Բաքուն չի խփի Ստեփանակերտ–Շուշի թռիչք իրականացնող զբոսաշրջային ինքնաթիռները, բայց.... «Փաստ»

«Փաստ» օրաթերթը գրում է.

Մի քանի օր առաջ «Yell Extreme Park» ընկերությունը հայտարարեց, որ պատրաստվում են օդային զբոսանքներ իրականացնել Ստեփանակերտ–Շուշի ուղղությամբ: Երկտեղանի ինքնաթիռներով Ստեփանակերտի օդանավակայանից դեպի Շուշի իրականացվող զբոսաշրջային թռիչքների տևողությունը լինելու է 20 րոպե, արժեքը՝ 35000 դրամ: Բացի այդ, նախատեսվում է, որ հետագայում ամերիկյան CH701 մակնիշի փոքրիկ ինքնաթիռները Ստեփանակերտից թռիչքներ կիրականացնեն նաև զբոսաշրջիկների սիրած մեկ այլ վայր` Գանձասարի վանական համալիր:

Ինչպես և սպասվում էր, Ադրբեջանից արձագանքը չուշացավ: Երեկ պարզվեց, որ նրանք դիմել են ԵԱՀԿ Մինսկի խմբին՝ «միջոցներ ձեռնարկել Հայաստանի հերթական սադրանքը կանխելու համար»: Պարզվում է, «այդ սադրիչ գործողությունները լուրջ վնաս են հասցնում բանակցային գործընթացին և միտումնավոր կերպով սրում են հակամարտությունը»: Նրանք պատրաստվում են դիմել նաև Քաղաքացիական ավիացիայի միջազգային կազմակերպությանը՝ արգելելու և անօրինական համարելու այդ թռիչքները:

Սակայն այս անգամվա ադրբեջանական արձագանքի մեջ կա մեկ ուշագրավ հանգամանք: Նրանք չեն սպառնում խփել այդ ինքնաթիռները, մի բան, որի մասին բացահայտ խոսում էին 2015 թ.–ին, երբ վերաբացվեց Ստեփանակերտի օդանավակայանը: Կհիշեք՝ այն ժամանակ ամենաբարձր մակարդակով սպառնալիքներ էին տեղում հայկական կողմի ուղղությամբ: «Ու մեր ղեկավարությունը քաղաքական որոշում ընդունեց՝ թռիչքներ չիրականացնել»,– հիշում է այն ժամանակ ԼՂՀ քաղավիացիայի ղեկավար Դմիտրի Ադբաշյանը: Ի դեպ, այն ժամանակ էլ Ադրբեջանը դիմել էր Քաղաքացիական ավիացիայի միջազգային կազմակերպությանը: «Հետո հրապարակեցին պատասխանը, թե իբր այդ թռիչքներն անօրինական են, միջազգային իրավունքների խախտում: Բայց մինչև հիմա էլ որոշ մարդիկ ասում են, որ դա կեղծ փաստաթուղթ էր, Ադրբեջանն էր այն պատրաստել»,– հիշում է Դ. Ադբաշյանը:

Ինչևէ, հիմա կարծես թե իրավիճակ է փոխվել: Ոչ միայն չեն սպառնում խփել այդ ինքնաթիռները, այլև մարդասիրաբար ասում են, որ իրենք խաղաղ քաղաքացիների դեմ չեն կռվում: «Գուցե հայկական կողմը փորձում է այնպես անել, որ մենք խփենք իրենց ինքնաթիռները, որ հետո ի լուր աշխարհի հայտարարեն այդ մասին: Բայց Ադրբեջանի ԶՈՒ–ն քաղաքացիական թռչող ապարատներ չի խոցի: Մենք չենք կռվում քաղաքացիական բնակչության դեմ»,– ասել է ռազմական փորձագետ, գնդապետ Շաիր Ռամալդանովը:

Նրանց մեջ խիղճ ու մարդասիրությո՞ւն է արթնացել, թե խնդիրն այլ է: Որքան էլ լավատեսորեն տրամադրված լինենք, այնուամենայնիվ խնդիրը, դժվար թե, խիղճը լինի: Փոխվել է քաղաքական վիճակ: Ընդ որում, դա տեղի է ունեցել ընդամենը մի քանի օր առաջ, երբ ԵԱՀԿ Մինսկի խմբի համանախագահները, իսկ Ռուսաստանը նաև առանձին՝ հասցեական մեղադրանք հնչեցրին Ադրբեջանի հասցեին՝ նախահարձակ գործողությամբ հայկական ՀՕՊ համակարգը խոցելու և շփման գծում վիճակը սրելու համար: Այդ հայտարարությունները սառը ցնցուղ էին Ադրբեջանի համար, որը մինչ այդ իր որևէ գործողության համար նման հասցեական մեղադրանք չէր ստացել: Դա նշանակում էր, որ Ադրբեջանը, գոնե առայժմ, զրկվում է ռազմական գործողություն իրականացնելու իրավունքից: Միջազգային հանրությունն է նրան զրկում դրանից: Ուստի նրանք ստիպված են բավական զգուշավոր արձագանքել ներարցախյան զբոսաշրջային թռիչքների մասին լուրին՝ խուսափելով բացահայտ ագրեսիվ գործողությունների կոչ հնչեցնելուց և բավարարվելով միայն միջազգային օրենսդրությանը հղումներ անելով:

Այս անգամ հայկական կողմը կարծես թե գտավ ճիշտ պահը: Ու հնարավոր է՝ ներարցախյան թռիչքներին շուտով ավելանան նաև Հայաստան–Արցախ թռիչքները՝ կրկին զբոսաշրջային ուղղվածությամբ:

Շարունակությունը` «Փաստ» օրաթերթի այսօրվա համարում