Շատրվանների գործարկումը մարտին կամ իրանական Նովրուզը Հայաստանում. «Փաստ»

«Փաստ» օրաթերթը գրում է.

Նովրուզի օրերին՝ մարտի 19–ից ապրիլի 3–ն ընկած ժամանակահատվածում, նախատեսվում է Երևանի Հյուսիսային պողոտայում տոնական հյուրասիրություն և Նովրուզի տոնավաճառ կազմակերպել: Ինչպես նաև իրանցի հյուրերի համար նշված ժամանակահատվածում Երևանի Հանրապետության հրապարակի շատրվանները կգործարկվեն: Այս մասին տեղեկացնում են Զբոսաշրջության պետական կոմիտեից՝ ի պատասխան «Փաստի» հարցմանը:

Վերջին տարիներին դինամիկ զարգացել է իրանական շուկան և ակտիվություն է նկատվել Իրանից Հայաստան զբոսաշրջային այցելությունների ոլորտում: 2009–16 թթ. Իրանից Հայաստան ժամանումների թիվն ավելացել է ավելի քան 2 անգամ: Այսպես 2009 թ.–ին Հայաստան էր այցելել 87 հազար 214, իսկ արդեն նախորդ տարի՝ 188 հազար 851 զբոսաշրջիկ:

Նշենք, որ միաժամանակ ավելացել են նաև հունվար–մարտ ամիսներին Իրանից Հայաստան եկող զբոսաշրջիկների թիվը: Ի դեպ 2016 թ.–ին 2015 թ. նույն ժամանակահատվածի նկատմամբ դեպի Հայաստան իրանցի զբոսաշրջիկների հոսքն ավելացել է 45%–ով: 2015 թ. հունվար–մարտ ամիսներին Հայաստան է այցելել 26 հազար 380, իսկ 2016 թ.՝ 38 հազար 415 զբոսաշրջիկ: Իսկ միայն մարտ ամսին Հայաստանի սահմանային անցման կետերով Իրանից Հայաստան ժամանումների թիվը անգամ կրկնապատկվել է: Մասնավորապես նախորդ տարվա մարտին 2015 թ. մարտ ամսվա համեմատությամբ Հայաստան այցելած իրանցի զբոսաշրջիկների 50 տոկոսից ավելի աճ է գրանցվել: Ավելի ստույգ՝ թիվն ավելացել է 53,9%–ով:

Միաժամանակ, Հայաստանում արդեն իսկ զբոսաշրջային սեզոնը երկարաձգվել է և ակտիվ զբոսաշրջային սեզոնը մեկնարկվում է մարտ ամսից (ապրիլ ամսվա փոխարեն) հիմնականում շնորհիվ Իրանից Հայաստան այցելությունների: Վերջինները մարտ ամսին տոնում են իրենց Ամանորը՝ Նովրուզը, և նախընտրում են այն անցկացնել Հայաստանում:

Ըստ Զբոսաշրջային պետական կոմիտեի՝ զբոսաշրջային այցերի ավելացմանն է նպաստել նաև 2016 թ. հունիսի 5–ին ՀՀ և ԻԻՀ Կառավարության միջև ստորագրված քաղաքացիների՝ առանց մուտքի արտոնագրի այցելությունների մասին փոխըմբռնման հուշագիրը:

Նովրուզի օրերին՝ մարտի 15–ից ապրիլի 3–ը ընկած ժամանակահատվածում, նախատեսվում է Հայաստանի և Երևանի վերաբերյալ պարսկերեն զբոսաշրջային ամսագրեր տեղադրել ՀՀ սահմանային անցման կետերում` մասնավորապես Մեղրու անցակետի սպասասրահում տեղակայված առանձին վահանակի վրա և դրանց՝ Հայաստան ժամանող իրանցի զբոսաշրջիկներին անվճար տրամադրում:

Զբոսաշրջության պետական կոմիտեն մտադիր է պարսկերեն շնորհավորական, տեղեկատվական և Հայաստանի գրավչությունները ներկայացնող պաստառներ տպագրել և տեղադրել Երևան–Մեղրի ավտոճանապարհին: Նովրուզի օրերին Երևան–Մեղրի ավտոճանապարհի լուսավորության ու բարեկարգման աշխատանքներ կիրականացվեն, ճանապարհների անվտանգության ապահովման նպատակով տեսանելի վայրերում շարժական շտապօգնության մեքենաներ և արագ արձագանքման համակարգեր (թեժ գիծ) կլինեն:

Ըստ հարցման պատասխանի՝ 2013 թ. ՀՀ սահմանային անցման կետերում իրականացված վիճակագրական հետազոտության տվյալների համաձայն` մեկ ներգնա զբոսաշրջիկի մեկ այցելության ընթացքում միջին ծախսը գնահատվում է շուրջ 726 ԱՄՆ դոլար, առանց միջազգային տրանսպորտի: Միաժամանակ հաշվի առնելով, որ այդ տվյալները ձևավորվել են 2013 թ. հետազոտության արդյունքում՝ այսօրվա ենթակառուցվածքների զարգացման և զբոսաշրջային արդյունքի դիվերսիֆիկացման գործընթացում, ներգնա զբոսաշրջիկի միջին ծախսերը կազմում են շուրջ 800 ԱՄՆ դոլար:

Եթե դիտարկենք նախորդ տարվա տվյալները և այն, որ միայն 2016 թ. մարտ ամսին Հայաստան է այցելել մոտ 30 հազար իրանցի զբոսաշրջիկ, ապա խոսքը գնում է 24 միլիոն դոլարի մասին, ինչն այս տարի ամենայն հավանականությամբ դեռ կավելանա: Ու այստեղ բնավ էական չէ, թե զբոսաշրջիկը ինչ ազգություն, կրոնական դավանանք կամ աշխարհընկալում ունի: Կարևորը՝ նրանք Հայաստան գումար են բերում և զարկ տալիս մեր զբոսաշրջությանը:

 Շարունակությունը` «Փաստ» օրաթերթի այսօրվա համարում: