ինձ անձնական երջանկություն են մաղթում, ինչի համար շնորհակալ եմ.Նանան խոսել է իր նշանադրության մասին

Երգչուհի Նանան Կանանց և մայրերին նվիրված տոների կապակցությամբ մայրերին նվիրված իր հերթական տեսահոլովակն է ներկայացրել՝ հայտնի «Մայր իմ սուրբ և բարի» երգի հիման վրա: Երգչուհու խոսքով՝ անգամ թվերն է խառնում, թե սա մոր մասին պատմող իր որերրորդ տեսահոլովակն է.

«Մոր մասին կարող եմ անվերջ երգել, սա չսպառվող և ինձ համար ամենասիրելի թեման է: Մեր մայրերը մեզ համար ամեն ինչ են անում, իսկ դրա համար մենք անվերջ պետք է շնորհակալ լինենք: Այս երգով շնորհավորում եմ իմ և աշխարհի բոլոր մայրերին՝ կանանց տոնական մեկամսյակի կապակցությամբ»,- Life.panorama.am-ի հետ զրույցում նշեց Նանան:

Հետաքրքրվելով, թե ինչու է երգչուհին ընտրել հենց այս երգը, որը հայտնի է տարբեր երգիչների կատարմամբ, պատասխանեց.
«Մայրերի մասին իմ գրեթե բոլոր երգերն էլ հին ու հայտնի կատարումներ են: Ես շատ եմ սիրում Վիլիամ Վարդանյանի այս երգը, այն շատ են երգել տարբեր երգիչներ, բայց ես ցանկացա, որպեսզի ինքս էլ այն կատարեմ, և կարծում եմ՝ գործիքավորման և իմ ներկայացման շնորհիվ կարողացել եմ նոր կյանք տալ «Մայր իմ սուրբ ու բարի» երգին»:

Խոսելով տեսահոլովակի նկարահանման աշխատանքներից՝ Նանան նշեց, որ այն անցկացվել է Մոսկայում.
«Տեսահոլովակի իրականացման համար լավ թիմ է աշխատել: Նկարահանել է օպերատոր Սուրեն Թադևոսյանը, բայց թե ես, թե նա հետևել ենք իմ լավ ընկեր, ռեժիսոր Խաչիկ Եղոյանի խորհուրդներին: Մի գաղտնիք բացեմ, Խաչիկը թռիչքներց վախենում է, այդ պատճառով նա ասաց, որ իր խորհուդներն այստեղ կտա, բայց մեզ հետ Մոսկվա մեկնել չի կարողանա: Հենց նրա միտքն էր տեսահոլովակում ցույց տալ ջերմ հայկական մեծ ընտանիք»,- նշեց երգչուհին:

Հետաքրքրվելով՝ գուցե տեսահոլովակում իր տատիկն է նկարահանվել, Նանան նկատեց.
«Ոչ, մոր կերպարում տատիկս չէ, բայց իմ տեսահոլովակներից «Ով է ասել» տեսահոլովակում եմ նկարահանել տատիկիս: Այդ պատճառով այդ աշխատանքս ինձ համար շատ խոհրդանշական է»:

Ի դեպ՝ տեսահոլովակում Նանայի մատնեմատին շատ ակնառու տեսանելի է մատանի, որը շատերին շփոթության մեջ է գցել: Կարծիքներ կան, թե այն նշանադրության մատանի է և Նանան իր երկրպագուներին ցանկացել է հենց տեսահոլովակով այդ մասին ակնարկել: Այս թեմայի շուրջ խոսելիս՝ երգչուհին ժպիտով հերքեց.

«Ոչ, դա նշանադրության կամ ամուսնության մատանի չէ, այն իմ մեծածավալ զարդերից մեկն է: Ուրախ եմ, որ մարդիկ նման կասկածներ ունեն, գուցեև ինձ անձնական երջանկություն են մաղթում, ինչի համար շնորհակալ եմ: Սակայն նրանց պետք է դեռևս հայտնեմ, որ դեռ նշանադրված, առավել ևս ամուսնացած չեմ»:

Նկատելի է, որ Նանան մեծամասամբ գտնվում է ՌԴ-ում, որտեղ շատ հաճախ է համերգներով հանդես գալիս: Թե ինչու է երգչուհին հաճախ հենց Ռուսաստանի տարածքում ներկայանում, պատասխանեց.

«Ես շատ եմ սիրում իմ հանդիսատեսին՝ անկախ նրանից, թե նրանք որտեղ են ապրում: Այդ ինչու-ի պատասխանը մեկն է, պարզապես ՌԴ-ից եմ շատ հրավերներ ստանում, ՌԴ-ի հայերը պատրաստ են գնել իրենց սիրելի երգչի, երրգչուհու համերգի տոմսն ու գալ և մի լավ ուրախանալ՝ ուրախացնելով նաև մեզ՝ կատարողներիս»:

Երգչուհին այս պահին իր հանգիստն է վայելում Ջերմուկում, սակայն մեզ հայտնեց, որ ապրիլի 4-ին՝ իր ծննդյան օրը, համերգ է ունենալու Գյումրիում, որից ստացված հասույթը նվիրելու է Գյումրու մանկատանը.
«Ես արդեն իսկ հայտարարել եմ այդ մասին, կազմակերպչին ասել եմ, որ համերգի կայացման գումարներից զատ, ոչ մի այլ գումար չի ծախսվում: Իսկ մանկատան տնօրինությանը խնդրել եմ, որպեսզի երեխաները նամակներ գրեն, թե ինչ են ուզում, ես էլ կփորձեմ իրենց ցանկություններն իրականացնել և մենահամերգից հետո նվերներով գնալ նրանց այցելության»,- եզրափակեց Նանան:

Նյութի աղբյուրը՝ այստեղ