Վիգեն Խաչատրյան. «Շատ կարևոր է, որ իշխանության հենարանը չլինի թաղի խուժանն ու օրինախախտը». «Փաստ»

«Փաստ» օրաթերթը գրում է.

ԱԺ նախկին պատգամավոր Վիգեն Խաչատրյանն այն հասարակական–քաղաքական գործիչներից էր, ով անհնարին էր համարում Սերժ Սարգսյանի նախ՝ վարչապետի պաշտոնում առաջադրվելը և երկրորդ՝ նրա կողմից հրաժարական ներկայացնելը:

«Ես տարիների ընթացքում ասում էի, որ պետք է նոր սերունդ գա և ինձ թվում էր, որ դա ավելի երկար կտևի, որպեսզի Հայաստանում մթնոլորտ փոխվի: Բայց պարզվեց, որ այդ սերունդն արդեն եկել է: Եվ մենք հիմա գործ ունենք անկախության ընթացքում ձևավորված սերնդի հետ: Այսինքն, ազատ մարդկանց հետ, որոնք չեն ուզում սեփական երկրում հպատակ լինել և ուզում են պատասխանատու ապրել, որովհետև ազատությունն ամենամեծ պատասխանատվությունն է: Երկրորդը, որից ես ներքին մեծագույն բավարարվածություն եմ զգում, այն է, որ Հայաստանի անկախությունից սկսած՝ Սահմանադրության, իրավունքի գերակայության ընդունում և այլն, բոլոր հռչակված սկզբունքները ընթացքում այլասերվում էին, բայց նոր սերունդն այն յուրացնում և հասկանում էր, որ այդ ամբողջը կաշխատի, երբ ամեն ինչ այլասերված չէ և ազնիվ է: Մենք տեսնում ենք, որ նոր սերունդն ընդամենը ուզում է մի պարզ բան՝ ապրել արժանապատիվ: Եվ սա ամենակարևորն է»,– ասաս Վ. Խաչատրյանը:

Նա նշեց, որ ներկայի պայքարը հաջողությամբ պսակվեց, որովհետև արժանապատիվ մարդ, իշխանություններ ունենալու պայքար էր, որը չէր կարող հաջողությամբ չավարտվել: Մյուս կողմից այն, ինչ տեղի ունեցավ, քաղաքական սերնդափոխություն է, որն անխուսափելի էր:

«Փառք Աստծո, որ լարվածությունը թուլացավ և անցումը խաղաղ ճանապարհով իրականացավ: Եվ սա հասարակական պահանջ էր և իհարկե չպետք է զուգորդվի վրեժխնդրությամբ, լարվածությամբ, բայց սխալ թույլ տվածները պետք է ներողություն խնդրեն և վստահեցնեն, որ այլևս նման սխալներ չեն կրկնի: Ինչ վերաբերում է հանցավորներին, ապա նրանք պետք է պատասխանատվության կանչվեն: Եվ ճիշտ էին ասում հանրահավաքի մասնակիցները, որ հայերիս համար ապրիլի 24–ը ոչ թե սգի օր է, այլ՝ պայքարի ու հիշատակի օր և պետք է ամեն ինչ անել, որ այլևս չկրկնվի»,– ասաց Վ. Խաչատրյանը:

Նա նաև հիշեցրեց, որ մինչև վերջին օրը կարծում էր, որ Սերժ Սարգսյանը, լինելով խոհեմ անձնավորություն, վարչապետի պաշտոնին չի հավակնի: Բայց պարզվեց, որ ինքը ճիշտ էր, քանի որ պետք էր նաև այս քայլը կատարել, որպեսզի նաև քաղաքական սերնդափոխություն տեղի ունենա:

«Եթե Սերժ Սարգսյանը վարչապետ չդառնար, դժվար կլիներ այս ալիքն առաջացնել:Եվ ակամայից նա արագացրեց այն պրոցեսները, որոնք պետք է տեղի ունենային: Ես չեմ կարծում, որ դա նրա կողմից մտածված քայլ էր, բայց բերեց դրական արդյունքների: Եվ պարզվեց, որ անփոխարինելին՝ փոխարինելի է, պարզվեց, որ իշխող կուսակցությունը վերջին ճշմարտությունը չի կրում, վերջապես պարզվեց, որ իշխանությունը կրող մարդիկ իսկապես կտրվել են հասարակությունից և ապրում են իրենց կյանքով: Մինչդեռ պետք է ապրեն հասարակության կյանքով»,– ասաց Վ. Խաչատրյանը:

Նա նաև նշեց, որ ակնհայտ էր, որ Սերժ Սարգսյանի հետ երկխոսելու փուլը վաղուց ավարտված է, քանի որ նա սպառել էր երկխոսելու նյութը:

«Եվ դա նա ցույց տվեց, երբ եկավ բանակցության, բայց հետո թողեց և հեռացավ: Եվ ճիշտ արեց: Դրանով նա ցույց տվեց, որ ուրիշները պետք է նրա փոխարեն բանակցեն: Եվ կարևորն այն է, որ մենք անցնցում անցում իրականացնենք և հանկարծ ՀՀՇ–ի պատմությունը չկրկնվի` հանկարծ մարդիկ չգան բարի լոզունգներով և սկսեն նորից սխալ աշխատել ու հիասթափեցնել մարդկանց»,– ասաց Վ. Խաչատրյանը:

Անցած 30 տարվա մեջ առաջին անգամ եկավ մի սերունդ, ով խոսեց արժանապատվության մասին, նշեց հասարակական–քաղաքական գործիչը և հիշեցրեց, որ այս ամենից հետո ոչ դրախտ է լինելու, ոչ էլ հրաշքներ, բայց ամենակարևորն այն է, որ իշխանությունները հանցավոր բնույթ չեն կրի:

«Շատ կարևոր է, որ իշխանության էությունը հանցավոր բնույթ չկրի և իշխանության հենարանը չլինի թաղի խուժանն ու օրինախախտը: Եվ այն իշխանությունը, որը հենվում է հասարակության վրա, ուզած–չուզած արդյունավետ է աշխատում և իմանում է, որ ինքը փոխարինելի է, իսկ այն իշխանությունը, որը ուժային կառույցներն օգտագործում է հասարակությանն իրեն հպատակեցնելու համար, չի կարող արդյունավետ աշխատել, որում մենք մի քանի անգամ արդեն համոզվել ենք: Եվ այն, ինչ տեղի ունեցավ, պետք է միայն ողջունել և անցյալի սխալները չկրկնել»,– ասաց Վ. Խաչատրյանը:

Շարունակությունը՝ «Փաստ» օրաթերթի այսօրվա համարում