Ռուսական մամուլը գրում է

regnum.ru-ն «Իսպանիայում ձերբակալել են հայկական մաֆիայի 100 անդամի» հոդվածում գրում է, որ իսպանական ոստիկանությունը և ազգային գվարդիան իրականացնում են այ երկրի պատմության ընթացքում ամենամեծ գործողություններից մեկը՝ երկրի ամենախոշոր հանցագործ կազմակերպություններից մեկի՝ հայկական մաֆիայի նկատմամբ: Այդպես գրում է «El Mundo » թերթը: Արդեն ձերբակալված է նվազագույնը 100 մարդ, ազատության մեջ է գտնվում հանցագործ կազմակերպության մոտավորապես ևս մի 40 անդամ: Գործողությունները իրականացվել են Բարսելոնա, Վալենսիա, Ալիկանտե և Մադրիդ քաղաքներում,գործողության մեջ ընդգրկված է ավելի քան 1000 գործակալ: Դատարանը արգելափակել է հանցագործների հաշվի համարները, տվել է 73 խուզարկության և ունեցվածքի բռնագրավման թույլտվություն: Ձերբակալվածներին մեղադրանք է առաջադրվել հանցագործ կազմակերպություն ստեղծելու, թմրանյութերի ապօրինի շրջանառության, ծխախոտի մաքսանենգության, փողերի լվացման, կոռուպցիայի, շորթման և սպառնալիքի, սպանության փորձի հիմքերով, ընդհանուր առմամբ՝ 13 մեղադրանք: Նրանց գործունեության շրջանակը դուրս է գալիս Իսպանիայի սահմաններից և անգամ Եվրոմիության սահմաններից: Ոստիկանության աղբյուրները հայտնում են, որ այդ մաֆիոզ կազմակերպությունը դարձել էր իսկական մղձավանջ Իսպանիայի անվտանգության համար: Օպերատիվ -քննչական աշխատանքները սկսվել են դեռևս 2016 թվականին երկու մաֆիոզ վրացիների սպանությունից հետո:

Ի՞նչ է արևելյան դեմոկրատիան

pravda.ru-ն «Եթե ապրում ես նախկին ԽՍՀՄ-ում ՝դու վտանգի գոտում ես» հոդվածում գրում է, որ հետխորհրդային տարածքում արևելյան դեմոկրատիայի օրինակով կառուցված բոլոր պետությունները արագ քանդվում են: Օրինակը՝ միայն այս տարի ընկան կառավարությունները Հայաստանում, Ղըրզըզստանում և Վրաստանում: Ռեժիմի փոխման մշտական վտանգի տակ են Մոլդովան և Ուկրաինան. «Ակամայից հարց է առաջանում, թե ինչով է պայմանավորված «արևելյան դեմոկրատիայի» կայունությունը և արժե՞ արդյոք ձգտել դրան: Հունիսի 13-ին հրաժարական տվեց Վրաստանի կառավարությունը՝ «արդարության վերականգման» պահանջի հիմքով: Ավելի վաղ նույնը արել էր Սերժ Սարգսյանը Հայաստանում՝ իբր թե փողոցի ճնշման տակ: Ղըրզըզստանում Սապար Իսակովին նախագահը պաշտոնազրկեց գրչի մի հատվածով այն հիմքով, թե նա սկսել է զբաղվել քաղաքականությամբ և չի լսում ակսակալներին:

Այս ամենի ֆոնի վրա աղքատացած Մերձբալթյան երկրներում, չգիտես ինչու, ոչ մի կառավարություն չի փոխվում: Իսկ պատճառը մեկն է. որոշում է ոչ թե ժողովուրդը, այլ Վաշինգտոնի «պարտկոմը»: Վաշինգտոնը իրականացնում է, այսպես ասած, «կառավարում կառավարությունների փոփոխության միջոցով»:
Ըստ աշխարհաքաղաքական փորձաքննության կենտրոնի տնօրեն Վալերի Կորովինի, կառավարության փոփոխությունը համապատասխան երկիրը կառավարելու համար դարձել է տեխնոլոգիա, և ինչքան անկայուն, պարոդիկ և կեղծ է երկիրը, այնքան հեշտ է այն ապամոնտաժել: Ըստ նրա, ԽՍՀՄ-ի ժամանակ արհեստականորեն ստեղծված հանրապետությունները այդպես էլ չկարողացան դառնալ լիարժեք պետություններ, այլ ապրում են պետության «դեկորացիայի» տեսքով:
Իրենց մոտ արևելքում եթե անգամ փոխվում է կառավարությունը, այն լինում է նույն կլանների շրջանակում: Բայց չի կարելի ուրիշների համար փոս փորել: Վաղ թե ուշ նույն բաները կլինեն նաև նրանց մոտ»:

Կամո Խաչիկյան