«Լաքշրի»–ն ստիպված կլինի վճարել դիզայների աշխատավարձը. «Փաստ»

«Փաստ» օրաթերթը գրում է.

Դիզայներ Լուսինե Մնացականյանը շարունակում է պայքարել «Լիգա Փրես» ՍՊԸ–ի կողմից տպագրվող «Լաքշրի» ամսագրի տնօրինության կողմից իրեն չվճարված աշխատավարձը ստանալու համար:

Հիշեցնենք, որ առաջին ատյանի դատարանը մերժել էր Լ. Մնացականյանի պահանջը, որը վերաբերում էր դատարանի կողմից աշխատանքի փաստը ճանաչելուն և աշխատանքի դիմաց չվճարված աշխատավարձը բռնագանձելուն:

Լ. Մնացականյանի փաստաբան Դավիթ Ասատրյանը առաջին ատյանի կայացրած վճիռը բողոքարկել էր՝ դիմելով ՀՀ վերաքննիչ դատարան: Դատական պրակտիկայում առաջին անգամ դատարանը՝ կիրառելով Եվրոպական սոցիալական խարտիան, հաստատել է աշխատելու փաստը և որոշման մեջ նշել, որ ՀՀ առաջին ատյանի դատարանը պետք է միայն աշխատավարձի չափը որոշի:

«Այսինքն, Ընդհանուր իրավասության դատարանը գործը քննելու է միայն այդ մասով և որոշում է կայացնելու Լուսինե Մնացականյանի կատարած աշխատանքի դիմաց վճարման ենթակա աշխատավարձի չափը: Ի դեպ, աշխատանքային օրենսդրության համաձայն, բոլորովին կարևոր չէ, թե աշխատողն ինչ պայմանագրի հիման վրա է աշխատել, որովհետև եթե կա աշխատանքային հարաբերություն՝ գործատու, աշխատող և աշխատանքային պարտականություն, ապա դա նշանակում է, որ անձը աշխատանքային հարաբերությունների մեջ է գտնվել: Եվ այդ դեպքում, բնականաբար, գործատուն նրան պետք է վճարի աշխատավարձ: Մնացած հարցերը, թե աշխատողը լավ է աշխատել կամ վատ, խոսում է պարտավորություններից խուսափելու մասին և որևէ էական ազդեցություն չունի, առավել ևս, որ չկա որևէ ապացույց»,– ասաց Դ. Ասատրյանը:

Լ. Մնացականյանի փաստաբանն այս պահին նպատակահարմար չհամարելով բացահայտել իրենց կողմից իրականացվելիք մարտավարական քայլերը` ընդամենը նշեց, որ իր պաշտպանյալի պահանջը վերաբերում է չվճարված 100000 դրամ աշխատավարձը բռնագանձելուն:

Դ. Ասատրյանը նշեց նաև, որ ամսագրի աշխատանքային ոճի մասին տեղեկացվել է նաև ՀՀ պետական եկամուտների կոմիտեն, որը նույնպես, չգրանցված աշխատող պահելու համար «Լաքշրի»–ում իրականացված հետաքննության արդյունքներով 50000 դրամի չափով տուգանել էր ընկերությանը:

Ի դեպ, այս գործով հաջորդ դատական նիստը մայիսի 2–ին է նշանակված: Փաստաբանը նման իրավիճակների մեջ չհայտնվելու համար աշխատանք փնտրողներին ու առանց պայմանագրի աշխատողներին խորհուրդ տվեց անպայման կնքել աշխատանքային պայմանագիր:

«Անկախ նրանից, թե գործատու–աշխատող հարաբերություններում ինչպիսի վստահության մթնոլորտ է տիրում, ինչպես նաև՝ աշխատողը փորձաշրջան է անցնում, թե որպես հիմնական աշխատող է աշխատանքի անցել, պետք է կնքի պայմանագիր: Դա բխում է երկու կողմերի շահերից, քանի որ այդկերպ նրանք երկուսն էլ ավելի պաշտպանված կլինեն»,– ասաց Դ. Ասատրյանը:

Ի դեպ, «Լիգա Փրես» ՍՊԸ–ի տնօրենը Էռնեստո Մարկոն է, ով հիմնականում չի զբաղվում կազմակերպչական խնդիրներով: «Փաստ»–ի տվյալներով, շատ դեպքերում նրան չի էլ հետաքրքրում, թե իրականում ինչ է կատարվում իր կողմից հիմնադրված ընկերությունում: Նրա համար լյուքս դասի ամսագրի փայլուն էջերն ու ներկայացուցչական հանդիպումներն են միայն կարևոր:

Ի դեպ, ընկերության կողմից կազմակերպություններին կամ անհատներին ծառայությունների դիմաց գումարներ չվճարելը կարծես թե սովորություն է: Եվ առաջին դեպքը չէ, որ գործը հասնում է դիվան բաշուն: Այդ մասին խոսում են դատարաններում նրանց դեմ առկա այլ բողոքները, սակայն, ինչպես երևում է, սա ամենևին էլ չի խանգարում գլամուրային ամսագրի տնօրինությանը նոր միամիտ աշխատակիցներ «որսալու» համար հայտարարություն տեղադրել «list.am» կայքում և փորձել ամսեամիս երկարաձգել ամսագրի գոյությունը:

Շարունակությունը՝ «Փաստ» օրաթերթի այսօրվա համարում