Զառա Բաթոյան. ««Ելքի» ծրագիրը հիմնված է երևանցիների կարիքների վրա». «Փաստ»

«Փաստ» օրաթերթը գրում է.

Փաստի» հյուրն է «Ելք» դաշինքի ավագանու անդամի թեկնածու Զառա Բաթոյանը:

– Զառա, Դուք ի սկզբանե պատգամավորի թեկնածու էիք, հիմա ավագանու: Ի՞նչն է Ձեզ բերել քաղաքականություն և հիմնականում ի՞նչ խնդիրներ եք պատրաստվում վեր հանել:

– Ես արդեն 18 տարի է աշխատում եմ հասարակական ոլորտում և ներգրավված եմ հաշմանդամություն ունեցող անձանց շահերի պաշտպանության գործընթացում: Քաղաքականություն եմ եկել քանի որ հավատում եմ, որ հաշմանդամություն ունեցող մարդիկ չպետք է սպասեն իրենց «հերթին», նրանք պետք է լինեն որոշում կայացնող և բոլոր գործընթացների մասնակից: Պատրաստվում եմ վեր հանել մատչելի միջավայրի ապահովման և ներառական քաղաքականության իրականացման խնդիրը Երևանում:

– Ըստ Ձեզ, մայրաքաղաքում առկա կարևորագույն խնդիրը ո՞րն է, որ պատրաստվում եք լուծել ինքներդ ընտրվելու դեպքում։

– Նախևառաջ մինչև 2022 թ. հաշմանդամություն ունեցող անձանց համար արդեն իսկ առկա ավտոբուսների 40% (շուրջ 270 ավտոբուս), տրոլեյբուսների՝ 100% (շուրջ 77 տրոլեյբուս) հարմարեցումն է: Կարևոր եմ համարում նաև ստեղծել հայերեն ժեստերի լեզվի ուսուցման կենտրոն, որը կպատրաստի և կլիցենզավորի պրոֆեսիոնալ թարգմանիչներ և հնարավորություն կընձեռի հանրային ծառայությունների և կրթության ոլորտի անձանց անցնել ժեստերի լեզվի կարճաժամկետ դասընթացներ:

– Ինչո՞ւ եք միացել հենց այս քաղաքական ուժին։ Նիկոլ Փաշինյանի մե՞ջ եք տեսնում քաղաքի ղեկավարի իրական կերպարը։

– Այո, նրա մեջ եմ տեսնում քաղաքի ղեկավարի կերպարը, ով սեփական փորձով է ցույց տալիս, թե ինչպես պետք է հոգ տանել քաղաքի և քաղաքում ապրող մարդկանց մասին: «Ելքի» թիմն այն թիմն է, որը ազատ է ստրկամտությունից, կարևորում է մարդու իրավունքները և հավասար հնարավորությունները` բոլորի համար:

– Ձեր ծրագրում խոսվում է մետրոպոլիտենի կայարանների ավելացման մասին։ Երևանի բյուջեն նման հնարավորությունների տնօրինո՞ւմ է, որպեսզի մի քանի տարվա մեջ կարողանա առնվազն մեկ կայարան կառուցել։

– Կայարանը, որը կարող է գործարկվել «Աջափնյակ» կայարանն է: Բարեկամության մետրոյից մինչև Հրազդանի կիրճը պատրաստ են կոմունիկացիոն թունելները և երթային թունելը, Աջափնյակում` միայն կոմունիկացիոն թունելները: Այսինքն` այստեղ մնում է երթային թունելի և կայարանի կառուցումը, ինչպես նաև կամուրջի կառուցումը, որը պետք է անցնի Հրազդան գետի վրայով և Աջափնյակը միացնի Արաբկիրին: Ֆինանսական առումով ամենաբարդ խնդիրը սա է:

– Այս ընտրություններում որպես Ձեր հիմնական մրցակից ո՞ւմ եք համարում՝ ՀՀԿ–ի՞ն, թե՞ «Երկիր ծիրանիին»։

– Մեր հիմնական մրցակիցը ՀՀԿ–ն է, քանի որ հենց ինքն է պատասխանատու Երևանում երկարատև անգործության և այն իրավիճակի համար, որն ունենք այսօր: Մեր նպատակը ՀՀԿ–ից Երևանի իշխանությունը վերցնելն է:

– Մեկ ամիս առաջ կայացած համապետական ընտրություններից առաջ բավական մեծ գումարներ դրվեցին «շրջանառության»։ Ինչպե՞ս եք պատրաստվում պայքարել ընտարակաշառքի դեմ։

– Ընտրակաշառքի դեմ պայքարում ենք քաղաքացիների շրջանում իրազեկությունը բարձրացնելով, խոսելով իրենց ձայնի կարևորության մասին: Քաղաքացին պետք է հասկանա, որ որոշում կայացնողը ինքն է և իր քվեից է կախված, թե ով կղեկավարի Երևանը, ումից ինքը հետագայում կկարողանա պահանջել իր բարեկեցության համար նպաստավոր պայմաններ:

– Երևանի բնակիչները ինչո՞ւ պիտի ընտրեն հենց «Ելքին»։ Ի՞նչ կարող է անել այն, որ չեն անի մյուս թեկնածու քաղաքական ուժերը։ Ձեր կուսակցության մի քանի առավելություններ կնշե՞ք։

– Աշխատանքների թափանցիկության ապահովումը և քաղաքացիների առջև հաշվետվողականությունն ամենակարևոր առավելություններից է, որը առաջարկում է մեր դաշինքը` քաղաքային իշխանությունը ստանձնելու դեպքում, ի տարբերություն իշխող ՀՀԿ–ի: Մեր ծրագիրը մշակվել է Երևանը սիրող և տարբեր ոլորտում արդեն փորձառություն ունեցող անձանց կողմից, ովքեր լավ ծանոթ են թե՛ միջազգային փորձին, թե՛ լավ ծանոթ են մայրաքաղաքի խնդիրներին իրենց սեփական փորձով:

– Ձեր ծրագրում գրված է, որ կսկսվի «Կանաչ տանիքների» ծրագրի իրագործումը և ձյունամաքրման նոր համակարգ կներդրվի: Կպատմե՞ք դրանց մասին:

– «Կանաչ տանիքների» ծրագրի իրագործումը ենթադրում է համատեղ ջանքերով մայրաքաղաքի բազմաբնակարան շենքերի և այլ նշանակության կառույցների տանիքների կանաչապատում, որտեղ որ դա հնարավոր է: Իսկ երկրորդի ժամանակ նախատեսվում է կիրառել հատուկ նյութեր, որոնցով փողոցները պատելուց հետո ձնամաքրման աշխատանքները ավելի արդյունավետ են իրականացվում:

Շարունակությունը` «Փաստ» օրաթերթի այսօրվա համարում