«Չեմ կարծում, որ եթե ՍԴ–ն մի գործ քննում է, պետք է քաղաքական ուժերն անգործության մատնվեն». «Փաստ»

«Փաստ» օրաթերթը գրում է.

«Փաստի» հարցազրույցը ՀՀԿ խոսնակ Էդուարդ Շարմազանովի հետ

– Պարոն Շարմազանով, եթե մինչ ՍԴ–ի որոշումը ՀՀԿ–ն բանակցություններ էր վարում ՀՅԴ–ի հետ քաղաքական կոալիցիայի շուրջ, չի՞ նշանակում, որ ՀՀԿ–ի համար արդեն իսկ կանխատեսելի էր ՍԴ որոշումը:

– Ես չեմ կարծում, որ եթե ՍԴ–ն մի գործ քննում է, պետք է քաղաքական ուժերն անգործության մատնվեն ու որևէ գործ չանեն: Մենք ունեցել ենք մեր կարծիքը, ընտրությունների վերաբերյալ մեր գնահատականը տվել ենք, միջազգային դիտորդական առաքելությունները իրենց գնահատականը տվել են, նախօրեին ԵՄ Հարավային Կովկասի ներկայացուցիչը նախագահ Սարգսյանի հետ հանդիպման ժամանակ շատ դրական էր գնահատել այս ընտրությունների կազմակերպումը և արդյունքների որակը, և մենք՝ որպես քաղաքական ուժ, ամեն օր պետք է ներկայացնենք մեր ծրագրերը: Իսկ ինչ որոշում էլ կայացներ ՍԴ–ն, մենք պարտավոր ենք այդ որոշմանը հնազանդվել:

– Սակայն ՍԴ–ն հնարավոր է անվավեր ճանաչեր ընտրությունների արդյունքները, իսկ դուք քաղաքական կոալիցիա էիք ստեղծում:

– Երբ որ ՍԴ–ն անվավեր ճանաչեր, էդ ժամանակ էլ կպատրաստվեինք նոր ընտրությունների: Ինչի՞ մասին է խոսքը:

– Քաղաքական իմաստով ՀՀԿ– ՀՅԴ կոալիցիան ավելի ֆորմալ բնույթ է կրում և թերևս միայն ՀՀԿ–ի համար է խնդիր լուծում՝ ՀՀԿ միակուսացական իշխանության ֆորմատը «կոտրելու» իմաստով:

– Շեշտադրումների հետ բացարձակ համամիտ չեմ: Նախ՝ համագործակցությունը երբեք չի լինում ֆորմալ: Այդ թվում նաև՝ ՀՀԿ–ի և ՀՅԴ–ի համագործակցությունը: Դա բովանդակային, ռազմավարական և ծրագրային համագործակցություն է: Այնպես չի, որ ՀՀԿ–ն ու ՀՅԴ–ն համագործակցում են բացառապես իրար մարտավարական առումներով պաշտպանելու համար: Մենք ունենք մեր ծրագիրը, ՀՅԴ–ն՝ իր, երկրում կան բազում խնդիրներ, բազում մարտահրավերներ, և հիմնականում այդ մարտահրավերները հաղթահարելու, խնդիրները լուծելու հարցերում մենք ունենք ընդհանուր գնահատականներ:

– Սակայն, քանի որ ՀՅԴ մասնակցությունը շատ փոքր է լինելու իշխանության մեջ, չի՞ նշանակում, որ ՀՅԴ–ն «կցորդի» կարգավիճակով օգնելու է ՀՀԿ–ին իրագործել միակուսակցական կառավարումը:

– Միակուսակցական պետության մասին խոսողներն ընդամենը քաղաքագիտական առումով ոչ կոմպետենտ են: Ի՞նչ է նշանակում՝ միակուսակցական կառավարում մի պառլամենտում, որտեղ պառլամենտի 1/3–ը ըստ Սահմանադրության օպոզիցիային է տրված, մի համակարգում, որտեղ օպոզիցիան ունի լուրջ իրավունքներ, ի՞նչ միակուսակցականի մասին է խոսքը: Եղել են նորմալ ընտրություններ: Եթե ժողովրդավարական երկրում հաղթում է մի ուժ և դառնում է իշխանություն, պետությունը դառնում է միակուսակցակա՞ն: Իշխանությունը միակուսակցական չի, իշխանությունն էսօր էլ երկկուսակցական է՝ ՀՀԿ–ից ու ՀՅԴ–ից կազմված կառավարություն: Վաղն ինչպիսի ֆորմատ կլինի, կոալիցիոն փաստաթուղթը կստորագրենք, կերևա: Դաշնակցությունը կայացած քաղաքական ուժ է, և մենք ունենալու ենք նորմալ, իրավահավասար հարաբերություններ: Մենք կցորդների հետ կոալիցիաներ չենք կազմում:

– Իսկ 2018–ին հնարավո՞ր է քննարկվի ավելի ընդլայնված կոալիցիա:

– Մենք ապրում ենք 2017–ին, և ես 2018–ի զարգացումների մասին չեմ կարող խոսել:

– Պարոն Շարմազանով, տեղեկություն կա, որ ԱԺ նախագահի հարցում Սերժ Սարգսյանը Ձեր թեկնածության վրա է կանգնել զուտ այն պատճառով, որ Տաշիրի Կարեն Կարապետյանը ավելի սերտ առնչություն ունի վարչապետի թիմի հետ, դրա համար Սերժ Սարգսյանը Ձեզ է վստահում:

– Նախ՝ ես չգիտեմ մամուլի հրապարակումները որտեղից են, որովհետև ՀՀԿ ԳՄ նիստերում ոչ միայն քննարկում, այլ առհասարակ որևէ ակնարկ չի եղել ԱԺ նախագահի, փոխնախագահների, հանձնաժողովի նախագահների և նախարարների նշանակման հարցում: Ուստի ո՛չ իմ, ո՛չ Գալուստ Սահակյանի, ո՛չ Արմեն Աշոտյանի և ո՛չ էլ այլ թեկնածություն չի քննարկվել: Ակնարկ էլ չի եղել: Ինչ վերաբերում է թիմերին, ՀՀԿ–ն մեկ միասնական ընտանիք է, որտեղ կա մեկ ղեկավար՝ Սերժ Սարգսյան: Խնդրում եմ, իմ գործընկերներին տարբեր թևերի մի վերագրեք, մենք մի միասնական օրգանիզմ ենք, էդ օրգանիզմն ունի մեկ ղեկավար՝ ի դեմս կուսակցության նախագահի:

– Տեղեկություններ կան, որ ՀՀԿ–ում անորոշ վիճակ է, քանի որ հայտնի չէ, ով է գնալու խորհրդարան, և պարզում են՝ ով ինչպես է ծախսել գումարները և որքան ձայն է բերել:

– Ես նախ՝ պաշտոնապես հերքում եմ, որ ՀՀԿ–ում որևէ մեկը դիմում է գրել, որովհետև մամուլը գրեց, որ ՀՀԿ–ում բոլորը դիմում են գրել: Որևէ մեկը ՀՀԿ–ում նախօրոք դիմում չի գրել՝ պատգամավորական մանդատից հրաժարվելով: Դիմում կգրեն նրանք, ովքեր կգնան գործադիր:

Շարունակությունը` «Փաստ» օրաթերթի այսօրվա համարում