Առավել հաճախ կրկնվող խախտումներն ու անձինք. «Փաստ»

«Փաստ» օրաթերթը գրում է.

Ապրիլի 2–ի խորհրդարանական ընտրությունների ժամանակ ԱՊՀ և միջազգային դիտորդական կազմակերպություններից բացի նմանօրինակ առաքելություն են իրականացրել նաև տեղական հասարակական կազմակերպությունները: Տեղական դիտորդներին այս անգամ հաջողվել է գրեթե բոլոր ընտրական տեղամասերում վերահսկել ընտրությունների ընթացքը:

«Թրանսփարենսի Ինթերնեշնլ» հակակոռուպցիոն կենտրոն հասարակական կազմակերպությունում ներկայացրած փաստերի մեկտեղման արդյունքում ստացվել է առավել հաճախակի կրկնվող խախտումների, խախտման կարգավիճակի, խախտում թույլ տված անձանց և բողոքարկումների ընդհանուր պատկերը:

Համաձայն այդ տվյալների՝ առավել հաճախ կրկնվող խախտումներից է եղել տեխնիկական սարքերի խափանումը կամ բացակայությունը՝ 180 դեպք, ընտրողի կողմից քվեարկության գաղտնիությունը չպահպանելը՝ 141 դեպք:

Ընտրողներին հուշելու կամ ուղղորդելու դեպքերի թիվը 107 է եղել, որը կազմում է գրանցված ընդհանուր խախտումների 5,4%–ը:

Վկայական չունեցող կամ տեղամասում թույլատրելի քանակից ավելի շատ ընտրողներ լինելու դեպքերը կազմել են 91, իսկ ընտրական տեղամասին կից մարդկանց կամ մեքենաների կուտակվելու դեպքերը 125–ն են եղել:

Խախտումների 50,8%–ը և 11,9%–ը համապատասխանաբար կազմել են «մնացած» և «այլ» տողով առանձնացված խախտումները: Դրանք վերաբերել են ընտրատեղամասը հոսանքազրկելուն, քվեարկության արդյունքների կեղծման դեպքերին, երբ, օրինակ, ձայները հաշվարկվել է 4 անգամ և ամեն անգամ ՀՀԿ–ն հավաքել է տարբեր ձայներ։ Բայցի այդ, ամեն վերահաշվարկի արդյունքում ՀՀԿ–ի ձայների թիվը 660–ից աճել է մինչև 674:

Նմանատիպ իրավիճակ պատահել է նաև «Ծառուկյան» դաշինքի հետ, երբ այս անգամ ձայները նվազել են՝ 304–ից հասնելով 294–ի։ Փոփոխություններ են եղել նաև կուսակցական և ռեյտինգային հաշվարկներից հետո, որոնք գրանցամատյանում այդպես էլ են գրանցվել:

Գրանցված 1971 խախտումներից 626–ը կամ՝ 31,8%–ը վերացվել է, 530–ը, կամ՝ 26,9%–ը չի վերացվել, իսկ մնացածի «ճակատագիրը» հայտնի չէ:

Ի դեպ, ըստ տեղական դիտորդների կողմից գրանցված արձանագրությունների, խախտումներ թույլ տված անձանցից 322–ը, կամ որ նույնն է՝ 16,3%–ը, տեղամասային ընտրական հանձնաժողովների նախագահներն են եղել, 262–ը, կամ՝ 13,3%–ը եղել են ընտրողները, 114–ը կամ՝ 5,8%–ը հանձնաժողովի անդամներն են եղել: 899 դեպքում էլ դիտորդներին չի հաջողվել պարզել խախտում թույլ տված անձանց ինքնությունը:

Շարունակությունը` «Փաստ» օրաթերթի այսօրվա համարում: