Էլեկտրաէներգիայի գնի նվազեցում, ՀՆԱ–ի աճ. ինչ են խոստանում կուսակցությունները. «Փաստ»

«Փաստ» օրաթերթը գրում է.

Տնտեսական ինչպիսի խոստումներ է տվել այս կամ այն կուսակցությունը կամ կուսակցությունների դաշինքը, փորձել է իր ընթերցողին ներկայացնել «Փաստը»։ Եվ այսպես ամեն ինչ հերթականությամբ։
Հայաստանյան իշխանության ղեկն իր ձեռքում պահող «Հանրապետական» կուսակցությունը գտնում է, որ Հայաստանի տնտեսությանը անհրաժեշտ են արդյունավետ լուծումներ: Թե մինչ այս այդ արդյունավետ լուծումների տեղը կամ ձևը ՀՀԿ–ին հայտնի էր, թե՝ ոչ, դժվար է կռահել։ Ամեն դեպքում իրենք համոզված են, որ պետք է ձևավորվի այնպիսի միջավայր, որտեղ տեղական արտադրությունն իր որակյալ և միաժամանակ հասանելի ապրանքատեսակների հաշվին շուկայում կփոխարինի ներմուծվող ապրանքներին: ՀՀԿ–ի տնտեսական քաղաքականության օրակարգի առաջին հորիզոնականում են գտնվում ներդրումային միջավայրի հետագա բարելավումն ու նոր ներդրումների ներգրավումը, տնտեսավարող սուբյեկտներին, այդ թվում՝ ՓՄՁ–ներին, անհրաժեշտ օժանդակության և տնտեսական խթանների տրամադրումը, տնտեսական կյանքում հավասար մրցակցային պայմանների ապահովումն ու հովանավորչության վերացումը և այլն։
«Կոնգրես–ՀԺԿ» դաշինքն իր նախընտրական ծրագրում ներառել է ազատ և հավասար մրցակցություն հաստատելու, մենաշնորհների և օլիգոպոլիաների դեմ արդյունավետորեն պայքարելու մասին լոզունգներ։ Ըստ իրենց՝ շահութահարկի, եկամտահարկի և ավելացված արժեքի հարկերի դրույքաչափերը կսահմանվեն 15 տոկոս: «Վերացնել ավելացված արժեքի հարկի գանձումը սահմանում: Ներդրումների խրախուսման նպատակով, 1–5 միլիոն ԱՄՆ դոլարի հասնող ներդրում կատարած ընկերություններին 2 տարով, իսկ 5 միլիոնից ավելի ներդրում կատարածներին՝ 5 տարով ազատել շահութահարկից: Գազի ու էլեկտրական էներգիայի սակագները նվազեցնել 25%–ով: Առնվազն երկու անգամ նվազեցնել երթևեկության կանոնների խախտման համար գանձվող տուգանքները»,– ասված է նրանց ծրագրում։
Ըստ «ՕՐՕ» դաշինքի նախընտրական ծրագրի՝ արհեստական մենաշնորհների համակարգը կվերացվի, կձևավորվի մրցակցային դաշտ այն ոլորտներում, որտեղ այսօր իշխում է արհեստական մենաշնորհը, բարենպաստ պայմաններ կստեղծվեն օտարերկրյա և տեղական ներդրումների համար, ավելացված արժեքի հարկը կդառնա 18 տոկոս։ Միաժամանակ իշխանության գալով՝ դաշինքը նպատակ ունի բարձրացնել ավտոմոբիլային ճանապարհների ասֆալտե ծածկույթի հանդեպ ներկայացվող պահանջները: «Ավելացնելով դրա գինը ընդամենը 3%–ով՝ գործողության ժամկետը հնարավոր է կրկնապատկել»,– գտնում են նրանք։
«ԵԼՔ» կուսակցությունների դաշինքն էլ մեծամասնություն կազմելու դեպքում նախատեսում է Հայաստանը բարձր տեխնոլոգիական–արդյունաբերական երկիր դարձնել։ «150 և ավելի աշխատող ունեցող տեղեկատվական տեխնոլոգիաների ոլորտի ընկերությունները կազատվեն շահութահարկից: Արտադրական հոսքագծերի և օժանդակ սարքավորումների ներմուծումը կազատվեն ԱԱՀ–ից և մաքսատուրքից երկու տարի ժամկետով, իսկ էլեկտրամոբիլների ներկրումը և վաճառքը՝ առհասարակ»,– կարդում ենք «ԵԼՔ»–ի նախընտրական ծրագրում։ Վերջինները նաև խոստանում են Սյունիքի մարզում մետաղաձուլական գործարան ստեղծել և էլեկտրաէներգիայի և գազի սակագները 10–15 տոկոսով նվազեցնել։
«Հայկական վերածնունդն» էլ պատրաստվում է վերացնել արագաչափերն ու կարմիր գծերը, իսկ անվտանգության նպատակով գանձվող գումարների առավելագույն չափը սահմանել 1000 դրամ: «Իրան–Հայաստան–Վրաստան–Ռուսաստան էներգետիկ համակարգի զարգացում: Նոր ատոմային էներգաբլոկի, աղբավերամշակման գործարանների կառուցում: Թափոնների, քամու, արևի, կինետիկ և այլ այլընտրանքային էներգիայի աղբյուրների կիրառման ժամանակակից տեխնոլոգիաների ներդրում։ «Նաիրիտի» և «Վանաձորի քիմպրոմի» սնանկացման գործընթացի կասեցում, վերագործարկման ռազմավարական ծրագրի մշակում և միջազգային ներդրումային մրցույթի հայտարարում»,– գրված է Արթուր Բաղդասարյանի կուսակցության նախընտրական ծրագրում:
«Հայ Յեղափոխական Դաշնակցությունը» մտադիր է ստեղծել արդար պայմաններ ձեռնարկատիրությամբ զբաղվելու համար: Ըստ դաշնակների՝ անհրաժեշտ է առավել ակտիվորեն աջակցել ձեռնարկություններին, նրանց հետ ստեղծել համատեղ ընկերություններ, տրամադրել վենչուրային ֆինանսավորում, փոխառություններ և այլ արտոնություններ, աջակցել հայրենական արտադրողին: Միաժամանակ ուժեղացնել մենաշնորհների և անբարեխիղճ մրցակության դեմ պայքարը՝ խստացնելով մրցակցության համար պատիժների համակարգը և երաշխավորելով ազատ մուտքը շուկա:
«Ծառուկյան» դաշինքը առաջարկում է 2018 թ. ապահովել ՀՆԱ–ի 6% և ավելի իրական աճ, փոխել հարկային օրենսդրությունը, բարձրացնել փոքր և միջին ձեռնարկատերերին շրջանառության հարկով հարկելու շեմը մինչև տարեկան 150 մլն դրամ: Վերջինս նաև հավաստիացնում է, որ իր մեծամասնություն լինելու դեպքում, առաջիկա 5 տարիներին տարեկան մինչև 30 մլն դրամ շրջանառություն ունեցող տնտեսավարող սուբյեկտները կազատվեն հարկերից:
«Ազատ դեմոկրատների» նախընտրական ծրագիրը նույնպես տնտեսական խոստումնալից առաջարկներ է պարունակում։ «Գյուղատնտեսական մթերքներ արտադրող ֆերմերային տնտեսությունները վճարում են շրջանառվող հարկի 3%–ի չափով՝ 150 մլն դրամի շեմի դեպքում։ Գյուղատնտեսական ձեռնարկությունները 150 մլն դրամ շեմից վերև հարկվում են սովորական կարգով։ Գյուղացիական տնտեսությունների, ֆերմերային տնտեսությունների և գյուղատնտեսական ձեռնարկությունների համար կկիրառվի հողի հարկի համակարգը՝ ելնելով հողի կադաստրային արժեքից»,– խոստանում են նրանք։
Կոմունիստներն էլ իրենց նախընտրական ծրագրում խոստացել են ՀՆԱ–ի 7–8% տարեկան աճ ապահովել, Շիրակը՝ որպես աղետի գոտի, և Տավուշը՝ որպես սահմանային մարզ, ազատ տնտեսական գոտի հայտարարել՝ այդ մարզերում տնտեսությունը զարգացնելու նպատակով։ Վերջինների համոզմամբ, բնակարանային կոմունալ ծախսերը չպետք է գերազանցեն բնակչության եկամուտների 10–15%–ը։

Շարունակությունը` «Փաստ» օրաթերթի այսօրվա համարում: