Երաժիշտ, գործիքավորող Էմանուել Հակոբյանը՝ հայտնիների հետ համագործակցությունների և իր գործունեության մասին

Երաժիշտ, գործիքավորող Էմանուել Հակոբյանը, ով առավել հայտնի է Eman մականվամբ, երկար տարիներ լինելով հայկական շոու բիզնեսում, ժամանակի ընթացքում  կարողացել է շահել երգարվեստի ամենահայտնի երգիչ-երգչուհիների վստահությունը։

Սիրուշո, Ռազմիկ Ամյան, Միհրան Ծառուկյան, Մարտին Մկրտչյան, Նարեկ Մեծ Հայք, Իվետա Մուկուչյան և Ռոլանդ Գասպարյան, Գայա Արզումանյան, Արմենչիկ, Գևորգ Սիրեկանյան, Մաշա Մնջոյան, Ռաֆայել Երանոսյան, Գրիգոր Եսայան, Ռաֆայել Թունյան և լիբանանցի հայտնի երգչուհի Զոյա և այլք․․․ ահա այն արտիստները, որոնք պարբերաբար իրենց երգերի գործիքավորումը վստահել և վստահում են Էմանուել Հակոբյանին։
Oragir.live-ը  զրուցել է երաժշտի հետ՝ հայտնիների և իր գործունեության մասին։

«Վերջին համագործակցություններիցս մեկը Ռաֆայել Թունյանի և լիբանանցի հայտնի երգչուհի Զոյայի հետ էր։ Նրանք ինձ վստահեցին իրենց զուգերգի գործիքավորումը։

Ինչպես նաև օրեր առաջ տեղի ունեցավ Արամ MP3-ի «Լուսավոր տղա» երգի պրեմիերան, որի mixing-ն ու mastering-ն եմ արել։ Ինչպես յուրաքանչյուր երգի, այնպես էլ այս ստեղծագործության դեպքում մեծ պատասխանատվություն էի զգում, քանի որ այն պարզապես աշխատանք չէր ինձ համար։ Այն նվիրված էր 44-օրյա պատերազմում զոհված 19-ամյա զինվոր  Գևորգ Ջավախյանի հիշատակին։ Համագործակցել եմ նաև Սիրուշոյի հետ նրա՝ «Zoma zoma» երգի շրջանակում։ Իմ տարբերակով գործիքավորելով երգի երաժշտությունը՝ Սիրուշոն այն ընդգրկեց իր «Armat» ձայնասկավառակում։ Աշխատել եմ նաև Միհրան Ծառուկյանի, Մարտին Մկրտչյանի, Նարե Գևորգյանի, Հակոբ Հակոբյանի և Արմեն Հովհաննիսյանի, Գոռ Եփրեմյանի, Գրիգորի Եսայանի,  Գայա Արզումանյանի, Ռաֆայել Թունյանի, Գևորգ Սիրեկանյանի և այլ արտիստների հետ։

Համագործակցել եմ նաև դերասան Ռաֆայել Երանոսյանի հետ՝ հայտնի «Ճոճանակ» երգի շրջանակներում։ Պետք է ասեմ, որ այն բավական ռիսկային և պատասխանատու աշխատանք էր, քանի որ երգի բնօրինակն արդեն հատնի և սիրված էր։ Ուզեի թե չուզեի՝ մարդիկ ինքնըստինքյան համեմատականներ էին անցկացնելու և, ինչու չէ, քննադատելու։ Չհեռանալով օրիգինալ տարբերակից՝ փորձել եմ երգին ժամանակակից շունչ տալ։ Նշեմ, որ սա առաջին դեպքը չէր, երբ ես արդեն սիրված երգին նոր ժամանակակից շունչ տվեցի։ Տվյալ ձևաչափով համագործակցել եմ նաև Ալիկ Հակոբյանի հետ․ «Կառուսել», «Քո աչքերը, «Իմ ախպերը», «Անցիր նավակ», «Վույ աման, աման, «Շարժիր թաշկինակը» երգերին հաղորդել ենք ժամանակակից շունչ և դրանք նորովի ներկայացրել»,- պատմեց Էմանուել Հակոբյանը և ավելացրեց․

«Առհասարակ, երաժշտության ասպարեզում գլխավոր գաղտնիքը լսարանի համար աշխատելն է։ Որքան էլ որ ես ցանկանում եմ որևէ նոր, այլընտրանքային երաժշտություն ստեղծել, միևնույնն է, միշտ կողքից դիտում եմ այդ ամենը և սառը դատում։ Երաժշտությունն անպայման պետք է ինչ-որ այցեքարտ ունենա, որով նա իր կողմը կքաշի բազամահազարանոց լսարանին»,- նշեց Էմանուել Հակոբյանը։