«Սպասված և չսպասված» թեկնածուները խառնել են ՀՀԿ–ական պատգամավորի սպասումները. «Փաստ»

«Փաստ» օրաթերթը գրում է.

Մոտ երկու տարի առաջ Գագիկ Ծառուկյանի փակած քաղաքական էջը նորից բացելը և ապրիլի 2–ին անցկացվելիք խորհրդարանական ընտրություններին լայն դաշինքով մասնակցության հայտ ներկայացնելը ինչ–որ տեղ նաև ՀՀԿ–ին նետված ձեռնոց էր, քանի որ հենց իշխող կուսակցության «ջանքերի» հետևանքով էր, որ հզոր հասարակական ու տնտեսական գործիչը որոշում կայացրեց հեռանալ քաղաքականությունից և այլևս չմասնակցել հայաստանյան որևէ ներքաղաքական գործընթացների:
Այս օրերին տարբեր քաղաքական վերլուծաբաններ սկսել են կանխատեսումներ անել, թե այնուամենայնիվ, որ կուսակցություններին կհաջողվի քաղաքական ապաստան ստանալ Ծառուկյանական դաշինքում, բայց դեռևս բաց է մնում հարցը, թե արդյո՞ք այն մեծ հաշվով չհարվածեց ՀՀԿ–ի իմիջին, միևնույն ժամանակ նեղացնելով նաև իշխող կուսակցության ազդեցությունների շրջանակները:
ՀՀԿ անդամ, ԱԺ պատգամավոր Հովհաննես Սահակյանը «Փաստի» հետ զրույցում նշեց, որ սահմանադրական բարեփոխումների և նոր Ընտրական օրենսգրքի շնորհիվ քաղաքական բոլոր ուժերն ու գործիչները հնարավորություն են ստացել մասնակցել ընտրություններին, ինչը խոսում է ընտրական գործընթացների հանդեպ կորցրած հավատը վերականգնելու մասին:
«Այս ընթացքում մենք տեսանք, որ բազմաթիվ դաշինքներ ձևավորվեցին և բազմաթիվ սպասված և չսպասված անձինք և քաղաքական գործիչներ հայտարարեցին, որ մասնակցելու են առաջիկա ընտրություններին: Դա փաստում է, որ հասարակության մոտ ընտրությունների միջոցով որոշակի պրոցեսների մեջ մնալու և քաղաքական գործընթացներին մասնակցելու հավատը վերականգնվել է կամ ակտիվացել է: Ինչ վերաբերում է Գագիկ Ծառուկյանին, ապա ես բազմիցս հայտարարել եմ, որ քաղաքականությամբ չզբաղվելը նրա անձնական որոշումն է եղել, իսկ հիմա, որն ամենակարևորն է՝ Գագիկ Ծառուկյանը հայտարարել է, որ փակված էջը բացել է»,– ասում է Հ. Սահակյանը:
Պատգամավորի կարծիքով առաջիկա գործընթացներին մասնակցելով, բոլորը հնարավորություն ունեն ներկայանալ ու ներկայացնել իրենց ծրագրերը, իսկ հետ նայել և խոսել անցյալում տեղի ունեցած իրադարձությունների մասին՝ ճիշտ չէ: Խոսելով իր խոսքով՝ «սպասված և չսպասված» թեկնածուների մասին, Հ. Սահակյանն ասաց, որ «սպասվածները» բոլորին հայտնի մարդ–կուսակցություններն են, որոնք նախագահական ընտրությունների ժամանակ ակտիվանում են և սկսում են ամպագոռգոռ հայտարարություններով հանդես գալ:
«“Չսպասվածներն” ավելի ծանրակշիռ քաղաքական ուժերն են: Այսօր քաղաքական խճանկարն ամբողջությամբ արդեն պարզ է և կարծում եմ առաջիկայում ամեն ինչ ավելի պարզ կլինի: Ես չէի սպասում նաև, որ կուսակցությունները նորից չորս հոգով կսկսեն հինգ երգ երգել: Օրինակ՝ ով էր սպասում, որ «Ժառանգություն» կուսակցության առաջնորդը հայտարարություն անի, հետո իր ամենամոլի ջատագովն ասի, որ դա իրենց քաղաքական ուժի ընդհանուր տեսակետը չէ: Այստեղ մեր մտածելակերպի և սպասումների միջև տարբերություն կա»,– ասում է Հ. Սահակյանը:
Ճշտող հարցին, թե՝ «չսպասված թեկնածու» ասելով արդյո՞ք նա նկատի չունի Սեյրան Օհանյանին, պատգամավորն ասաց, որ այս փուլում անուններ մասնավորեցնելը և հնչեցնելը ճիշտ չէ, քանի որ իր կարծիքով հարկավոր է զգոն և խնամքով լինել սեփական տեսակետներն արտահայտելիս:
Շարունակելով ՀՀԿ–ի «սպասումների» թեման, փորձեցինք պարզել, թե Գագիկ Ծառուկյանի քաղաքականություն վերադառնալու սպասումներ կայի՞ն արդյոք Հանրապետական կուսակցությունում, սակայն պատգամավորն ասաց, որ այդ մասով ինքը որևէ քննարկման չի մասնակցել, սակայն ինքն անձամբ կարծում է, որ դա յուրաքանչյուր քաղաքական կամ հասարակական գործչի որոշումն է:
«Գագիկ Ծառուկյանը հայտարարեց, որ բացել է փակված էջը և որոշել է մասնակցել ընտրություններին: Եվ ժողովուրդն ինչ չափով իր քվեն վստահի Գագիկ Ծառուկյանին, այն չափով էլ կլինի նրա մասնակցությունը քաղաքական գործընթացներին»,– խոսքը եզրափակեց Հ. Սահակյանը:

Շարունակությունը` «Փաստ» օրաթերթի այսօրվա համարում: