Սամվել Բաբայանը՝ Վիկտոր Դալլաքյանին. «Մարդ–կուսակցությունը չի կարա ցուցակի առաջին հնգյակում լինելու ամբիցիա ունենա» «Փաստ»

«Փաստ» օրաթերթը գրում է.

«Երրորդ հանրապետություն» կուսակցության նախագահ Վիկտոր Դալլաքյանը երեկվա ասուլիսում բացահայտեց, որ ԼՂՀ պաշտպանության նախկին նախարար Սամվել Բաբայանը կոորդինացնում է «Օհանյան» դաշինքի ցուցակի հետ կապված հարցերը և որ փետրվարի 6–ին Բաբայանն իր գրասենյակ է բերել ցուցակ, ըստ որի՝ Դալլաքյանը եղել է 11–րդ հորիզոնականում:
Ինքը՝ Սամվել Բաբայանը, մի քանի օր առաջ «Փաստի» հետ զրույցում պնդել էր, որ ոչ մի կապ չունի ցուցակների հետ:
Ներկայացնում ենք «Փաստի» հարցազրույցը Սամվել Բաբայանի հետ:

– Պարոն Բաբայան, Վիկտոր Դալլաքյանն ասաց, որ Դուք անձամբ եք տարել «Օհանյան» դաշինքի նախընտրական ցուցակը, մինչդեռ Դուք մեզ հետ զրույցում հայտարարել էիք, որ կապ չունեք ցուցակի հետ: Դա պայմանավորվածության արդյո՞ւնք էր, Ձեզ պատվիրակե՞լ էր դաշինքը:

– Ինձ ոչ մեկը չի պատվիրակել: Ոչ մի բան չի եղել, դա սևագիր փաստաթուղթ ա, երբ որ էդ իրական ցուցակը կհրապարկեն, կտեսնեք, որ չի համապատասխանում, էն ինչ որ ինքը իրա ձեռքի տակ հանում, ցույց ա տալիս: Երկրորդ՝ խնդիրը այն չի, թե ցուցակը ով է կազմել, ինչ է կազմել, խնդիրը նա ա, որ մարդիկ եթե իրոք գնում են մի թիմով, իրանց ամբիցիաները պիտի ցած դնեն ու թիմային աշխատանք տանեն: Այլ ոչ թե մարդ–կուսակցությունները գան, ասեն՝ մենք առնվազն պիտի 5–րդ կամ 6–րդ տեղում լինեինք: Այսինքն՝ առնվազն 5%–ի շեմում լինենք, գնանք պառլամենտ` թոշակ ստանալու: Եթե նման թիմերով են աշխատում, ուրեմն ոչ մի բան չի ստացվում: Իսկ ընդհանրապես, իրանց բացատրվել է, որ պետք ա թիմային աշխատանք ու եթե իրոք համախմբվել եք, գնում եք հաղթանակի, պետք չի տեղերի համար կռվել: Եթե մարդիկ դա չեն հասկանում, որ իրենք պիտի աշխատեն ժողովրդի համար, հանուն ժողովրդի, այլ եկել են անձնական խնդիրներ լուծելու, ուրեմն ի՞նչ ասեմ ես էդ մարդկանց, դա իրանց իրավունքն ա: Բայց որ իրանք կռվում են, թե ով պետք է լինի առաջին հնգյակում, դա չի կարելի: Իրանց լիդերներն են նստում դա որոշում, դա ոչ պարոն Բաբայանն ա որոշում, ոչ էլ էն մյուսը: Բայց եթե մարդը չի կարում իրա լիդերի հետ նստի, հասկանա, ամբիցիաները ցած դնի, դա պարոն Բաբայանի մեղքը չի, հո:

– Ուզում եք ասել՝ Վիկտոր Դալլաքյա՞նն է կռիվ արել առաջին հնգյակում լինելու համար:

– Ես չգիտեմ՝ ով է 5–րդ, 6–րդ տեղի համար կռվել, բայց գիտեմ, որ իրանք գնացել են հենց դրա պատճառով, որ իրանք էդ տեղերում չեն: Դա իրանց իրավունքն ա, ոչ մեկն իրանց ոչ խոսք ա տվել, որ էդտեղ ես լինելու, ոչ բան: Ես չեմ կարա ասեմ՝ իրական պատճառն իրանց ինչ ա եղել: Բայց մարդ–կուսակցությունը չի կարելի, որ նման ամբիցիա ունենա, եթե անկեղծ, սեփական ժողովրդի համար ուզում եք ինչ–որ բան փոխեք:

– Պարոն Բաբայան, սակայն մյուս կողմից ինչպե՞ս հասկանանք, որ ներկայացված ցուցակի առաջին տասնյակի մեծ մասը «Համախմբում» կուսակցությունից էր: Դա կողմնապահություն չէ՞, հատկապես, որ Համախմբումն էլ մեծ կուսակցություն չէ ու դեռ կայացած էլ չէ:

– Առաջինը՝ երբ որ ցուցակը կհրապարակեն, Դուք կտեսնեք, որ Ձեր ասած թվերը չեն համապատասխանում իրականությանը: Երկրորդ՝ երբ որ նայեք՝ ռեյտինգայինով որ կուսակցությունը քանի մարդով է մասնակցում, էն ժամանակ կասեք, ով ով ա: Շուտ ա «Համախմբումը» ստեղծվել, թե ուշ, դրանով չի որոշվում: Որ «Համախմբումը» 100 մարդ է ներկայացնում ռեյտինգային, իսկ իրանք 3 մարդ չեն կարողանում ներկայացնեն, բայց ասում են մենք պիտի առնվազն լինենք էսինչ տեղերում, ապա դա չի ստացվի:

– Պարոն Բաբայան, Դուք ասացիք, որ դա սևագիր ցուցակ էր, Դուք ինչո՞ւ էիք սևագիրը տարել և ներկայացրել կուսակցություններին:

– Ես տարել եմ, որ էդ ցուցակով քննարկվի, հասկանանք էդ մարդկանց: Էդ մարդիկ ժամանակ են խնդրել մտածելու, հետո էդ մտածածը չեն արտահայտել, դուրս են եկել հրապարակ: Դա իրանց իրավունքն ա, մենք չենք կարա իրանց արգելենք:

– Պարոն Բաբայան, փաստորեն չեք հերքում, որ ստվերային գործունեություն եք իրականացնում դաշինքում:

– Ստվերային չի: Հազարավոր մարդկանց հետ հանդիպել եմ, դա ստվերայ՞ին ա: Իմ ընկերները, որոնք կուսակցության ղեկավար են, լիդերներ են՝ թե Սեյրան Մուշեղովիչ, թե Վարդան Օսկանյան, թե Րաֆֆի Հովհաննիսյան, ես իրանց օգնում եմ էդքանով: Ես ոչ էդ ցուցակներում կամ, ոչ որևիցե կուսակցության անդամ եմ:

– Մի խոսքով, Դուք «Օհանյան» դաշինքից այդ ուժերի հեռացման մեջ Ձեր մեղքը չե՞ք տեսնում:

– Ես ոչ մի մեղք չեմ տեսնում, որովհետև ես ո՛չ ցուցակ գրողն եմ, ո՛չ էլ ցուցակ հաստատողը: Դրա համար կան լիդերներ: Ուզում են Վիկտորին բերեն, դնեն վերջից առաջինը, ինձ ի՞նչ: Ես շարունակելու եմ իմ ընկերների հետ լինել, օգտակար լինել:

Շարունակությունը` «Փաստ» օրաթերթի այսօրվա համարում: