Շիրինյան, խորհրդարանի առաջին նիստում ունեցած իր ելույթում նախագահ Սերժ Սարգսյանն ասաց, որ քաղաքական մրցակցությունն այս խորհրդարանում մեծանալու է: Արդեն ընթանում են խորհրդարանի աշխատանքները, իրո՞ք այդպես է:

– Այն մրցակցությունը, որն ակնկալում է ժողովուրդը, չի լինի: Որովհետև արմատական ընդդիմությունն այլևս խորհրդարանում չէ: Հետևապես արմատական հարցերն էլ այնտեղ չեն բարձրացվի: Ընդդիմադիր է խորհրդարանում Ելք դաշինքը: Հիմա այս դաշինքն ինչքանո՞վ ընդդիմադիր դերակատարություն կունենա, դժվարանում եմ ասել:

Իրավիճակն այսպիսին է` Հայաստանի Հանրապետական կուսակցությունը դաշնակցության հետ կոալիցիայի մեջ է: Եվ երկրի պատասխանատուն կոալիցիան է, Հանրապետականը չէ: Այս դեպքում դաշնակցությունը մրցակցի, ի՞նչ անի. հաղթի Հանրապետականի՞ն:

Իսկ Ծառուկյան դաշինքն էլ իրենց սովորության համաձայն ոչ ընդդիմություն են, ոչ իշխանություն են:

Հանրապետականն էլ իշխող կուսակցություն է և պետք է անի, ինչ պետք է անի: Ընդ որում, այնպիսի ներկայացվածություն ունի, որ ոչ մեկի կարիքն էլ չունի: Նույնիսկ իր գործընկերոջ կարիքը չունի: Բայց, պարզ է, այդ գործընկերը շահարկելու է այնպես, ինչպես շահարկել է քսան տարի շարունակ: Գիտենք` կոալիցիայից դուրս է գալիս, ներս է մտնում… Այս իմաստով որոշ մրցակցություն կլինի:

Հիմա` Բարգավաճի ու Հանրապետականի մրցակցության մասին: Երկուսն էլ խոշոր ձեռնարկատերերի կուսակցություններ են: Եթե այս մարդկիկ շահերի բախում ունեցան, կբախվեն: իսկ եթե ունեցան անդրկուլիսային համաձայնություններ, ապա կգնան կոմպրոմիսների:

Հիմա` ձեր հարցի պատասխանը. ո՞ւմ մեջ եք ուզում, որ այդ մրցակցությունը տեղի ունենա…

– Այսինքն` մրցակցությունը կլինի խմբային մրցակցություն, անձնական մրցակցություն, բայց` ոչ կուսակցական–գաղափարական:

– Ստեղծված վիճակում` այո: Իսկ եթե ճգնաժամային իրավիճակ լինի կամ տեղի ունենա շահերի բախում, ապա հակասությունները գլխավորապես կդրսևորվեն Հանրապետական կուսակցության ներսում:

Այդ հարցերն անընդհատ կլինեն, բայց միաժամանակ կարվեն նաև հայտարարություններ, որ ոչ մի նման բան չկա: Ինչպես և հիմա են անում:

Եթե Ելքը լավ աշխատի, նրանց համարձակությունը տեղը լինի, գիտելիքները` բավարար լինեն, նաև ցուցաբերեն բավարար քաղաքական դիրքորոշում, նաև պահպանեն կապը ժողովրդի հետ, հիմա ասում են` փողոցի հետ. այդ բառը չեմ սիրում, ապա կարող են շատ բան փոխել:

– Նշանակում է այդքան էլ լավատես չլինենք, որ մեր այս խորհրդարանում կդրվեն պառլամենտարիզմի զարգացման նախադրյալները:

– Ես մշտապես ասել եմ` այն երկրները, որոնք չունեն զարգացած կուսակցական համակարգ, կատեգորիկ կերպով չպետք է անցնեն կառավարման խորհրդարանական համակարգի: Բայց Հայաստանում անցան: Հիմա տեսնենք ի՞նչ կստացվի: Մոտավորապես այսպես կլինի` բովանդակային առումով նախագահական համակարգը կմնա` բայց մի քիչ խորհրդարանական փետուրներով զարդարված:

– Իսկ Սերժ Սարգսյանի հետագա պաշտոնավարման հարցը` ի՞նչ պաշտոն կզբաղեցնի, կզբաղեցնի՞, թե չի զաբաղեցնի, ի՞նչ ինտրիգ կմտցնի քաղաքական գործընթացների մեջ մինչև 2018 թվականը:

– Սերժ Սարգսյանը սրընթաց գնում է նստելու վարչապետի աթոռին: Եվ նրա դեմ կանգնող ուժեր ըստ էության չկան: Դաշնակցությունը կօժանդակի: Բարգավաճը դեմ չի լինի: Ելքը հաստատ դեմ կլինի, բայց նրա պատգամավորների թիվը չի բավարարի որևէ բան անելու: Այսպես կլինի, իհարկե, եթե ֆորսմաժորային իրավիճակներ չառաջանան: Իսկ նման բան Հայաստանում միշտ կարող է լինել: Որովհետև մեր ներքին և արտաքին վիճակները ճգնաժամային իրողությունների հետ են կապված:

– Բայց կա նաև անձի խոսքը` Սերժ Սարգսյանը մինչ Սահմանդրության ընդունումն ասաց, որ վարչապետի պաշտոնին չի հավակնելու: Չհավատա՞նք նրա խոսքին:

– Իսկ այս վերջին ելույթում այդ մասին ասե՞լ է: Եթե չի ասել, ուրեմն դրանք ջնջեցինք: Անցանք առաջ: «Ալ–Ջազիրային» տված հարցազրույցում «իշմարը» տվեց: Ասաց` իմ քաղաքական ճակատագիրը կախված է ընտրություններից: Իսկ այդ ասելուց հետո Հանրապետականը շռնդալից հաղթանակ է տարել:

Նորից կրկնեմ` այս գործին մի քիչ օգնում է Բարգավաճ Հայաստան Կուսակցությունը: Իսկ ջերմորեն աջակցում է Հայ հեղափոխական սոցիալիստական դաշնակցություն կուսակցությունը:

– Սոցիալիստական կուսակցությունը` պահպանողական կուսակցությանը:

– Այո՛:

Շարունակությունը` «Փաստ» օրաթերթի այսօրվա համարում