ԵՄ–ում Ադրբեջանի նախկին դեսպան. «Ազգային մասշտաբի խայտառակություն է` ԼՂ հարցից հետո նշվում է «խավիարային դիվանագիտությունը» «Փաստ»

«Փաստ» օրաթերթը գրում է.

«Աշխատանքներ են ընթանում պատժամիջոցներ սահմանելու Ադրբեջանի իրավապահ մարմինների ղեկավարության, դատավորների, նաև դատախազության այն աշխատակիցների նկատմամբ, ովքեր անմիջական մասնակցություն ունեն երկրում մարդու իրավունքների կոպիտ ոտնահարման դեպքերի հետ»,– այս մասին հայտարարել է ԵՄ–ում Ադրբեջանի նախկին դեսպան, ներկայում Ադրբեջանցի քաղաքական վտարանդիների կազմակերպության (AND) համանախագահ Արիֆ Մամեդովը:

Նա անդրադարձել է ԵԽԽՎ պատգամավորների շրջանում կոռուպցիայի փաստի բացահայտմանն առնչվող գործի շարունակությանը: Հիշեցնենք, որ վերջերս փաստեր էին բացահայտվել առ այն, որ Ադրբեջանի ղեկավարությունը գործի է դնում, այսպես կոչված, «խավիարային դիվանագիտությունը», այն է` թանկարժեք նվերների, նույնիսկ գումարի միջոցով փորձում իր կողմ «թեքել» ԵԽԽՎ պատգամավորների: Ընդ որում, ԵԽԽՎ ղեկավար Պեդրո Ագրամունտը ևս համարվում է Ադրբեջանի իշխանությունների մտերիմ ընկերը, ով հնարավորության դեպքում արգելափակում է հայանպաստ որոշումները կամ էլ առաջ մղում ադրբեջանանպաստները:

Արիֆ Մամեդովի տեղեկացմամբ` ԵԽ գլխավոր քարտուղար Թորբյորն Յագլանդը մարտի 24–ին նամակ է ուղարկել ԵԽԽՎ նախագահ Ագրամունտին` հորդորելով չձգձգել ԵԽԽՎ պատգամավորների շրջանում կոռուպցիայի փաստերի հետաքննության հարցով արտաքին անկախ հանձնաժողովի ստեղծման հարցը: Ընդ որում, «ԵԽ գլխավոր քարտուղարը չի թաքցնում իր վրդովմունքն առ այն, որ Պեդրո Ագրամունտը, ով Ադրբեջանի իշխանությունների ընկերն է, բոլոր հնարավոր և անհնարին ճանապարհներով փորձում է հետաձգել այդ հարցով որոշումը»,– նշել է Մամեդովը:

«Յագլանդը փորձառու քաղաքական գործիչ է: ժամանակին եղել է Նորվեգիայի վարչապետը, Նոբելյան հանձնաժողովի ղեկավարը ու հրաշալի հասկանում է, որ «խավիարային դիվանագիտության» հետ կապված սկանդալը եվրոպացի շատ քաղաքական գործիչների կհեռացնի քաղաքական ասպարեզից:

Կարծում եմ, գլխավոր քարտուղարը հասկանում է, որ հասունացել է մեծ վճռականություն և համառություն դրսևորելու ժամանակը, որպեսզի պահպանի իր քաղաքական դեմքը»,– ասել է Մամեդովը:

«Ավելի քան համոզված եմ, որ գլխավոր քարտուղարը նույնպիսի վճռականություն կդրսևորի նաև այն հարցում, որ Ադրբեջանը մինչս օրս չի կատարում Մարդու իրավունքների եվրոպական դատարանի որոշումը` անմիջապես ազատ արձակելու Իլգար Մամեդովին (վերջինս «Հանրապետական այլընտրանք»` REAL ընդդիմադիր շարժման ղեկավարն է, ով 2013 թ. դատապարտվել է 7 տարվա ազատազրկման Իսմայիլում անկարգություններ կազմակերպելու մեղադրանքով – խմբ.):

Նախկին դեսպանն ընդգծել է, որ ԵԽԽՎ ապրիլյան նստաշրջանում սպասվում են շատ անակնկալներ, և շատերը պատրաստվում են դրան:

Ըստ Մամեդովի` Ադրբեջանում կոռուպցիան հասել է այնպիսի մակարդակի, որ «Wikipedia»–ում այդ երկրի արտաքին քաղաքականության մասին պատմող ենթաբաժնում ԼՂ հակամարտությունից հետո երկրորդ կետով նշվում է «խավիարային դիվանագիտությունը»:

«Դուք պատկերացնո՞ւմ եք, թե որքան կրիտիկական է վիճակը: Դա խայտառակություն է և ազգային մասշտաբի ողբերգություն, երբ ղարաբաղյան հակամարտության մասին տեղեկությունից անմիջապես հետո տեղադրվում է տեղակատվություն «խավիարային դիվանագիտության» մասին»,– ասել է Մամեդովը:

Ավելին, նրա խոսքով` այսօր արդեն Ադրբեջանի իշխանությունների հետ ոչ ոք չի ցանկանում ձեռք սեղմել: «Բաքու չեն այցելում մեծ երկրների, անդրազգային կորպորոցիաների ղեկավարներ: Նույնիսկ «British Petroleum» ընկերությունը, որը երկրի տարածքում գործող ամենախոշոր ընկերությունն է, Ադրբեջանի նախագահի հետ հանդիպման է ուղարկում իր երկրորդ կամ երրորդ կարգի աշխատակիցներին»,– հայտնել է նախկին դեսպանը:

Շարունակությունը` «Փաստ» օրաթերթի այսօրվա համարում: