Արվեստագետների աշխատավարձերի բարձրացում, պատմամշակութային կոթողների վերականգնում. ապագա պատգամավորների խոստումները. «Փաստ»

«Փաստ» օրաթերթը գրում է.

Խորհրդարանական ընտրություններին ընդառաջ դրանց մասնակցող բոլոր քաղաքական ուժերն ունեն իրենց ծրագրային տեսլականները։ Թե որ կուսակցության կամ դաշինքի ծրագրում մշակույթին առնչվող ինչպիսի առաջարկներ կան, փորձել է պարզել «Փաստը»։
«Ծառուկյան» դաշինքը մտադիր է առաջիկա 10 տարիներին վերականգնել ՀՀ տարածքում գտնվող պատմամշակութային բոլոր կոթողները` սահմանելով դրանց առաջնահերթությունները: Միաժամանակ բացառիկ ծրագրերի ներդրմամբ՝ ձեռնարկել Արևմտյան Հայաստանում հայկական պատմա–մշակութային կոթողները վերականգնելու և պահպանելու նախագծեր:
Հայաստանի «Հանրապետական» կուսակցությունը նախատեսում է մարզերում մշակույթի համաչափ զարգացման խնդիրների լուծման համար իրականացնել «Մշակույթը մարզերում» ծրագիրը, արդիականացնել ոլորտում դրամաշնորհային ծրագրերի իրականացման և պետական պատվերի տեղադրման մեխանիզմները։ Ինչպես նաև փոխել ժամանակակից հայ գրողներին պետական աջակցության տրամադրման ձևաչափն ու սկզբունքները. աջակցությունը տրամադրել ոչ թե ուղղակիորեն գրքի հրատարակմանը (բացառությամբ առաջին գրքերի և սփյուռքահայ գրականության), այլ գրողի և նրա ստեղծագործության ճանաչելիության բարձրացմանը:
«Հայկական վերածնունդը» իշխանության գալու դեպքում Երևանում և մարզերում մշակութային օջախների պայմանները կբարելավի և ժամանակակից ցանց կձևավորի: «Մշակույթի և սպորտի ոլորտներում ժամանակակից շուկայական մեխանիզմների ձևավորում, օտարերկրյա ներդրումների ապահովում, մասնավորապես կինեմատոգրաֆիայի բնագավառում, որի տարեկան շրջանառությունն աշխարհում կազմում է միլիարդավոր դոլարներ»,– ասված է նրանց նախընտրական ծրագրում:
Կոնգրես–ՀԺԿ դաշինքը գտնում է, որ պետք է բացառել վարչական միջամտությունը ստեղծագործական գործընթացներին և մշակութային քաղաքականության մեջ ապահովել բազմաձև մասնակցության հնարավորություններ։ Ըստ նրանց՝ պետք է պետական հոգածության ներքո պահել ազգային փոքրամասնությունների մշակութային և լեզվական բազմազանությունը՝ այն դիտարկելով որպես Հայաստանի մշակութային միջավայրի բաղկացուցիչ: Վերացնել պետական արտոնյալ հովանավորչությամբ մշակույթի գործիչների «արժևորումը»։ Հրաժարվել պետության կողմից զանազան տիտղոսներ և կոչումներ շնորհելու պրակտիկայից:
«ՕՐՕ» դաշինքի նախընտրական ծրագրում էլ կարդում ենք, որ հանրակրթական դպրոցներում դասավանդվող հիմնական լեզուն պետք է լինի հայերենը՝ բացառությամբ այն դեպքերի, երբ գործ ունենք հատուկ օտարերկրացիների համար բացվող կրթական հաստատությունների հետ: Նրանց՝ իշխանության ղեկին լինելու դեպքում պարբերական մամուլն ու գրահրատարակչությունները կազատվեն ավելացված արժեքի հարկից: Վերջինները նաև պատրաստվում են վերականգնել և արդիականացնել համայնքային, առավելապես գյուղական բնակավայրերի մշակույթի տների համակարգը` դրանք դարձնելով ժամանակակից պահանջներին համապատասխանող կենտրոններ և ապահովել դրանց լիարժեք գործունեությունը:
«Ազատ դեմոկրատների» նախընտրական ծրագրի մշակութային հատվածում էլ ասվում է, որ պետք է աշխուժացնել մշակութային կյանքը մարզերում, 5 տարվա ընթացքում պետություն–մասնավոր հատված համագործակցության ճանապարհով վերականգնել և արդիականացնել համայնքային մշակույթի տները։ Ինչպես և նախորդ դաշինքի նախընտրական ծրագրում էր ասված, «Ազատ դեմոկրատները» նույնպես ցանկանում են դրանք դարձնել ժամանակակից պահանջներին համապատասխանող ու մատաղ սերնդի և երիտասարդության մշակութային կրթության կենտրոններ: «Խթանել մշակութային համագործակցություն հայկական սփյուռք ունեցող և հատկապես ԵՄ անդամ երկրների հետ, օգնելով մեր արվեստագետներին ու մշակութային գործիչներին ավելի լավ ինտեգրվելու եվրոպական ընդարձակ տարածքում, ներկայացնելու հայկական մշակույթը աշխարհում ու նրանց ինքնաիրացման համար բացելով ավելի մեծ հնարավորություններ և հեռանկարներ: Խթանել գրահրատարակչության, թատերական արվեստի ու մյուս ճյուղերի զարգացումը: Բարձրացնել մշակույթի ոլորտի աշխատակիցների աշխատավարձերը տնտեսական զարգացման տեմպերին համընթաց, նրանց կատարած հայրենանվեր աշխատանքի արժանավույնս գնահատմամբ»,– ասված է կուսակցության նախընտրական ծրագրում:
«ԵԼՔ» դաշինքի, ՀՅԴ և Կոմունիստական կուսակցությունների նախընտրական ծրագրերի էլեկտրոնային տարբերակներում մշակույթին առնչվող առաջարկներ մենք չգտանք։

Շարունակությունը` «Փաստ» օրաթերթի այսօրվա համարում: