«Էս էի՞ք ուզում, էրեխեքին սպանեցի, դե գնացեք դիակները հավաքեք»:

Այսօր 34-ամյա Ռոզա Ալոյանի ձեռքով սպանված երկու երեխաների թաղման արարողությունը ցնցել էր Նոր Նորք համայնքը: 4 եւ 6-ամյա եղբայրներին գերեզմանատուն են տարել նրանց հոր տնից:

Հիշեցնենք, որ սեպտեմբերի 6-ին` առավոտյան, Ռոզա Ալոյանը երեխաների հետ գնացել է խանութ, առեւտուր արել, ապա վերադարձել տուն եւ կերակրել նրանց: Ինչպես ինքն է հայտնել ոստիկանությանը՝ իրեն միայնակ զգալով եւ իր կյանքը համարելով ավարտված, որոշել է խեղդամահ անել երեխաներին, ապա վերջ տալ նաեւ իր կյանքին: Այդ նպատակով նույն օրը՝ ժամը 12:00-ի սահմաններում, նա, իրեն պատկանող շարֆը կապելով խոհանոցի դռան վերեւում գտնվող ջրատար խողովակին, դրա վրա արել է հանգույց եւ ավագ որդուն` Վ. Ալոյանին կախելով այդ հանգույցից` խեղդամահ է արել: Այնուհետեւ խոհանոցի պատին ամրացված կախիչից ամրացնելով սավանից պատրաստված մեկ այլ օղակ` դրանից կախել եւ խեղդամահ է արել նաեւ կրտսեր որդուն` Հ. Ալոյանին: Այս ամենից հետո երեխաների դիակները տեղափոխել է մահճակալի վրա, պառկել նրանց կողքին, սավանը փաթաթել իր պարանոցին եւ փորձել իրեն խեղդելով կյանքին վերջ տալ, սակայն չի կատարել իր մտադրությունը: Երեխաներին վերմակով ծածկել է եւ տանից հեռացել` ավտոբուսով մեկնելով Երեւան:

 Ըստ դատախազության հաղորդագրության՝ Ռ.Ալոյանի հայրը ընտանիքը լքել է, երբ նա դեռ եղել է մանկահասակ: Իսկ մայրը սպանվել է՝ կացնահարվել, 1989 թվականին այդ ընթացքում փաստական ամուսնական հարաբերությունների մեջ գտնվող Հակոբ Թադեւոսյանի կողմից: Մոր սպանությունից հետո քրոջ եւ եղբոր հետ մեծացել է Գավառի մանկատանը:

«Հետքի» հետ զրույցում Ռոզայի մանկատան ընկերուհին՝ Նունե Սիմոնյանը պատմեց, որ մանկատանը նա չէր առանձնանում ոչ նորմալ վարքով. «Նա շատ նորմալ վարք է ցուցաբերել, 3 երեխաներն էլ շատ շփվող էին: Նրանց քույրն առանձնանում էր իր ակտիվությամբ, իսկ Ռոզան միշտ խոսել է, շփվել. որեւէ տարօրինակություն նրա մոտ չէր նկատվում»,- պատմում է Նունե Սիմոնյանը:

Նունեն Ռոզային վերջին անգամ տեսել էր նրա առաջնեկի ծնվելուց հետո: «Երբ նրա առաջին տղան ծնվեց, ես գնացել էի: Նրա սկեսրայրն ու ամուսինն էլ էին եկել: Ծննդատնից նրան տարան Մասիվի իրենց տունը: Ամեն ինչ կարծես թե նորմալ էր: Վերջին անգամ այդ ժամանակ եմ տեսել, իսկ հետո բաժանվել, գնացել է Արարատում ապրելու, էլ չենք շփվել: Արարատում բնակարան էր ստացել, բայց ինքը չէր աշխատում: Աղջիկները պատմում էին, որ բողոքում էր, թե ամուսինն իրեն չի օգնում»,- շարունակում է Նունեն:

Նունեին հայտնի էր նաեւ մի պատմություն, որը կարող էր ծանր հոգեբանական հարված հասցնել Ռոզային: «Ինքը բաժանվելուց հետո մի մարդու հետ էր կապվել՝ ամուսնուն հակառակվելու համար: Էդ մարդն ասել էր, թե իրեն ամեն ինչով կապահովի, բայց հետո թողել-գնացել էր: Ասում են՝ դրանից էլ ա խախտվել...»,- ավելացնում է Ռոզայի ընկերուհին:

Այն վարկածը, որ Ռոզան «Եհովայի վկաներ» աղանդի մասնակից է եղել, չի հերքում նաեւ նրա ընկերուհին. «Հա, ասում էին, որ եհովական ա դարձել, ինչ ա արել...»:

Ռոզայի եղբայրը դեռ մանկատանն ապրելու ընթացքում հայտնվել է գաղութում, որտեղ էլ ինքնասպան է եղել:

Երեխաներին սպանելուց հետո Ռոզան անմիջապես մեկնում է Երեւան՝ Նոր Նորքի հանրակացարան, որտեղ էլ հանդիպում է մանկատան ընկերուհիներին եւ ասում. «Էս էի՞ք ուզում, էրեխեքին սպանեցի, դե գնացեք դիակները հավաքեք»:

«Հետքը» զրուցելու է նաեւ Ռոզայի մյուս ընկերուհիների եւ ամուսնու հետ: Մանրամասներին կանդրադառնանք առաջիկայում: