Թույլ չենք տալու գողանալ ժողովրդի հաղթանակը. «Դուխով»՝ «Մերժի՛ր Սերժի Կարենին». «Փաստ»

«Փաստ» օրաթերթը գրում է.

«Առավոտյան ժամը 11:00–ից հավաքվում ենք Հանրապետության հրապարակում»: Սա ԱԺ պատգամավոր, «Իմ քայլը» նախաձեռնության առաջնորդ Նիկոլ Փաշինյանի դեռ ժամեր առաջ արված կոչն էր, որն ընդամենը ժամեր անց կրկին փողոց դուրս բերեց բազմահազար մարդկանց: Ոչ բռնի, թավշյա, ժողովրդական հեղափոխությունը շարունակելու ահազանգը ստացավ ուսանողը, բժիշկը, արվեստագետը, «վաստակավորը» ժողովրդից ստացած արվեստագետը, Սփյուռքն ու Սփյուռքից ժամանած հայերը, ովքեր եկել են հայրենիք՝ մինչև վերջ հայրենակիցների կողքին կանգնելու համար:

Հանրապետության հրապարակում Նիկոլ Փաշինյանը ներկայացրեց օրվա անելիքները: Կոնկրետ երթուղի չհայտարարվեց, բայց երթը սկսվեց Մաշտոցի պողոտայից: Ոստիկանների թվի ու զինտեխնիկայի ավելացմանը զուգահեռ՝ երթի մասնակիցների թիվը կրկնապատկվում էր:

Նշենք, որ թեև Սերժ Սարգսյանը հրաժարական տվեց, վարչապետի ժամանակավոր պաշտոնակատար Կարեն Կարապետյանը շարունակում է հայտարարություններով հանդես գալ: Նա մասնավորապես հայտարարել էր արտահերթ ընտրություններ անցկացնելու մասին։

Մաշտոցի պողոտայում երթի հենց սկզբում Նիկոլ Փաշինյանը հայտարարեց, որ ՀՀԿ–ն ու Կարեն Կարապետյանը փորձում են ժողովրդի ձեռքից խլել հաղթանակը:

«Մենք հստակ հայտարարում ենք, որ թույլ չենք տալու: Նա մթագնեց ժողովրդի հաղթանակը և իրեն վերագրեց այն: Նա փորձում է գողանալ ժողովրդի հաղթանակը: Մենք ձեզ կոչ ենք անում դուրս գալ փողոց: Դուրս արի՛ փողոց և տեր կանգնիր քո հայրենիքին: Դուրս արի՛ փողոց և տեր կանգնիր քո ազատությանը: Դուրս արի՛ փողոց և տեր կանգնիր քո հաղթանակին: Եվ ուրեմն՝ ՀՀԿ հեռացիր»,– իր կոչը հղելով քաղաքացիներին, ասաց Նիկոլ Փաշինյանը:

Ցուցարարների տրամադրվածությունն, այդուհանդերձ, նույնն է: «Գժական», «Դուխով», «ՀՀԿ հեռացիր», «Մերժիր Սերժի Կարենին» կոչերով նրանք լցրել էին Երևանի փողոցները: Վարորդների դեմքին ևս ժպիտ էր՝ ազդանշաններով քաջալերում էին երթի մասնակիցներին: Իրենց տան պատուհաններից ու նաև մասնավոր ընկերությունների շենքերից ևս ողջունում էին ցուցարարներին:

Մաշտոցի պողոտայում հանդիպեցինք նաև ռեժիսոր Հրանտ Վարդանյանին:

Նա շտապում էր Հանրապետության հրապարակ՝ միանալու մյուս ցուցարարներին: «Փաստ»–ի հետ զրույցում ռեժիսորը նախ ասաց, որ դեռ չի ցանկանում կատարվելիք ու շարունակական իրադարձությունների առումով «պրագնոզ» տալ: Հետո, շարունակելով խոսքը, նշեց, որ այս պահին կարևոր ուղերձ ունի. «Բոլորդ Նիկոլի կողքը կանգնեք: Գնացեք և Նիկոլի կողքին կանգնեք: Ազգը պետք է Նիկոլի կողքին կանգնի՝ որովհետև ամեն ինչ վտանգավոր է»:

Երթը շարժվեց նաև Կորյուն փողոցով: «Միանալու» կոչ հղեցին Երևանի ճարտարագիտական համալսարանի , Մ. Հերացու անվան Բժշկական համալսարանի ուսանողներին: Թեպետ հավելենք՝ երթին արդեն իսկ մեծ թվով ուսանողներ էին միացել:

Գարիկ Առաքելյանը Մոսկվայից Հայաստան է վերադարձել այստեղ կատարվող իրադարձություններին մասնակցելու համար:

Անդրադառնալով իրար հաջորդող իրադարձություններին, «Փաստ»–ի հետ զրույցում նա նախ նշեց. «Իշխանությունները իրավիճակը չեն հասկանում և լուրջ չեն ընդունում այն: Ի դեմս այս ուսանողների՝ այսօր մենք գեղեցիկ, առողջ ու լավ երիտասարդություն ունենք: Հայաստանը պետք է մեր երիտասարդության կողքին լինի: Նրանք է, որ պետք է բախտորոշեն հայ ազգի ճակատագիրը: Թշվառությունը, միգրացիան, այդ ամենը ՀՀԿ–ի աշխատելաոճի հետևանքն են: Իրենք մատների արանքով են նայել երկրին, ամեն մեկը մտածել է իր, իր գրպանի, մերձավորների ու շրջապատի մասին: Դրա համար էլ այս ամենը պետք է ջնջվի, մաքրվի ու նոր էջից սկսվի»:

Գարիկ Առաքելյանն ընդգծեց, որ Սփյուռքում ապրող յուրաքանչյուր հայ ուզում է հետ վերադառնալ:

«Մենք բոլորս ուզում են վերադառնալ մեր հայրենիք: Հայրենիքում ապագա չենք տեսել, բիզնես գործունեություն ծավալելու և այլ հնավորություն չեն տվել: Այդ ամենը տեսնելով՝ մարդիկ թողել ու հեռացել են: Իսկ պայքարի այս ամբողջ օրերի ընթացքում հույս է արթնացել: Ես մեծ հույսեր եմ փայփայում հանրահավաքի առաջնորդների և «Քաղաքացիական պայմանագիր» կուսակցության ներկայացուցիչների հետ: Նրանք կարող են ծաղկեցնել մեր Հայաստանը»,–հավելեց նա:

Նիկոլ Փաշինյանը և երթի մասնակիցները նաև Խանջյան փողոցով անցան, զուգահեռ էլ ողջունեցին նաև ոտիկանության շենքում գտնվող ոստիկաններին: Քաղաքացիները շարունակում են քաղաքացիական անհնազանդության ակցիաները, որոնք բացառապես խաղաղ բնույթ են կրում:

Շարունակությունը՝ «Փաստ» օրաթերթի այսօրվա համարում