Ռուբեն Բաբայան. «Արվեստը հաղորդակցվող անոթների նման է...». «Փաստ»

«Փաստ» օրաթերթը գրում է.

Երևանի Հովհ. Թումանյանի անվան տիկնիկային թատրոնը մայիս ամսին բավականին հարստացրեց իր նվաճումների ցանկը: Ամսի 14–ին Պրահայում անցկացված Դերասանական բարձրագույն դպրոցի 6–րդ միջազգային փառատոնի ժամանակ մեր տիկնիկայինի ներկայացրած Անդերսենի «Մատնաչափիկը» բեմադրությունն արժանացավ հանդիսատեսի և ժյուրիի համատեղ քվեարկությանը, շահելով «Լավագույն բեմադրություն»՝ գլխավոր մրցանակին: Իսկ մայիսի 18–ից 21–ը ՌԴ Օրինբուրգ քաղաքում անցկացված 9–րդ թատերական միջազգային փառատոնի ժամանակ մեր տիկնիկային թատրոնն արժանացավ դիպլոմի:

Թատրոնի գեղարվեստական ղեկավար Ռուբեն Բաբայանն Օրենբուրգից «Փաստի» հետ զրույցում ասաց, որ ինքը թեև Չեխիայում անցկացված փառատոնի ժամանակ անձամբ ներկա չի եղել, սակայն շատ կարևոր է այդ երկրի ժյուրիի կողմից մեր տիկնիկային թատրոնին նման բարձր գնահատականի արժանացնելը:

«Չեխիան համարվում է տիկնիկային արվեստի հայրենիքը և այնտեղ շատ տարածված է այս արվեստը: Եվ այնտեղի փառատոնին մասնակցելով գլխավոր մրցանակի արժանանալը, անշուշտ շատ պատվաբեր է»,– ասաց Ռ. Բաբայանը:

Փառատոնին ներկայացված են եղել Ռումինիայի, Սլովենիայի, Սլովակիայի, Բուլղարիայի, Ուկրաինայի տիկնիկային թատրոնները և փաստորեն նրանց մեջ մեր ներկայացումն է ճանաչվել որպես լավագույնը: Ռ. Բաբայանը նշեց նաև, որ շատ կարևոր էր, որ հայկական խմբին հաջողվեց մեկնել Պրահա նաև նրա համար, որ այն աշխարհի ամենագեղեցիկ քաղաքներից մեկն է:

«Այդ քաղաքը տորթ են անվանում և դա իսկապես այդպես է: Բազմաթիվ թանգարաններ կան այնտեղ, բայց դրանից բացի քաղաքով շրջելն անգամ բավականին հետաքրքիր է: Ինչ վերաբերում է ներկայացմանն, ապա մենք շատ օրիգինալ բեմադրություն ենք ներկայացրել, որը կարծում եմ լավ ճակատագիր ունի: Արդեն բազմաթիվ փառատոների մասնակցելու հրավերներ ենք ստացել: Բայց դա է թատրոնի առօրյան՝ պետք է փառատոների մասնակցել, նաև մարզեր գնալ, ինչը նույնպես մենք իրականացնում ենք»,– ասաց Ռ. Բաբայանը:

Նա նաև նշեց, որ թատերական արվեստը պետք է բաց լինի և նեղ շրջանակներում սահմանափակվելու իրավունք երբեք չունի: Խոսելով փառատոններին մասնակցելու ամենատարածված խոչընդոտի՝ ֆինասավորման մասին, նա նշեց, որ Չեխիայի փառատոնին մասնակցելու ֆինանսական ծախսերի մի մասն իր վրա էր վերցրել ՀՀ մշակույթի նախարարությունը, իսկ կեցության ծախսերը հոգացել է հրավիրող կողմը:

Տիկնիկայինի գեղարվեստական ղեկավարն ասաց նաև, որ իր ղեկավարած թատրոնը Մշակույթի նախարարության հովանավորությամբ միշտ էլ տարեկան մեկ–երկու միջազգային փառատոնի մասնակցել է: Իսկ ներկա պահին Օրենբուրգում կազմակերպված փառատոնին մասնակցելու ֆինանսական ծախսերն ամբողջությամբ իր վրա է վերցրել կրկին հրավիրող կողմը:

«Մոտ մեկ ամիս առաջ Պետերբուրգում մասնակցեցինք նաև «Բալթյան տուն» փառատոնին, որի ծախսերը նույնպես հոգացել էր հրավիրող կողմը»,– ասաց Ռ. Բաբայանը:

Արվեստագետի խոսքով ընդհանրապես հանրային արվեստը՝ թատրոնը, կինոն և այլն, պետք է մշտապես շփման մեջ լինի արտերկրի հանդիսատեսի և կոլեգաների հետ: Եվ միայն այդպես կարելի է արվեստի այդ ճյուղերը զարգացնել, քանի որ մշակույթների փոխանակությունը նույնպես նպաստում է ոլորտների զարգացմանը:

«Արվեստը հաղորդակցվող անոթների նման է և եթե մի կողմի «ճանապարհը» փակվի, ապա մյուսը կպայթի»,– ասաց Ռ. Բաբայանը:

Խոսելով Օրենբուրգում ներկայացված Նիկոլայ Գոգոլի «Ակ, ակ» տիկնիկային ներկայացման մասին, թատրոնի գեղարվեստական ղեկավարն ասաց, որ տիկնիկայինի պատմության մեջ առաջին անգամ, հանդիսատեսի «պահանջով» նույն ներկայացումը մեկ օրում խաղացել են երկու անգամ:

«Դահլիճում, որտեղ խաղացինք, տեղերի թիվը 250–նն էր, բայց ցանկացողների թիվը կրկնակի ավել էր: Այդ պատճառով մենք մեկ օրում երկու ներկայացում խաղացինք: Ռուսաստանում Գոգոլին խաղալ առանց խոսքերի և նման յուրօրինակ ձևով արդեն բարդ է, բայց հանդիսատեսը ներկայացումը շատ լավ ընդունեց, որի համար շատ ուրախ ենք: Բայց ամենաուրախալին այն էր, որ բացի ջերմ ընդունվելուց, բոլորը մեզ շնորհավորում էին, նշելով, որ փայլուն տիկնիկավարներ և շատ բարձր ճաշակ ունենք: Այս ամենը շատ հաճելի է, բայց հիմա արդեն պատրաստվում ենք վերադառնալ Հայաստան և մեկնել Գորիս, Կապան, իսկ հունիսի սկզբին էլ կմեկնենք Արցախ»,– ասաց Ռ. Բաբայանը:

 Շարունակությունը` «Փաստ» օրաթերթի այսօրվա համարում