Հասմիկ Խաչատրյան. «Ջուրը և սնունդը փոխելով՝ մարդը կարող է իր առողջության 70%–ը պահպանել». «Փաստ»

«Փաստ» օրաթերթը գրում է.

Արևելյան և արևմտյան բժշկության տարբերությունը ահռելի է: Բայց ամենակարևոր տարբերությունն այն է, որ արևելյանը ոչ թե հետևանքների, այսինքն՝ հիվանդությունների դեմ պայքարելն է, այլ դրանց առաջացման պատճառներն է վերացնում:

Կլասիկ և արևելյան բժշկության մասնագետ Հասմիկ Խաչատրյանը, ով ավարտել է Մ. Հերացու անվան բժշկական համալսարանը, տարիների աշխատանքի ընթացքում համոզվել է, որ դեղերը մարդկանց չեն բուժում: Եվ որոշել է փոխել մասնագիտական ուղղությունը և ուսումնասիրել արևելյան բժշկության գաղտնիքները:

«Իմ դիտարկումների արդյունքում պարզվեց, որ մեր օրգանիզմը պատրաստ չէ քիմիական դեղեր ընդունել, քանի որ չի ճանաչում այն նյութերը և դուրս է մղում օրգանիզմից: Այդ պատճառով ես փոխեցի բժշկությանս ուղղությունը և հիմա արևելյան բժշկության մեթոդներով եմ աշխատում»,– ասաց Հ. Խաչատրյանը: Նա 33 տարվա կլասիկ բժշկության փորձ ունի, բայց արդեն 13 տարի է զբաղվում է արևելյան բժշկությամբ: Ըստ մասնագետի, ի տարբերություն կլասիկի, արևելյանը շատ մոտ է բնությանը և հիմնականում բնության ներդաշնակության օրենքն է:

«Պրոֆիլակտիկ բժշկությունը թույլ չի տալիս, որ մարդը հիվանդանա: Մեր առողջության 70%–ը սննդով է պայմանավորված: Եվ եթե լիարժեք սնունդ ենք ընդունում, ապա օրգանիզմը լիարժեք «աշխատում է»: Հարցն այն է, որ ժամանակակից աշխարհում սննդի որակը բավականին վատացել է, և ավելի շատ քիմիա ենք ստանում, քան առողջ սնունդ: Այդ պատճառով էլ մարդկանց առողջական վիճակը բավականին վատ է»,– ասաց Հ. Խաչատրյանը:

Մասնագետի խոսքով, կարևոր է նաև նորմալ բաղադրություն ունեցող ջուր օգտագործելը: Եվ քանի որ քաղաքային վայրերում սարերի մաքուր ջրի բաղադրությունը չի պահպանվում, ուստի այն համարվում է դրական լիցք ունեցող մեռած ջուր:

«Ջուրը և սնունդը փոխելով՝ մարդը կարող է իր առողջության 70%–ը պահպանել: Այդ դեպքում մարդը որևէ խնդիր չի զգում, իսկ երբ դիմադրողականությունն իջնում է մինչև 50%, այդ ժամանակ առաջանում են խնդիրներ»,– ասաց մասնագետը:

Ի դեպ, մասնագետը նշում է, որ գարունը լավագույն շրջանն է օրգանիզմը թույներից մաքրելու համար: Ու քանի որ տարվա ընթացքում օրգանիզմը հավաքում է մոտ 8 կգ թույն, ուստի գարնանը հարկավոր է այդ թույնից ազատվել: Հակառակ դեպքում այն կթուլացնի և կվնասի օրգանիզմը:

Օրգանիզմի մաքրումը մասնագետը խորհուրդ է տալիս սկսել լյարդից, քանի որ, եթե լյարդում կան խնդիրներ, նախ պետք է այդ օրգանը մաքրել, ամրացնել, որպեսզի այն ամբողջ տարի կարողանա բնականոն աշխատել:

Տիկին Խաչատրյանը նշեց նաև, որ, արևելյան բժշկության սկզբունքներով, տարվա ամեն եղանակ ունի իր համապատասխան օրգանը, որը տվյալ սեզոնին դառնում է ավելի խոցելի. ձմռանը երիկամների և միզապարկի, գարնանը` լյարդի, ամռանը` սրտի, աշնանը ստամոքսի և ուշ աշնանը՝ թոքերի: Ուստի այդ սեզոններին հարկավոր է ուշադիր լինել այդ օրգանների աշխատանքին:

Շարունակությունը՝ «Փաստ» օրաթերթի այսօրվա համարում