Սխալս շտկեցի ու հետ եկա. Մարիամ Ադամյան

Շանթ» հեռուստաընկերությամբ շուտով կմեկնարկի նոր հեռուստասերիալ: «Թաքնված սեր». այսպես է կոչվում հեռուստասերիալը, որն իր շուրջ է համախմբել հայտնի դերասաններ Աշոտ Տեր-Թադեւոսյանին, Գնել Ուլիխանյանին, Դավիթ Աղաջանյանին, Արմեն Մարգարյանին, Սոֆյա Պողոսյանին, Մարիամ Ադամյանին եւ այլոց:

Նոր հեռուստասերիալում իր կերպարի եւ առաջիկա ծրագրերի մասին Life.panorama.am-ը խոսել է դերասանուհի Մարիամ Ադամյանի հետ: «Թաքնված սեր» հեռուստասերիալում Մարիամ Ադամյանը մարմնավորում է, իր խոսքով, կրակոտ Սաթենին. «Հեռուստադիտողը սովոր է ինձ տեսնել դրական ու մեղմ կերպարներում, այդ առումով նոր կերպարս շատ մեծ փոփոխություն կլինի: Թերեւս կերպարիս նման գիծը դարձավ այն հիմնական պատճառը, որ առաջարկը սիրով ընդունեցի: Չեմ թաքցնի, երբ ստացա մասնակցության հրավերը, փորձեցի մտածել ու վերլուծել՝ հասկանալու, թե ինչ կտա ինձ այս աշխատանքը, ինչքանով կկարողանամ ճիշտ ներկայանալ, բայց հետո հասկացա, որ ինձ նման փոփոխություն է պետք»,- պատմեց Մարիամը՝ նշելով, որ այս ստեղծագործական խմբի հետ մինչ այս էլ առիթ ունեցել է աշխատելու.

«Այս անձնակազմի հետ աշխատել եմ, երբ նկարահանվում էի «Սահմանին» ֆիլմում, նրանց հետ շատ հեշտ է համատեղ աշխատանք ստեղծել, իրար մեկ խոսքից հասկանում ենք ու անմիջապես գործի անցնում»,- հավելեց դերասանուհին:

«Սաթենը շատ կրակոտ աղջիկ է, շատ գունավոր ու խենթ, ամեն ինչին շատ թեթեւ է նայում, նրան մարմնավորելը շատ հետաքրքիր է,- կերպարի մասին պատմելիս՝ նշեց Մարիամն ու հավելեց, որ նոր կերպարի հետ նմանություններ ունի. «Դերասանը յուրաքանչյուր կերպար մարմնավորելիս, պետք է իրեն գտնի նրա մեջ: Սաթենից ես շատ տարբեր եմ, բայց նմանություններ էլ ունենք: Նա անգամ ունի բնավորության գծեր, որոնք իրական կյանքում կցանկանայի ինքս ունենալ. իր գունեղ տեսակը մարդուն շատ է հարկավոր: Նրա կարծիքով կյանքի խոչընդոտներին պետք է դրական աչքով նայենք, որպեսզի դրանք այլեւս չլինեն: Ինձ հետաքրքիր է նաեւ հենց դա, որ նա ինձ մեծ մասամբ նման չէ ու ես էլ ավելի հաճույքով եմ նրան իմը դարձնում: Սաթենին մարմնավորելու համար ես շատ եմ աշխատում, ուրախ եմ, որ ինքս ինձնից այդ առումով գոհ չեմ, քանի որ սպառված է այն դերասանը, ով իր խաղից գոհ է մնում»:

Բացի սպասվող հեռուստասերիալից՝ Մարիամ Ադամյանը այլ ծրագրեր էլ ունի.

«Ապրիլի 24-ին «32 թատրոնում» կրկին կբեմադրենք «Պարույր Սեւակ» ներկայացումը, որը նվիրված կլինի Հայոց ցեղասպանության 101-րդ տարելիցին: Մի քանի այլ ներկայացումների վրա եւս աշխատում եմ, որոնք շուտով կներկայացնենք»,- նշեց դերասանուհին:

Մեզ հետ զրույցում Մարիամը պատմեց նաեւ վերջերս Կապանում ներկայացրած «Սեր, ջազ, սատանա» ներկայացմումից եւ տպավորություններից. ««Սեր, ջազ, սատանա» ներկայացումը տարիներ առաջ էինք բեմադրել ու այս անգամ կարծես թե կրկին առաջին անգամը լիներ: Ներկայացման ռեժիսորը՝ Տարոն Նաղդալյանն, այս պահին Կապանում ծառայություն է անցնում ու հենց նրա նախաձեռնությամբ մեր ողջ թիմը որոշեց կրկին ներկայանալ այս ներկայացմամբ միայն թե այս անգամ Կապանի հանդիսատեսի համար: Ես չեմ կարող չառանձնացնել Կապանի հանդիսատեսին, ով իսկապես բառի բուն ու ամենալայն իմաստով մեզ ջերմորեն ընդունեց. Ըստ իս՝ մենք այս անգամ ավելի ավ խաղացինք այդ ներկայացումը»,- պատմեց Մարիամն ու կիսվեց գաղտնիքով.

«Անկեղծ ասած՝ այս ներկայացումը խաղացել էինք երկու տարի առաջ մեր դիպլոմային աշխատանքի ժամանակ ու ես միշտ ուզում էի, որպեսզի էլի այն խաղայինք, քանի որ ինքս մեզնից գոհ չէի ու այլ կերպ կցանկանայի ներկայանալ: Սա ինձ համար շատ մեծ հնարավորթյուն էր, քանի որ կարծում էի, որ այլեւս երբեք ես այդ ներկայացմանը չեմ մասնակցի ու արդյունքում կստացվեր, որ ինքս ինձ շտկելու հնարավորություն չէի ունենա, որի համար ինձ չէի ների, բայց գնացի, սխալս շտկեցի ու հետ եկա: Ուրախ եմ, որ ոչ միայն կրկին ներկայացա, այլեւ վայելեցի Կապանի բնության ողջ հմայքը»: