Հայաստանի հարուստ դասակարգը պետականության համար բացարձակ պիտանի չէ. «Փաստ»
«Փաստ» օրաթերթը գրում է.
Մեր հյուրն է քաղաքագետ Լևոն Շիրինյանը
– Նախընտրական այս ամբողջ իրարանցման մեջ քաղաքական բաղադրիչ կա՞:
– Քաղաքականության մեջ գործում են քաղաքական կայացած կուսակցությունները: Բայց լինում է նաև այնպես, որ քաղաքական կուսակցությունների մորթու տակ գործում են շահերի խմբեր: Իսկ քանի որ մեզանում քաղաքական կուսակցություններ, ըստ էության, չկան, հետևաբար գործում են շահերի խմբերը: Ու հիմա նրանք խմբավորվում են` խորհրդարանում տեղ ունենալու համար: Ու այս ամբողջ իրարանցման մեջ, որը ժողովրդի հետ բացարձակ կապ չունի, որևէ գաղափարախոսություն, պլատֆորմ կամ տնտեսական առաջարկ չկա: Նրանք իշխանության բաժանման հարց են լուծում:
– Ինչո՞ւ մեզանում չկայացավ ընտրությունների քաղաքական բաղադրիչը: Ի՞նչ օբյեկտիվ և սուբյեկտիվ պատճառներ կային:
– Օբյեկտիվ պատճառը տնտեսության քայքայված վիճակն է, հասարակության մեջ սոցիալական շերտերի հստակ չբաժանվածությունը և դասակարգերի չգոյությունը: Եթե լիներ, ասենք, բանվոր դասակարգ, ուզեր–չուզեր պետք է կազմավորվեր, գոնե արհմիություն ստեղծեր: Ուստի տնտեսության նման խճողված, անորոշ, անհասկանալի վիճակն առաջացնում է քաղաքական նման «իրականություն»: Բացի այդ, հասարակության հսկայական մասը լյումպենացել է և սոցիալական, դասակարգային պատկանելության զգացումը կորցրել:
Իսկ սուբյեկտիվ պատճառը էլիտար կոչված քաղաքական դասակարգի բացակայությունն է: Ակնհայտ է, որ էլիտար անձինք առանձին–առանձին կան, բայց քաղաքականորեն կազմակերպված չեն: Չկա այն մարդկանց խումբը, որը պետություն կստեղծի:
Իսկ կուսակցությունների քայքայման գործընթացն սկսվեց 1996–ից, երբ Լ. Տեր–Պետրոսյանը չընտրվեց, բայց մնաց իշխանության գլուխ, և սկսվեցին կուսակցությունների վարկաբեկման գործընթացներ: Հետո Ռ. Քոչարյանը եկավ հայտարարեց, որ իմ կուսակցությունը ժողովուրդն է: Ու կուսակցությունները վարի գնացին: Հետո Հայաստանում այնպես եղավ, որ կյանքն ամբողջովին հավաքվեց և կազմակերպվեց պլուտոկրատիայի ձեռքին: Պլուտոկրատները փողի քսակատերերն են: Նրանք վերևում են, բայց էլիտար չեն, ազնվական չեն: Հայաստանի հարուստ դասակարգը պետականության համար բացարձակ պիտանի չէ: Դա միանշանակ է:
– Իսկ ի՞նչ պետք է անել, որ գործընթացը նորից քաղաքական հուն վերադառնա:
– Եթե երկիրդ խորհրդարանական է, պետք է ունենաս քաղաքական կայացած կուսակցություններ: Մենք դրանք չունենք: Եթե նախագահական է, պետք է օրենսդիր, դատական, գործադիր իշխանությունների միջև լինի հստակ բաժանում: Դա էլ չունենք: Հայաստանը քաղաքական իմաստով հասուն և զարգացած իրականություն չէ: Մեզանում ավտորիտար ռեժիմ է: Ու կապ չունի նախագահական կարգ է, թե խորհրդարանական: Ասեմ ավելին: Նախագահականի դեպքում գոնե կա մեկ հոգի, ով կենտրոնացված իշխանությունը պահում է ձեռքում և ճգնաժամերի ժամանակ գործի դնում իր ուժը: Իսկ խորհրդարանական կարգի դեպքում հարատև ճգնաժամի վտանգը շատ մեծ է:
Իսկ որպեսզի իրավիճակը փոխվի, պետք է հեղափոխություն անել: Ես զենքը նկատի չունեմ: Արմատական հեղաշրջում է պետք մեր գիտակցություններում և հասարակական հարաբերությունների մեջ: Բայց արտագաղթող երկիրը նման կոնսոլիդացիա չի կարող անել: Նրա կենդանի արյունը անընդհատ հոսում է դուրս: Մյուս տարբերակը: Ունենում ենք դիկտատոր, որը հայրենիքին նվիրված է լինում այնքան, որքան գեներալ Դը Գոլը Ֆրանսիային 1960–ականներին, և բոլորին տեղն է դնում, օգնում է կուսակցություններին կայանալ: Հայաստանում այդ դիկտատորը չկա:
Ես երբեք չէի ենթադրի, որ կարող ենք լինել աշխարհում ամենահետամնաց քաղաքական կառույց ունեցող պետություններից մեկը, որտեղ խնամի–բարեկամ կապերը, արյունակցական կապերը առաջին պլանում կլինեն:
– Բայց մեզ կարող ենք մխիթարել` Թրամփը իր փեսային նշանակեց գլխավոր խորհրդական: Ամերիկայում էլ են նման բաներ լինում:
– Մեր մխիթարանքի հենակետը պետք է Հայաստանը լինի: Մեր երկիրը պետք է ոտքի կանգնի: Դրա համար պետք է կարգախոս ունենանք` Հայաստանը վեր է ամեն ինչից:
Շարունակությունը` «Փաստ» օրաթերթի այսօրվա համարում:
Ucom Highlights the Role of Technology in Nature Conservation at COP17
Applications Now Open: Armenian Virtuosos International Academy-Festival 2027
Rate.Trading. New Digital Culture of Currency Exchange
Ucom Shares Its Experience in Private Sector Engagement in Nature Conservation at COP17 Blue Zone
IDBank Supports the Reconstruction of the Spandaryan Canal: Commemorative Plaque Dedicated to the Pr...
Book Published with Ucom’s Support Presented at COP17: “The Secret Path of Hovazadzor”
First Steps in Your Career with IDBank: 16th Cycle of IDream Launched
IDBank and Idram Presented Several Environmental Initiatives at COP17
Digital Future and Sustainable Development: IDBank's Chairman of the Management Board in an Intervie...
«Here’s the screenshot, the money has been transferred»: IDBank warns of fake payment scams
