Գ. Եղիազարյանը՝ ՀՀԿ–ականներին. «Մի՛ շարժվեք «Մեզնից հետո թեկուզ ջրհեղեղ» սկզբունքով, այդ ջուրն առաջինը ձեզ է սրբելու». «Փաստ»

«Փաստ» օրաթերթը գրում է.

Հայաստանի Հանրապետության Ազգային ժողովի մայիսի 1–ի հատուկ նիստի ընթացքում Նիկոլ Փաշինյանը չստացավ բավարար ձայներ՝ ՀՀ վարչապետի պաշտոնում ընտրվելու համար: ՀՀԿ–ն քվեարկությունից առաջ հայտարարեց, որ դեմ են քվեարկելու Փաշինյանի թեկնածությանը: Զուգահեռ՝ այսօր ողջ հանրապետությունում նոր թափով վերսկսվել են քաղաքացիական անհնազանդության տոտալ գործողությունները:

ԱԱԾ նախկին փոխնախարար Գուրգեն Եղիազարյանի խոսքով՝ ՀՀԿ–ականներն ապացուցեցին, որ իրենք այս տարիների ընթացքում մտածել են միայն իրենց բարօրության մասին:

«Նրանք անտարբեր են Հայաստանի նկատմամբ և պատրաստ են նույնիսկ սահմանային խժդժություններով ժողովրդի ուշադրությունը շեղել: Իսկ ինչո՞ւ եմ ես այդպես մտածում: Ձեզ բավարա՞ր չէր Սամվել Ֆարմանյանի պաթետիկ ելույթն առ այն, որ թուրքական տանկեր են շարժվում, տեխնիկա է շարժվում դեպի սահման և այսօր առաջնայինն այդ քննարկումները պետք է լինեն: Այսինքն՝ սրանով իսկ կարող ենք համարել, որ ցանկացած սահմանային խժդժություն սրանք են հատուկ ստեղծում: Այլ բան մտածել չի լինում: Այսինքն՝ հանուն իրենց աթոռների, պաշտոնների և հանուն իրենց մահացած ՀՀԿ–ի, պատրաստ են ամեն ինչի: Այդ թվում պատրաստ են որոշակի գործողությունների, որոնք ուղիղ սպառնալիք են մեր զինվորների համար»,– «Փաստ»–ի հետ զրույցում ասաց Գուրգեն Եղիազարյանը:

Նրա դիտարկմամբ՝ ՀՀԿ–ական պատգամավորներն ուղղակի մի իրողություն պետք է հասկանան. «Իրենց առաջնորդի տրամաբանությունն այսօր իրականության հետ ոչ մի առնչություն չունի: Նա դեռ կարծում է, թե իշխանության վերադառնալու հնարավորություն կա: Պարո՛ն Սարգսյան, թողե՛ք այդ «իլյուզիաները»: Ի վերջո՝ ժողովուրդը ձեզ ատելով ատում է: Եվ, փաստորեն, դուք և ձեր համախոհներն եք պատճառը: Դուք և ձեր համախոհները քանդեցիք, ավերեցիք Հայաստանի Հանրապետությունը: Մի՛ արեք դա, մի՛ շարժվեք «Մեզնից հետո թեկուզ ջրհեղեղ» սկզբունքով, որովհետև այդ ջուրը առաջինը ձեզ կսրբի ու կտանի: Կրկին հորդորում եմ՝ մի՛ արեք դա: Դուք տասը տարի ո՛չ արտաքին քաղաքականություն եք ունեցել, ո՛չ էլ՝ ներքին: Նույնիսկ չեք պատկերացրել, թե ինչ է դա: Իսկ հիմա վերջին ակորդն եք տալիս: Մի թշնամացրեք ժողովրդին պետական կառույցների հետ, մեր երկիրը տասնամյակներ հետ մի՛ գցեք: Միևնույն է՝ դուք դրանով ոչ մի բանի չեք հասնելու: Ձեր «գնացքը» գնացել է: Յուրաքանչյուրը գիտի, թե դուք ինչ եք արել, ում համար եք աշխատել: Ձեզանից հետո թեկուզ ջրհեղեղ սկզբունքը սկզբում կկոտրվի ձեր և ձեր համախոհների գլխին: Վեր կացե՛ք և «Ճանաչեք Նիկոլ Փաշինյանի վարչապետությունը» կոչով հանդարտեցրեք ձեր պատգամավորներին ու խամաճիկներին: Միակ ելքը սա է: 1915 թ. Ստամբուլում Շաքրիի, Շուքրիի գիշերաժողովներն ուժային կառույցների ղեկավարների հետ մի՛ անցկացրեք: Նրանց թյուրիմացության մեջ մի՛ գցեք: Հանձնվե՛ք:

Վեր կացեք ու ձեր թիմակիցներով հայտարարեք, որ հլու եք ժողովրդի կամքին. Նիկոլ Փաշինյանը վարչապետ է: Հակառակ դեպքում՝ կտուժի ողջ հայ ազգը, ով առանց այդ էլ մինչև օրս տուժել է ձեր ձեռքից: Հիշե՛ք ձեր անցյալը, բանասեր լինելով հանդերձ, դարձել եք ՊՆ նախարար (իրականում նախարարը Սամվել Բաբայանն է), գաղափար չունենալով անվտանգության և ՆԳ ծառայություններից, ղեկավարեցիք այդ կառույցները, լինելով պետական կառավարման գործընթացներից շատ հեռու մարդ, ոչ բարով, միանձնյա ղեկավարեցիք ՀՀ–ն:

Այժմ ամենակարևորը. մի մտածեք, որ Հայաստանը հետ գցելով, հեռվից կառավարելով ու սաբոտաժի ենթարկելով պետական կառույցները, դուք հայ ժողովրդին ցույց կտաք, թե ձեր ժամանակ ամեն ինչ շատ ավելի բարվոք էր: Մի՛ արեք դա: Հավաքե՛ք ձեր համախոհներին, թող նրանք Ազգային ժողովում հայտարարեն, որ քվեարկության արդյունքները կեղծվել են: Քվեարկե՛ք ժողովրդի ընտրյալի օգտին, բարձրաձայնե՛ք դա, թողե՛ք Հայաստանը բնականոն շնչի»:

Գուրգեն Եղիազարյանը շեշտեց՝ բոլորի համար էլ պարզ էր, թե ով էր կանգնած այդ 56 պատգամավորների թիկունքում. «Փառք Աստծո՝ հանձին Ֆելիքսի, մի մարդ գտնվեց: Նա հասկացավ, որ այսպես շարունակել չի լինի: Օգտվե՛ք առիթից՝ դեռ 24 ժամ ունեք: Մի կազմակերպեք ՀՀԿ–ական պատգամավորների դեմարշը ժողովրդի դեմ: Արագ սթափվե՛ք: Ձեր իսկ ուղիղ խնդիրն է վայրկյան առաջ լուծել այդ հարցը: Կծկվել եք ձեր բոստանում և այնտեղից հրահանգներ եք իջեցնում: Իջեցրեք վերջին հրահանգը, որովհետև ձեր մարդկանց դեմքը ինձ հիշեցրեց Նյուրնբերգյան դատավարությունը, այնտեղ նստած ֆաշիստական պարագլուխների դեմքը: Հայաստանը տոնում է Նիկոլի հաղթանակը, հասկացե՛ք դա: Հայտարարե՛ք ձեր ճիվաղներին ու թող ժամ առաջ ընդունեն իրենց պարտությունը: Հայաստանը մի՛ բերեք ողբերգական իրավիճակի՝ առաջին ու վերջին մեղավորը դուք եք»:

Շարունակությունը՝ «Փաստ» օրաթերթի այսօրվա համարում