Վոլոդյա Ավետիսյան. «Մինչև այսօր մարդիկ փողով են բերդից դուրս գալիս». «Փաստ»

«Փաստ» օրաթերթը գրում է.

Մարտի 21–ից Երևանի Ազատության հրապարակում շուրջօրյա նստացույց սկսած ՀՀ ՊՆ պահեստազորի գնդապետ, ազատամարտիկ, «Հանուն Հայաստան պետության» ճակատի խորհրդի անդամ Վոլոդյա Ավետիսյանն ու իր ազատամարտիկ զինակից ընկերները նույնպես մայիսի 1–ին հետևել են ԱԺ արտահերթ նիստին, որի ժամանակ պատգամավորները պետք է ժողովրդի առաջադրած վարչապետի թեկնածուին ընտրեին:

«Ազգի այս պոռթկումը ոչ թե երեկ կամ այսօր է սկսվել, այլ այն սկիզբ է առել 1996 թվականից, երբ Վազգեն Մանուկյանի հաղթանակից հետո նրան, ինչ–ինչ պատճառներով թույլ չտվեցին իշխանության անցնել: Հենց այդտեղից սկսվեց ժողովրդի դժբախտությունը: Դրան հաջորդեցին հոկտեմբերի 27–ի դեպքերը, հետո մարտի 1–ի դեպքերը, իսկ այսօրվա այս պոռթկումը այն ժամանակվանից է կուտակվել: Հանրապետականն ասում է՝ մենք ձեզ սպանենք, դուք ձայն մի հանեք, մենք ձեզ կեղեքենք, թալանենք, դուք ձայն մի հանեք, ձեր երեխաները լավ ապագա չունենան, դուք հանդուրժեք, քանի որ դա նորմալ է, այդպես պետք է լինի, որովհետև մենք այդպես ենք ուզում: Արյան մեջ թաթախված ձեռքերով բռնապետական ռեժիմ են ուզում մեր ազգին պարտադրել և Փաշինյանին էլ մեղադրում են, թե ինչու է ժողովրդին ոտքի հանել: Բայց Փաշինյանը ժողովրդին չի հանել փողոց, այլ ինչպես համայն աշխարհի 10 միլիոն հայերը, նա նույնպես, լինելով ժողովրդի մի մասնիկը, ոտքի է կանգնել այս բռնապետական ռեժիմը տապալելու համար»,– ասաց Վ. Ավետիսյանը:

Պահեստազորի գնդապետի կարծիքով Սերժ Սարգսյանի հրաժարականից հետո ազգը տեսավ և զգաց միասնականության ուժն ու իր երկրի տիրոջ զգացում ունենալու հզորությունը: Նա հիշեցրեց Արփինե Հովհաննիսյանի արդարադատության նախարար աշխատած ժամանակահատվածը, երբ նույնիսկ այդ ժամանակ շատ օրենքների որոշ հոդվածներ այդպես էլ չգործեցին:

«Այն ժամանակ, երբ ես դեռ բանտում էի, Արփինե Հովհաննիսյանը արդարադատության նախարարն էր, բազմիցս նամակով դիմել ենք նրան, պարզելու, թե ինչու օրենքի այս կամ այն հոդվածը չի գործում: Այդ համակարգում ամեն ինչ կոռումպացված է, փողով է: Մինչև այսօր մարդիկ փողով են բերդից դուրս գալիս, երբ կարող են առանց գումար տալու, օրինական ձևով դուրս գալ: Կոռուպցիայի մեջ խեղդված, ուզում են կոռուպցիայի դեմ պայքարել, հանձնաժողովներ են ստեղծում: Այս ամեն ինչը ձևականություններ են և ներկա իշխանությունները պետք է երեկվանից արդեն հրաժարական տված լինեին: Իմ կարծիքով` ազգիս այսքան տառապանք պատճառելու համար պետք է բոլորը պատասխան տան իրենց արածների համար»,– ասաց Վ. Ավետիսյանը:

Նա նաև տեղեկացրեց, որ արդեն ոտքի են կանգնել բոլոր, անգամ Սյունիքի մարզի բնակիչները: Եվ բոլորի միակ պահանջը ՀՀԿ–ի հրաժարականն է:

«Պետք չի սպասել մինչև հաջորդ փուլի ժամկետը: Միևնույն է, դա էլ նրանց չի փրկելու: Չնայած ես չեմ կարծում, որ ՀՀԿ–ականներն այդքան խոհեմություն ունենան, բայց այդ մեկ շաբաթն էլ նրանց չի փրկելու: Նրանք պետք է գնան և ես խորհուրդ կտամ, որ մեր ազգին այս վիճակին հասցնելու համար, քանի դեռ նրանց հոդվածներն ավելի չի խորացել ու շատացել, օր առաջ հրաժարական տան»,– ասաց Վ. Ավետիսյանը:

Հարցին, թե արդյոք դա չի հակասո՞ւմ Նիկոլ Փաշինյանի կողմից հնչեցրած այն հավաստիացումներին, որ վենդետա չի լինելու, «Հանուն Հայաստան պետության» ճակատի խորհրդի անդամը պատասխանեց:

«Դա վենդետա չէ: Օրենքի առջև բոլորս ենք պատասխանատու: Վաղը Նիկոլը լինելու է վարչապետ, նույնը մենք նրանից ենք պահանջելու և նա էլ է օրենքի առաջ պատասխանատու լինելու: Եվ երբ որ տեսնենք ճանապարհից շեղվում է, նույնը նրանից ենք պահանջելու: Այն ժամանակ նույնպես փողոց էլ կփակենք, իր նստավայրն էլ կփակենք, բայց կրկին թույլ չենք տա, որ Նիկոլն էլ ճանապարհից շեղվի: Այստեղ խնդիրը անձինք չեն, այլ այն երևույթները, որոնց պատճառով ջլատվել ու հյուծվել է մեր երկիրը: Եվ այսօր դրա դեմ է պայքարում ժողովուրդը: Ու եթե 1996 թվականին ժողովուրդն ինչ–որ տեղ աչք փակեց այդ ժամանակների իշխանությունների սխալների վրա, ապա հիմա, երբ համբերության բաժակը լցվել է, այլևս համբերելու ժամանակ չկա: Ու քանի որ բարեկամ–հարևան կոչվող հարաբերությունների պատճառով բոլոր ղեկավարներն էլ շեղվելու հատկություն ունեն, պետք է Նիկոլն էլ մեկ բան իմանա, որ օրենքը պետք է գործի բոլորի համար, թե՛ նրա հոր, թե՛ նրա եղբոր, թե՛ բարեկամի համար: Արդարություն, հավասարություն օրենքի առաջ` այդ եղանակով մենք պետք է կառուցենք, ազատ, ապահով, ինքնիշխան պետություն»,– ասաց Վ. Ավետիսյանը:

Նա շնորհակալություն հայտնեց նաև իր ազգակիցներին և խոնարհվելով նրանց առջև, նշեց, որ մոտ է այն օրը, երբ իրականություն կդառնա բոլոր հայերի երազանքը: Ու եթե հայ ազգը համախմբված ևս մի քանի օր էլ պայքարի, հաջորդ հազարամյակների ընթացքում կապրի ծաղկող Հայաստանում:

Շարունակությունը՝ «Փաստ» օրաթերթի այսօրվա համարում