Հանքերը շարունակում են իշխանությունների աքիլլեսյան գարշապարը մնալ. «Փաստ»

«Փաստ» օրաթերթը գրում է.

Իրականացված օպտիմալացման ծրագրերի շրջանակներում, կառավարության որոշման համաձայն, ՀՀ էներգետիկ ենթակառուցվածքների և բնական պաշարների նախարարության ենթակայության տակ գործող մի շարք կառույցների միավորմամբ ստեղծվել է ընդերքի գործակալություն։ Կառույցում ներառվել են ընդերքի տրամադրման և օգտակար հանածոների պաշարների գործակալությունները, նախարարության ընդերքի վարչությունը:
Այս քայլն ուղղված է ոլորտում իրականացվող գործառույթների լիարժեք իրականացմանն ու գործունեության արդյունավետության բարձրացմանը: Ու թվում է, թե իրականում հենց այս գործակալության պակասի հետևանքով է այսքան ժամանակ ընդերքը թալանվել, իսկ շրջակա միջավայրը վայրագաբար թունավորվել:
Ինչ սպասել այս գործակալությունից, կերևա առաջիկայում: Հիմա ընդգծենք, որ ոլորտում այնքան խնդիրներ են կուտակվել, որ հազիվ թե դրանք նոր ստեղծված գործակալության շնորհիվ կարճ ժամանակում լուծվեն, բայց պարադոքսն այն է, որ մյուս կողմից էլ շատ սպասելու ժամանակ չկա, քանի որ օր օրի վիճակը վատանում և սաստկանում է:
Հայաստանը որպես լեռնային երկիր ունի ապարներ, որոնք պարունակում են թանկարժեք, հազվագյուտ և կիսաթանկարժեք մետաղներ: Հանքարդյունաբերության ոլորտը հարկային դաշտ բերելուց հետո միայն հնարավոր կլինի պարզել, թե որ հանքն է շահավետ շահագործել, որը՝ ոչ: Եվ այն միլիարդավոր դոլարների օգուտը, որն այսօր հիմնականում ընդդիմադիր դաշտի քաղաքական ուժերի ներկայացուցիչները հաշվում և որպես նախընտրական թեզեր ներկայացնում են ժողովրդին, այն գումարն է, որն իրականում ստացվում է հանքարդյունաբերության ոլորտը հանցագործ ճանապարհով հարկային դաշտից հանելով և Հայաստանի ընդերքը կողոպտելով:
Ոլորտի փորձագետների կարծիքով, եթե նույնիսկ ապօրինի հանված հանքանյութից ստացվող եկամուտը ժողովրդին ծառայեր, պատկերը բոլորովին այլ կլիներ: Սակայն այսօր ամբողջությամբ այն գնում է որոշ պաշտոնյաների և նրանց հովանավորող միջազգային կազմակերպությունների գրպանը: Են իրականում Հայաստանը կազմաքանդվում է հանքարդյունաբերության ոլորտում վարվող սխալ և կործանիչ քաղաքականության պատճառով:
Ի դեպ, ինչպես նախկին, այդպես էլ ներկա վարչապետի օրոք նշված ոլորտում շարունակվում է նույն քաղաքականությունը: Եվ ամենազավեշտալին այն է, որ այդպես էլ պարզ չի դառնում, թե ո՞ր օրենքով կամ ո՞ւմ պատվերով է օտարերկրյա ընկերություններին թույլ տրվել թալանել Հայաստանի ժողովրդին պատկանող ընդերքը, մարդկանց պատկանող հողերը պետական կարիքների անվան տակ, չնչին գումարների դիմաց խլել և դեռ մի բան էլ՝ առողջությունը կորցնելու վտանգի առջև նրանց կանգնեցնել:
Սեփական երկրի ու ժողովրդի հանդեպ իրականացվող ամենօրյա նման թշնամական վերաբերմունք չի ցուցաբերվում ոչ մի նորմալ երկրում, իսկ երկիրն ավերելով հանքերից հանված օգտակար հանածոներից ստացվող եկամուտների դիմաց ոչ մի գումար էլ չի մտնում պետբյուջե: Երբ հանքի պոչամբարը գյուղի տարածքին մոտ վայրում է գտնվում, ապա այդ դեպքում վարձակալական գումարներ են վճարվում տվյալ համայնքին, բայց այստեղ էլ պարզ չէ ում ինչքան են վճարում, և ուր են գնում այդ գումարները: Ու թեև հանքի շահագործման թույլտվության մեջ որոշ կետեր կան, որն իբրև թե պետք է իրականացնի տվյալ հանքատերը, սակայն իրականում ոչինչ էլ չի արվում: Ստացվում է, որ ներկայի հանքատերերը, հանքեր շահագործողներն ու իշխանությունները տեղի բնակիչների առողջության ու ապագայի հաշվին առանց որևէ պատասխանատվության ձեռք ձեռքի տված թալանում են երկրի ընդերքը: Եվ չի բացառվում, որ նոր ձևավորված գործակալությունը ոչ թե փորձի վերականգնել ժողովրդի ունեցվածքը, այլ՝ դառնա իշխանությունների սեփական գրպանի կայուն մատակարար, ոլորտում առկա կոռուպցիոն դրսևորումները դարձնելով ավելի համակարգված:

Շարունակությունը` «Փաստ» օրաթերթի այսօրվա համարում: