Նախորդ տարի դատապարտվել է 65 պաշտոնյա և 483 զինվորական. «Փաստ»

«Փաստ» օրաթերթը գրում է.

Ըստ ՀՀ դատական դեպարտամենտի ամփոփ տեղեկատվության, հանրապետությունում 2016թ. դատապարտվածների թվաքանակը կազմել է 2 հազար 533 մարդ (199–ը` կանայք), նրանցից 83–ը` անչափահաս (7–ը` աղջիկ):

286 անձանց վերաբերյալ գործերը կարճվել են, 69 անձ արդարացվել է, 46 անմեղսունակների նկատմամբ կիրառվել են բժշկական բնույթի հարկադրական միջոցներ: Այս մասին հաշվետվությունը ներկայացված է Ազգային վիճակագրական ծառայությանը:

Ազատազրկված դատապարտվածների թվաքանակը կազմել է 1 449 մարդ: Դատապարտվածների ընդհանուր թվաքանակից 869–ի նկատմամբ նշանակված պատիժը պայմանականորեն չի կիրառվել (37–ը՝ անչափահաս), 21–ի նկատմամբ կիրառվել է համաներման ակտ:

Ըստ վիճակագրության` դատապարտվածների մեծ մասը պատկանում է 18–29 և 30–49 տարիքային խմբերին: Միաժամանակ դատապարտվածների ճնշող մեծամասնությունը չաշխատողներն ու չսովորող աշխատունակներն են եղել` 1457 հոգի: Նախորդ տարի նախկին կալանավորվածներից 51–ն է կրկին դատապարտվել, զինվորական ծառայություն իրականացնողներից 483–ը, ինչպես նաև 65 պաշտոնատար անձ:

Նախորդ տարվա հանցագործությունների մեջ գերակշռել են սեփականության դեմ ուղղված հանցագործությունները, դրանց թիվը կազմել է 736: Դրանից հետո շատ են եղել բնակչության առողջության դեմ ուղղված հանցագործությունները, այն է` 295 դեպք:

Դատապարտվածներից 2473–ը ՀՀ քաղաքացի են, 56–ը` օտարերկացի և 4–ն էլ քաղաքացիություն չունեն:

Նշված 2533 դատապատվածից 38–ը ալկոհոլի, թմրամիջոցների կամ թմրեցնող այլ նյութերի ազդեցության տակ են գտնվել, 164–ը մի խումբ անձանց կազմում, իսկ 25–ն էլ` կազմակերպված խմբի կամ հանցավոր համագործակցության կազմում:

Ըստ հանցագործությունների պատժատեսակի` դատապարտվածների 1449–ը դատապարվել են ազատազրկման, 806–ը տուգանք են վճարել, 71–ը կարգապահական գումարտակում են հայտնվել, 31–ը զինվորական ծառայության մեջ սահմանափակման են ենթարկվել, 157–ը կալանավորվել, իսկ 19–ի նկատմամբ էլ կիրառվել է դաստիարակչական բնույթի պատժամիջոց:

2016 թ. դատապարտվածներից միայն մեկն է ցմահ ազատազրկում ստացել, մեկն էլ 15–20 տարվա ազատազրկման դատապարտվել: Վիճակագրությունից նաև տեղեկանում ենք, որ նախորդ տարի դատապարտվածների մեծ մասը` 830 հոգի, Երևանից են: Երկրորդ տեղում է Սյունիքի մարզը, այնուհետև` Կոտայքի մարզը: Նախորդ տարի ամենից քիչ դատապարտվածներ եղել են Արագածոտնի մարզից:

Մայրաքաղաքն առաջատար է նաև անչափահաս դատապարտվածների թվով, նախորդ տարի Երևանում անչափահաս դատապարտվածների թիվը կազմել է 36, երկրորդ տեղում է Կոտայքի մարզը, որտեղ նախորդ տարի եղել են 14 անչափահաս դատապարտված:

Շարունակությունը` «Փաստ» օրաթերթի այսօրվա համարում: