Նորընտիր խորհրդարանը ՀՀ վարչապետ չի ընտրի. «Փաստ»

«Փաստ» օրաթերթը գրում է.

ԱԺ արտահերթ ընտրությունների արդյունքներն ամփոփելու մասին որոշման հրապարակման ժամանակ հրապարակվում է նաև խորհրդարան անցած կուսակցություններին և կուսակցությունների դաշինքներին տրվող մանդատների քանակը: Պատգամավորական մանդատների թվի որոշման հրապարակման պահից սկսած ընտրություններին մասնակցած կուսակցությունները և կուսակցությունների դաշինքները կարող են արդյունքները բողոքարկել ՀՀ Սահմանադրական դատարանում:

Ընտրական օրենսգրքով սահմանված կարգով արդյունքները բողքարկելու ժամկետը սկսվում է հաշվարկվել որոշման հրապարակման պահից սկսած մինչև 5–րդ օրը, ժամը 18.00–ն ընկած ժամանակահատվածը: ԸՕ 100–րդ հոդվածի պահանջով կուսակցությունների և դաշինքների ընտրական ցուցակներում ընդգրկված թեկնածուներին մանդատներ տրամադրվում են ԿԸՀ արձանագրության համաձայն, որով և գրանցում են համապետական և տարածքային ցուցակներից ընտրված ԱԺ պատգամավորներին: Սա նույնպես իրականացվում է տրամադրվող մանդատների թվի արդյունքների հրապարակումից հետո սահմանված 5– օրյա ժամկետի ավարտից հետո, եթե կրկին մինչ այդ որևէ բողոք չի ներկայացվել Սահմանադրական դատարան:

Այսինքն, բողոքների վիճարկման ժամկետների հետ կապված Սահմանադրական դատարան դիմել–չդիմելուց է կախված մանդատների տրամադրման արձանագրության հրապարակման և, ըստ այդմ, ԱԺ կազմավորման օրը:

Այս պարզ հաշվարկների արդյունքում ստացվում է, որ մինչև դեկտեմբերի 21–ը ԿԸՀ–ն որևէ գործառույթ չի իրականացնելու, որից հետո արդեն ԸՕ–ով սահմանված կարգի համաձայն կիրականացնի թեկնածուների գրանցումը: ԿԸՀ–ի կողմից թեկնածուների գրանցումն իրականացնելուց հետո արդեն ԱԺ–ն կհամարվի կազմավորված և հենց այդ օրն էլ կհայտարարվի նաև ԱԺ առաջին նստաշրջանի առաջին նիստն անցկացնելու օրը:

ՀՀ Սահմանադրության, ինչպես նաև «ԱԺ կանոնակարգ» օրենքի համաձայն, նոր ընտրված խորհրդարանի առաջին նիստի օրը սահմանվում է ԱԺ կազմավորման օրվանից հետո երկրորդ երկուշաբթի օրը:

Կարճ ասած, եթե ՍԴ–ում ընտրության հետ կապված հարցեր չվիճարկվեն, ապա ԱԺ կազմավորման օրվանից հետո երկրորդ երկուշաբթի օրը կկայանա ԱԺ 7–րդ գումարման առաջին նստաշրջանի առաջին նիստը: ԵՊՀ սահմանադրական իրավունքի ամբիոնի վարիչ, սահմանադրագետ Վարդան Այվազյանը «Փաստի» հետ զրույցում նշեց, որ դեկտեմբերի 21–ին հաջորդող երկրորդ երկուշաբթին դեկտեմբերի 31–ն է, որը պաշտոնապես ոչ աշխատանքային օր է: Դրան հաջորդող երկուշաբթին՝ հունվարի 7–ը, կրկին ոչ աշխատանքային օր է: Այդ իսկ պատճառով էլ, եթե ամեն ինչ հարթ ընթանա, ապա ամենայն հավանականությամբ, 7–րդ գումարման ԱԺ առաջին նստաշրջանի անդրանիկ նիստը տեղի կունենա հունվարի 14–ին:

Ինչ վերաբերում է շրջանառվող մեկ այլ հարցին, ապա վարչապետի ընտրություն չի լինելու: Առաջին նիստի օրը վարչապետը նշանակվելու է ՀՀ նախագահի կողմից:

«7–րդ գումարման ԱԺ առաջին նիստի օրը ՀՀ նախագահի հրամանագրով ԱԺ մեծամասնություն կազմող խմբակցության կողմից առաջադրված վարչապետի թեկնածուն կնշանակվի ՀՀ վարչապետ: Այսինքն, մենք վարչապետի ընտրություն չենք ունենալու»,– ասաց Վ. Այվազյանը:

Խոսելով նախորդ՝ մի կողմից 2017–ին, մյուս կողմից՝ 2018–ին ԱԺ–ում վարչապետի ընտրություն իրականացնելու մասին, Վ. Այվազյանը նշեց, որ մինչ այդ նոր Սահմանադրությունն ամբողջությամբ չէր մտել ուժի մեջ և գործում էին անցումային դրույթները:

«Հիմա արդեն մենք անցումային դրույթներ չունենք և Սահմանադրությունն ամբողջությամբ մտել է ուժի մեջ: Ուստի, այսուհետ ՀՀ վարչապետը նշանակվելու է ՀՀ նախագահի կողմից: Այսինքն, անկախ այն հանգամանքից ԱԺ–ի հերթական, թե արտահերթ ընտրության արդյունքում է ձևավորվում խորհրդարանը, վարչապետը նշանակվում է, իսկ վարչապետի ընտրություն տեղի է ունենում գործող վարչապետի և կառավարության հրաժարական տալու դեպքում միայն, ինչը մենք ունեցել ենք այս տարի»,– ասաց Վ. Այվազյանը:

Պատասխանելով հարցին, որ՝ եթե ընտրությունների արդյունքներով մի կուսակցության չհաջողվի մեծամասնություն ունենալ, այդ դեպքում ՀՀ նախագահն ինչպե՞ս պետք է վարչապետին նշանակի, ԵՊՀ սահմանադրական իրավունքի ամբիոնի վարիչը պատասխանեց.

«Երբ որևէ կուսակցություն մեծամասնություն չունենա, ապա կուսակցությունները կոալիցիաներ պետք է կազմեն վարչապետի թեկնածուի շուրջ: Այսինքն, կոալիցիա կազմելու հիմքում վարչապետի թեկնածու ունենալն է լինելու, ով էլ կրկին նախագահի հրամանագրով կնշանակվի վարչապետ»,– ասաց Վ. Այվազյանը:

Մանրամասները՝ «Փաստ» օրաթերթի այսօրվա համարում